Leejkunaj Tapuyninku

¿Ima niyta munan ‘kinsa kaj cielo’, ‘paraíso’ ima? (2 Cor. 12:2-4).

Uj kutipi apóstol Pablo nerqa: ‘Uj runa kinsa kaj cieloman ujllata oqharisqa karqa’, nispa (2 Cor. 12:2, 3). Chay runaqa apóstol Pablollataj karqa. Imaraykuchus Pabloqa chay versiculospi payllamanta parlarqa. Chantapis ashkha kutispi nerqa apostolta jina Dios ajllasqanta (2 Cor. 11:5, 23). Nillarqataj: “Señor mosqoypi jina rikuchiwasqanmanta, willawasqanmanta ima parlasaj”, nispa (2 Cor. 12:1, 5).

Chayrayku nisunman apóstol Pablo “kinsa kaj cieloman”, ‘paraisoman’ ima ujllata oqharisqa kasqanta (2 Cor. 12:2-4). Chantachá nerqa: ‘Señor willawasqanmanta parlasaj’, nispa. Chaytaj entiendechiwanchej Señor imachus aswan qhepaman kananmanta Pabloman willasqanta.

Chanta, ¿imataj ‘kinsa kaj cielo’?

Bibliapeqa cielo palabrata ashkha imaspaj oqharikun. Por ejemplo oqharikun cielomantapuni parlanapaj (Gén. 11:4; 27:28; Mat. 6:26). Wakin kutistaj oqharikun kay jallpʼapi kaj gobiernosmanta parlanapaj (Dan. 4:20-22). Wakin kutistaj oqharikun Diospa Gobiernonmanta parlanapaj (Apo. 21:1).

Wakin kutisqa Bibliapi kinsa kutita uj palabrata oqharin, imamantachus parlakusqan juntʼakunantapuni rikuchinanpaj, may importante kasqanta rikuchinanpaj chayri aswan sumaj kasqanta rikuchinanpaj (Isa. 6:3; Eze. 21:27; Apo. 4:8). Chayrayku nisunman kinsa kaj cieloqa uj sumaj gobierno kasqanta. Chay Gobiernopeqa Señorninchej Jesuswan, 144.000 ajllasqa cristianoswan gobernamonqanku. Apóstol Pedrotaj “mosoj cielota” suyakushanchej nishaspa chay Gobiernomanta parlasharqa (2 Ped. 3:13).

Chanta, ¿ima ‘paraisomantataj’ Pablo parlarqa?

Paraíso palabrataqa ashkha imaspaj oqharikun. Por ejemplo oqharikun kay jallpʼa patapi uj Paraíso kananmanta parlanapaj, mosoj jallpʼapi Diospa kamachisnin ujchasqas sonqo tiyasqastaj kausakunankumanta parlanapaj, chayri cielopi kaj ‘Diospa paraisonmanta’ parlanapaj nisunman cielopi kusiy kausay kasqanmanta parlanapaj (Apo. 2:7). Chaymanta astawan yachakunaykipaj 15 de julio de 2015 watamanta Torremanta Qhawaj revistapi, 8 paginapi, 8 parrafota leeriy.

Ichapis chaykunamanta 2 Corintios 12:4 versiculopi apóstol Pablo parlasharqa.

Yuyarikunapaj.

2 Corintios 12:2 versiculopi ‘kinsa kaj cielomanta’ parlan. Chay ‘kinsa kaj cieloqa’ ninakunman Señorninchej Jesús, 144.000 ajllasqa cristianoswan gobernamunankuwan. Chay Gobiernoqa ‘mosoj cielowan’ ninakullantaj (2 Ped. 3:13).

Chay Gobiernotaqa ‘kinsa kaj cielo’ nikun may sumaj Gobierno kasqanrayku.

¿Ima paraisomantataj apóstol Pablo parlasharqa? Ichapis parlasharqa kay jallpʼa patapi uj Paraíso kananmanta, mosoj jallpʼapi Diospa kamachisnin ujchasqas sonqo tiyasqastaj kausakunankumanta, cielopi kaj ‘Diospa paraisonmanta’ ima. Chaykunataj mosoj jallpʼapi kanqapuni.

Arí, mosoj cieloqa ninakun Jesucristo cielomantapacha kay jallpʼata gobernamunanwan. Mosoj jallpʼataj, kay jallpʼa uj paraisoman tukunanwan, chaypi Jehová Diosta ujchasqa yupaychanapaj.