2 Samuel
Contrankunata David vincishqan
8 Tsaypitanami filisteo runakunata vincirkur Meteg-ama markata paykunapita David qechurqan. 2 Tsaynölami Moab nación runakunatapis soldädunkunawan vincirqan. Nirkurmi moabita runakunata pampaman lätaykatsir jatun cordilwan tupurqan. Ishkay tupuyta tupurkurmi tsaycho lätaraykaq runakunataqa lapanta wanutsirqan. Tsaypita juk tupuyta tupurkurmi tsaycho lätaraykaq runakunata kawaykaqta kachaykurqan. Mana wanutsishqan kaqkunami Davidpa munaynincho kashpan impuestuta imaypis pägapäkurqan.
3 Tsaynölami soldädunkunawan David vincirqan Rehobpa tsurin Hadad-ezertapis. Payqa Soba nacionpa mandaqnin reymi karqan. Tsayno vincirqan Éufrates mayu nawpancho kaykaq markakunata Hadad-ezer shuntaq aywaptinmi. 4 Paykuna kaqpitami David prësu tsaritsimurqan juk waranqa qanchis pachak (1,700) cawallun muntashqa soldädukunata y ishkay chunka waranqa (20,000) chakilapa puriq soldädukunata. Pachak (100) carrëtata tsutananpaq cawallukunatapis shuntarqan. Wakin kaq cawallukunatanami itsanqa ankunkunata kutsur usharqan.
5 Davidwan pelyaptinmi Soba nacionpa mandaqnin rey Hadad-ezerta yanapananpaq Siria nacionpita soldädukuna chayarqan. Jina kaqtami paykunatapis ishkay chunka ishkay waranqa (22,000) soldädukunata wanutsipäkurqan. 6 Nirkurnami Davidqa Siria nación runakunata impuestuta pägatsinanpaq Damascuman soldädunkunata churarqan. Tsaynölami maypa aywaptinpis Davidta TAYTA DIOS yanaparqan contrankunata vincinanpaq.
7 Hadad-ezerta vincirkurmi soldädunkunapa capitanninkuna puritsishqan qori escüdunkunata shuntarkur Jerusalénman David apatsirqan. 8 Tsaynölami Beta y Berotai markakunapita tsaytsika broncitapis apatsirqan. Beta y Berotai markakunaqa Hadad-ezerpa munayninchömi karqan.
9 Tsaypitanami Hamat markapa mandaqnin rey Toi mayarqan Hadad-ezerpa soldädunkunata David vincishqanta. 10 Toiqa Hadad-ezerwan contra contrami rikanakurqan. Tsaymi kushikushpan tsurin Joramta kacharqan Davidta felicitananpaq. Qoripita, qellaypita y broncipita rurashqa tukuy niraq qarakuykunata qaraptinmi* 11 TAYTA DIOSPAQ David churarqan. Tsaynöpis churarqan lapan vincishqan nacionkunapita shuntashqan qorita, yoraq qellayta y broncita. 12 Tsay shuntashqankuna karqan edomita runakunapita, moabita runakunapita, amonita runakunapita, filisteo runakunapita, amalecita runakunapita y Soba nacionpa mandaqnin rey Hadad-ezerpitami.
13 Tsaynöpami David maytsay nacionchöpis reqishqa karqan. Siria nacionta vincirkur soldädunkunawan Jerusalénman kutirmi Kachi Pampa nishqancho chunka pusaq waranqa (18,000) edomita runakunata wanutsipäkurqan.* 14 Nirkurnami intëru Edom markakunacho soldädunkunata David churarqan tsaycho taqkuna paypa munaynincho kananpaq. Davidtami TAYTA DIOS yanaparqan maychöpis pelyar vincinanpaq.
Davidpa soldädunkunapa capitanninkuna pï pï kashqanpis
2 Samuel 20.23-26; 1 Crónicas 18.14-17
15 Israel runakunapa mandaqnin rey kar lapanta David alimi mandarqan y pitapis alimi juzgarqan. 16 Soldädunkunapa capitanninmi karqan Sarviapa wawan Joab. Ahiludpa tsurin Josafatmi karqan Israelcho ima pasashqankunatapis qelqaq. 17 Cürakunami karqan Ahitobpa tsurin Sadoc y Abiatarpa tsurin Ahimelec. Davidpa secretariunmi karqan Seraías. 18 Tsaynöpis Joiadapa tsurin Benaía karqan cereteo soldädukunapa y peleteo soldädukunapa capitanninmi. Davidpa tsurinkunaqa cürakunami karqan.