2 Samuel
Mefi-bosetta David shuntashqan
9 Juk kutichömi yanaqaqnin runakunata David tapukurqan kayno nir: “Saúlpa aylun kaqkuna ¿pilapis kawaykanraqtsuraq Jonatán rayku yanapanäpaq?”*
2 Tsaymi Saúlpa ashmayninkunapa capataznin Sibata qayaykatsir David tapurqan kayno nir: “¿Qamku Siba kaykanki?”
Tsayno tapuptin kayno nirqan: “Aw, noqami kaykä, tayta”.
3 Tsawraqa kayno nir tapurqan: “Tayta Diospa jutincho yanapanäpaq ¿Saúlpa aylunkuna mayqalanpis kawaykanku?”
Tsaymi Siba kayno nirqan: “Aw, Jonatánpa tsurin kawaykanraqmi. Itsanqa ishkan chakin weqrumi”.*
4 Tsayno niptinmi David kayno nirqan: “¿Maychötaq pay taykan?”
Tsawraqa Siba kayno nirqan: “Lo-debar markacho Amielpa tsurin Maquirpa wayinchömi taykan”.
5 Tsayno niptinmi rey Davidqa jukla kachakurqan Mefi-bosetta pay kaqman pushananpaq. 6 Saúlpa wilkan y Jonatánpa tsurin Mefi-bosetta chayaykatsiptinmi Davidpa nawpanman qonqurpakuykurqan urkunpis pampaman töpashqanyaq. Tsawraqa David kayno nirqan: “¿Qamku Mefi-boset kaykanki?”
Tsayno niptinmi Mefi-boset kayno nirqan: “Aw, noqami kaykä, tayta”.
7 Tsawraqa David kayno nirqan: “Ama mantsakamaytsu. Papäniki Jonatán raykumi yanapashayki. Tsaymi awkiluyki Saúlpa chakrankunata kutitsishunaykipaq nishaq. Noqa mikushqächömi qamqa imaypis mikunkipaq”.
8 Tsayno niptinmi Davidpa nawpanman Mefi-boset yapay qonqurpakuykur kayno nirqan: “Awkis alquno mana väliq kaykaptïpis tsayno kuyapämashqaykipita yusulpalä, tayta”.
9 Tsaymi Saúlpa ashmaynin Sibata qayaykur David kayno nirqan: “Saúlpa kaqtaqa lapantami imaykantapis wilkan Mefi-bosetta qoykushqä. 10 Qammi tsurikikunawan y ashmaynikikunawan chakrankunata arutsipar mikuyninkunata pirwapanki Mefi-bosetpa aylunkuna mikunanpaq. Mefi-bosetmi itsanqa makïcho kar noqapa mësächo mikunqa”.
(Sibapami tsurinkuna karqan chunka pitsqa y ashmayninkunami karqan ishkay chunka.)
11 Tsaymi Davidta Siba kayno nirqan: “Sirviqniki karmi lapan mandamashqaykita rurashaq, tayta”.
Tsaynöpami Mefi-bosetqa tsurinnöpis David mikushqan mësacho mikurqan.
12 Mefi-bosetpami wamralaraq tsurin karqan Micaía jutiyuq. Sibapa wayincho taqkunaqa lapanmi Mefi-bosetpa ashmaynin karqan. 13 Mefi-bosetnami ishkan chakin weqru kaptin Jerusaléncho tar rey Davidwan juntu mikurqan.