Levítico
Nadab y Abiú wanushqan
10 Aarónpa tsurinkuna Nadab y Abiúmi inciensu qoshtatsikunankunaman shanshata y inciensuta winarkur TAYTA DIOSPA nawpancho* qoshtatsirqan. Itsanqa manami pay munashqannötsu qoshtatsirqan. 2 Tsaymi TAYTA DIOSPA nawpanpita nina shamur paykunata rupar wanutsirqan. 3 Tsaypitanami Aarónta Moisés kayno nirqan: “Tantiyakuy TAYTA DIOS kayno nishqanta:
“ ‘Nawpäman yaykamuqkuna *santu kashqäta tantiyakäritsun.
Israel runakunapa nawpanchömi musyatsishaq munayniyuq kashqäta’ ”.
Tsayno niptin Aarónqa imatapis mana rimakurqantsu.
4 Tsaypitanami Aarónpa tiyun Uzielpa tsurin Misaelta y Elzafánta qayaykatsir Moisés kayno nirqan: “Tinkuna Toldu kaqcho wanushqa jitaraykaq ayluykikunata jorqurkur campamentupita juk läduman apapäkuy”.
5 Moisés tsayno niptinmi sotänanwan winturkur campamentupita juk läduman apapäkurqan.
6 Nirkurna Moisésqa Aarónta y Aarónpa tsurinkuna Eleazarta y Itamarta kayno nirqan: “Qamkunapis mana wanunaykipaq wanupakushqaykipita tinsha uma ama puripäkuytsu ni röpaykitapis ama rachipäkuytsu. Qamkuna lütuptikiqa Tayta Dios rabyashpan lapan runakunatami castiganqa. Paykunata TAYTA DIOS tsayno wanutsishqanpita Israel ayluykikunalami lütunqa. 7 Qamkunataqa TAYTA DIOSTA sirvinaykipaqmi *sagrädu aceitita winapashqä. Payta sirvinaykipaq kaykarqa Tinkuna Toldu patiupita ama yarqupäkuytsu. Tsaypita yarqurqa wanunkipaqmi”.
Tsawraqa Moisés nishqannölami paykuna rurarqan.
8 Tsaypita Aarónta TAYTA DIOS kayno nirqan: 9 “Kikikipis ni tsurikikunapis Tinkunantsi Tolduman yaykunaykipaq kaykarqa vïnuta ni ima shinkatsikuqtapis ama upupäkunkitsu. Shinkashqa yaykurqa wanunkipaqmi. Tsay nishqäkunaqa imayyaqpis leymi kanqa qamkunapaq y qamkunapita miraqkunapaqpis. 10 Cüra kaykarqa tantiyakunki imapis sagrädu kashqanta y mana sagrädu kashqanta. Tsaynöpis tantiyakunki imapis püru kashqanta y *impüru kashqanta. 11 Nirkur Israel runakunata shumaq yachatsinki Moisésta tantiyatsishqä leykunata”.
Mikunanpaq kaqta Eleazar y Itamar mana mikushqan
12 Tsaypitanami Aarónta y tsurinkuna Eleazarta y Itamarta Moisés kayno nirqan: “TAYTA DIOSPAQ tsaki mikuy ofrendata rupatsinaykipaq apamushqan putsuq kaqtaqa *sagrädu kaptin levadüraynaqta *altarpa nawpancho mikupäkunki. 13 TAYTA DIOSPAQ apamushqan ofrendakunapita qampaq y tsurikikunapaq destinashqa kaptin tsay sagrädu lugarlacho mikupäkunki.* Tsayno kananpaqmi TAYTA DIOS nimashqa.
14 “Israel runakuna jawka kawakuy sacrificiupaq pishtashqan uywapa pëchunpis chankanpis qamkuna mikunaykipaqmi kanqa. Tsaynöla tsurikikuna warmipis olqupis mikupäkunqa. Tsaykunaqa derëchuykimi kaykan. Tsay pëchuta TAYTA DIOSPA nawpancho wakman kayman kuyutsishqa kaptin y tsay chanka paypaq rakishqa kaptinmi *püru sitiucho mikupäkunki. 15 Manaraq mikurmi tsay alawqa kaq chankanta TAYTA DIOSPAQ rakinki y pëchuntana paypa nawpancho ishkan makikiwan joqarkur wakman kayman kuyutsinki. Tsaynöpis pishtashqayki uywapa wirantapis rupatsinki. TAYTA DIOS nishqannömi qamkunapa y qamkunapita miraq cürakunapa derëchun imayyaqpis kanqa”.
16 Tsaypita Aarónta Moisés tapurqan kayno nir: “Purificatsina sacrificiupaq apamushqan chïvupa putsuq kaq aytsanqa ¿maytaq?”
Chïvupa aytsanta mikunanpa trukan rupatsishqanta musyaykurmi Aarónpa tsurinkuna Eleazarta y Itamarta Moisés olqüparqan kayno nir: 17 “¿Imanirtaq purificatsina sacrificiupaq apamushqan uywapa aytsanta sagrädu lugarcho mana mikushqankitsu? Tsay aytsaqa sagrädumi kaykan. Tsaytaqa qamkunatami TAYTA DIOS qoykushurqayki Israel runakunapa jutsanpita altarcho rupatsiptiki perdonashqa kapäkunanpaq.* 18 Tsay uywapa yawarninta Tinkuna Toldu rurinman mana apaykarqa wilashqänöla sagrädu lugarcho aytsanta mikupäkunkiman karqan”.
19 Tsayno niptinmi Aarón kayno nirqan: “Kanan junaqmi purificatsina sacrificiuta y rupatsina sacrificiuta TAYTA DIOSPA nawpancho rupaykätsishqancho tsurïkuna wanushqa. Tsayno wanupakushqa karmi purificatsina sacrificiupaq apamushqan uywapa aytsanta mana mikushqätsu. Mikuptïqa ¿TAYTA DIOS munashqannötsuraq kanman karqan?”
20 Tsayno niptin Moisés manami imatapis rimakurqannatsu.