Levítico
Sacrificiukunata rupatsiyta Aarón qalaykushqan
9 Tsaypita pusaq junaqta Moisés qayarqan Aarónta, tsurinkunata y Israel mayor runakunata. 2 Nirkurna Aarónta kayno nirqan: “Purificatsina sacrificiupaq juk sänu turituta y rupatsina sacrificiupaq sänu carnita TAYTA DIOSPA nawpanman apamuy. 3 Israel runakunatana ninki purificatsina sacrificiupaq juk chïvuta apapäkamunanpaq. Tsaynöpis ninki rupatsina sacrificiupaq juk watayuq sänu turituta y juk watayuq sänu carnishta apapäkamunanpaq. 4 Tsaynöla jawka kawakuy sacrificiupaq juk töruta y juk carnita apapäkamutsun. Tsaykunata TAYTA DIOSPA nawpancho pishtapäkunki. Tsaynöla apapäkamutsun aceitiwan tsapushqa harinata. Tsayno apapäkamutsun TAYTA DIOS kanan junaq noqantsiman chayamunanpaq kaptinmi”.
5 Tsayno niptinmi Aarónta Moisés nishqannöla Israel runakuna tsaykunata apapäkurqan Tinkuna Toldu patiuman. Tsaymi lapan runakuna TAYTA DIOSPA nawpanman juntakarqan. 6 Tsawraqa Moisés kayno nirqan: “Apamushqaykita rupatsinantsipaqmi TAYTA DIOS nishqa. Nishqanta ruraptikiqa chipchipyaykarmi rikakämunqa”.
7 Nirkurna Aarónta Moisés kayno nirqan: “Purificatsina sacrificiupaq y rupatsina sacrificiupaq apamushqayki uywakunata *altarman apaykur pishtay. Tsaykunaqa kanqa qampis y Israel runakunapis perdonashqa kanaykipaqmi. Tsaypitana Israel runakuna apamushqan kaq uywakunata altarman apaykur pishtay paykunapis jutsankunapita perdonashqa kananpaq. Tsayno ruranaykipaqmi TAYTA DIOS nishqa”.*
8 Tsayno niptinmi purificatsina sacrificiupaq apamushqan turituta altarman apaykur Aarón pishtarqan. 9 Tsaypitana pishtashqan uywapa yawarninta Aarónpa tsurinkuna apaparqan. Tsawraqa dëdunta yawarman jatirpur altarpa waqrankunata Aarón lushiparqan. Putsuq yawartanami altar chakinman talirqan. 10 Nirkurna purificatsina sacrificiupaq pishtashqan uywapa rurunta, natincho kaykaq wiranta y wakin wiranta altarcho rupatsirqan. Moisésta TAYTA DIOS nishqannölami lapanta rurarqan. 11 Aytsanta y qarantami itsanqa campamentupita juk läduman apaykur rupatsirqan.
12 Nirkurnami rupatsina sacrificiupaq apamushqan uywata Aarón pishtarqan. Tsay uywapa yawarninta tsurinkuna makyaptinmi altarpa lädunkunata tsaqtsuparqan. 13 Tsaypitana tsay uywapa umanta y cuartutsashqan aytsata apapaptin Aarónqa altarcho rupatsirqan. 14 Pachanta y atakshunkunata maylarkur wakinta rupatsishqannöla altarcho rupatsirqan.
15 Nirkurmi purificatsina sacrificiupaq Israel runakuna apamushqan chïvuta pishtarkur purificatsina sacrificiuta puntata rurashqannöla Israel runakunapaq rurarqan. 16 Tsaypitana imaypis rurananpaq TAYTA DIOS nishqannöla rupatsina sacrificiuta rupatsirqan. 17 Tutapa rupatsina sacrificiuta rupatsishqan jananchömi juk aptay tsaki mikuytapis rupatsirqan.
18 Tsaypitanami Israel runakuna jawka kawakuy sacrificiupaq* apamushqan töruta y carnitapis Aarón pishtarqan. Tsay uywakunapa yawarninta tsurinkuna makyaptinmi altarpa lädunkunata tsaqtsuparqan. 19 Tsaynölami tsurinkuna makyarqan törupa y carnipa chupanta, pacha wiranta, rurunkunata y natincho kaykaq wiranta. 20 Tsay wirankunatami pishtashqan uywakunapa pëchunkuna jananman churapäkurqan. Nirkurnami wirankunalata altarcho Aarón rupatsirqan. 21 Pëchunkunata y alawqa kaq chankantanami Moisésta TAYTA DIOS nishqannöla joqarkur wakman kayman kuyutsirqan.
22 Purificatsina sacrificiupaq, rupatsina sacrificiupaq y jawka kawakuy sacrificiupaq apamushqankunata altarman churarkurmi Israel runakuna jananpa makinta joqarkur Aarón bendicionta qorqan.* Altarpita urarpurnami 23 Aarón y Moisés Tinkuna Tolduman yaykurqan. Tsaypita yarqarkamur Israel runakunata bendicionta qoptinmi TAYTA DIOSPA chipchipyaynin rikakämurqan. 24 TAYTA DIOSPA nawpanpita nina shamurmi altarcho kaykaq aytsata y wirata ruparqan. Tsayta rikaykurmi lapan Israel runakuna kushikuypita qaparar Tayta Diosta adorashpan lätakuykurqan.