Éxodo
Cürakunapa röpankunata rurashqan
39 Moisésta TAYTA DIOS nishqannölami Tinkuna *Sagrädu Tolduman cüra yaykunanpaq röpata rurapäkurqan azul, granäti y puka milwa hïlupita. Tsaynölami Aarónpaq sagrädu röpatapis rurapäkurqan.
Efodta rurashqan
2 *Efodta rurapäkurqan qori hïlupita, azul, granäti y puka milwa hïlukunapita y llanula putskashqa lïnu hïlupita. 3 Qoripita hïluta rurananpaqmi qorita takaypa lapshatsarkur llanula kananpaq kutsupäkurqan. Tsay hïlupita, azul, granäti y puka milwa hïlupita y llanula putskashqa lïnu hïlupitapis efodta shumaq awapäkurqan.
4 Efodpa ishkan kuchunchömi tirantikunata rurapäkurqan umrunman shawananpaq. 5 Wachkuwan efodqa tsay piëzalami karqan. Tsaytapis rurapäkurqan qori hïlupita, azul, granäti y puka milwa hïlukunapita y llanula putskashqa lïnu hïlupita. Lapanta rurapäkurqan Moisésta TAYTA DIOS nishqannölami.
6 Tsaynöpis ónice rumikunata kamarishpan qeshwanta qoripita ruraykur sigurapäkurqan. Nirkurmi sëlluta rumipita ruraqno tsay rumikunaman Israelpa tsurinkunapa jutinkunata qelqapäkurqan. 7 Tsay rumikunatami efodpa tirantinkunaman churapäkurqan Israel trïbukunapa jutinkunata imaypis yarparänanpaq. Lapan tsaykunata rurapäkurqan Moisésta TAYTA DIOS nishqannölami.
Pechërata rurashqan
8 Tsaynölami kuyaylapaq awashqa pechëratapis rurapäkurqan. *Efodta rurashqannölami qori hïlupita, azul, granäti y puka milwa hïlukunapita y llanula putskashqa lïnu hïlupita rurapäkurqan. 9 Pechërata rurarkur doblapäkurqan bolsano cuadrädu kananpaq. Largunpis anchunpis ishkay chunka ishkay (22) centïmetru karqan. 10 Pechëra jananman churapäkurqan chusku fïla kuyaylapaq rumikunata. Punta kaq fïlaman churapäkurqan sárdica rumita, topacio rumita y carbunclo rumita. 11 Ishkay kaq fïlaman churapäkurqan esmeralda rumita, zafiro rumita y diamanti rumita. 12 Kimsa kaq fïlaman churapäkurqan jacinto rumita, ágata rumita y amatista rumita. 13 Chusku kaq fïlaman churapäkurqan berilo rumita, ónice rumita y jaspe rumita. Tsay rumikuna mana yarqunanpaq qoriwan qeshwanta ruraykatsir sigurapäkurqan. 14 Fïlakunaman churashqan rumikuna karqan chunka ishkaymi. Tsayno chunka ishkay karqan Israelpa tsurinkuna chunka ishkay kaptinmi. Cada rumimanmi juk tsurinpa jutinta qelqapäkurqan rumipita rurashqa sëlluno kananpaq.
15 Tsaynöpis pechërapaq cordonkunata qori hïlupita piltapäkurqan. 16 Nirkurmi rumikunata sigurananpaq ishkay qeshwata y ishkay taksha argöllakunata qoripita rurapäkurqan. Tsay argöllakunata tanapäkurqan pechërapa jana kaq ishkan esquïnanman. 17 Nirkurnami tsay argöllakunaman qoripita piltashqa cordonta pasatsipäkurqan. 18 Cordonpa ishkan puntankunatami sigurapäkurqan umruncho kaq qeshwankunaman. Tsayqa watararqan pëchunchömi. 19 Tsaynöpis ishkay taksha argöllakunata qoripita rurarkur pechërapa ura kaq kuchunkunaman churapäkurqan. Tsay argöllakuna pechëra rurincho karmi efod janancho karqan. 20 Tsaynöpis ishkay taksha argöllakunata qoripita rurarkurmi efodpa wachkun jana lädunman churapäkurqan. Tsaykunami efodpa tirantinkunacho kar tinkurarqan pechërapa costüranman. 21 Pechërapa y efodpa argöllankunata azul cordonwanmi watapäkurqan efodpita mana yarqunanpaq. Lapanta rurapäkurqan Moisésta TAYTA DIOS nishqannölami.
Cürapa wakin röpankunata rurashqan
22 Tsaynölami *efodpa rurinman jatikunanpaq azul hïlupita sotänata awapäkurqan. 23 Uman yaykunanpaq kunkayuqta rurarkurmi sotänapa kunkan mana rachinanpaq rebëtinta jirapäkurqan. Tsay rebëtiqa karqan qara casäcapa rebëtinnömi. 24 Sotänapa ura kuchunpami llanula putskashqa lïnu hïluwan y azul, granäti y puka milwa hïlukunawan granädatano bordapäkurqan. 25 Tsaynöpis tsay kuchunpa qoripita rurashqa campanillakunata churapäkurqan. Tsaynöpami sotäna kuchunman granädakunata y qori campanillakunata jiruruq churapäkurqan. 26 Tsay sotänachöqa intëru kuchunpa tumariq karqan juk granäda, juk qori campanilla, juk granäda, juk qori campanilla. Moisésta TAYTA DIOS nishqannölami Tinkuna Tolduman yaykur jatikunanpaq tsay sotänata rurapäkurqan.
27 Aarónpaq y tsurinkunapaqmi tünicakunatapis llanula putskashqa lïnu hïlupita awapäkurqan. 28 Tsaynölami llanula putskashqa lïnu hïlupita rurapäkurqan görrata, görrapa adornunkunata y calzoncïllukunata. 29 Wachkutapis awapäkurqan llanula putskashqa lïnu hïlupita y azul, granäti y puka milwa hïlupitami. Awarkur wachkuman kuyaylapaqta bordapäkurqan. Lapanta rurapäkurqan Moisésta TAYTA DIOS nishqannölami.
30 Tsaynölami qoripita *sagrädu vinchata ruraykur rumipita rurashqa sëlluno kananpaq tsayman qelqapäkurqan kayno nir: “TAYTA DIOSPA karmi santu”. 31 Moisésta TAYTA DIOS nishqannölami tsay vinchata azul cordonwan görraman watapäkurqan.
Sagrädu Tolduta rurayta ushapäkushqan
32 Tsaynömi Tinkuna *Sagrädu Toldu rurayta ushapäkurqan. Moisésta TAYTA DIOS nishqannölami Israel runakunaqa lapanta rurapäkurqan. 33 Nirkurmi Sagrädu Tolduta y lapan manëjunkunata Moisésman apapäkurqan. Tsaymi apapäkurqan Sagrädu Toldupaq rurashqan ganchukunata, marcukunata, traviskunata, tushakunata, jawiräkunanta, 34 Tinkuna Tolduta qatananpaq pukaman tinishqa uysha pirqashta, fïnu qarakunata, babulta tsaparaq cortïnata, 35 *Pactu Babulta, babul wintukuna qerukunata, *babulpa tsapananta, 36 mësata, mësapa manëjunkunata, TAYTA DIOSPA nawpancho churaränanpaq kaq tantata, 37 qoripita rurashqan candelabruta, candelabrupa puntankunaman churananpaq kaq mechërukunata, candelabrupa manëjunkunata, atski ratananpaq aceitita, 38 qoripita rurashqa *altarta, *sagrädu aceitita, ali asyaq* inciensuta, Tinkuna Toldupa punkunta tsaparaq cortïnata, 39 broncipita rurashqa altarta, broncipita rurashqa rejïllata, altar wintukuna qerukunata, altarpa manëjunkunata, lavatoriuta jamakunantinta, 40 patiupa cortïnankunata, patiupa tushankunata, tushakunapa jawiräkunanta, patiupa punkunta tsaparaq cortïnata, patiupa estäcankunata waskantinta y Tinkuna Sagrädu Toldupa lapan manëjunkunatapis. 41 Tsaynöpis apapäkurqan Tinkuna Sagrädu Tolducho cüra jatikunanpaq kaq röpata. Tsay röpakunaqa karqan cüra Aarónpa sagrädu röpankuna y tsurinkuna jatikunanpaq röpakunami.
42 Moisésta TAYTA DIOS nishqannölami Israel runakunaqa lapanta rurarqan. 43 TAYTA DIOS nishqanno lapantapis rurashqanta rikarmi Moisés paykunata bendicionta qorqan.