1 Crónicas
Amonita runakunata David vincishqan
20 Cada watami tamya tiempu pasarkuptin reykuna pelyananpaq aywapäkuq. Tsay witsanmi soldädukunata pushakurkur Joab aywarqan Amón nación runakunawan pelyapäkunanpaq. Chayaykurmi chakrankunata y markankunata ushapäkurqan. Tsaynölami Rabá markatapis* tumariq tsapashpan atacar raqälata kacharirqan. Davidnami Jerusalénlacho quëdakurqan.*
2 Tsaypitanami Rabá markaman David aywaykur reypa corönanta qechurqan. Tsay corönaqa kimsa arröba qoripita rurashqa y kuyaylapaq rumikunawan adornashqami karqan. Tsay corönatami Davidta jatiparqan. Tsaynölami Rabá markapita imaykatapis alinnin kaqtaqa apakärirqan. 3 Markacho mana wanutsishqan runakunatami wakinta churarqan qeruta partinanpaq, wakinta churarqan chakracho arunanpaq y wakintana churarqan qeruta mutunanpaq. Tsaynölami wakin markakunacho taq amonita runakunatapis tsay aruykunaman churarqan. Nirkurnami soldädunkunawan Jerusalénman David kutikärirqan.
Jatusaq casta kimsa runakunata wanutsipäkushqan
4 Tsaypita Gezer markachönami filisteo runakunawan Israel runakuna guërrata rurapäkurqan. Tsaychömi jatusaq casta Sipai jutiyuq runata Sibecai wanutsirqan. Sibecaiqa Husa markapitami karqan. Tsaynöpami filisteo runakunata Israel runakuna vincipäkurqan.
5 Tsaypita yapaymi filisteo runakunawan guërrata rurapäkurqan. Tsaychömi Jairpa tsurin Elhanán wanutsirqan Gat markapita Goliatpa wawqin Lahmita. Lahmipa lanzanpis telar qeruno rakumi karqan.*
6 Gat markacho yapay yapay guërra kaptinmi jatusaq casta filisteo runa yarqamurqan Israel runakunawan pelyananpaq. Paypa cada makincho y cada chakincho soqta dëdun kaptinmi ishkay chunka chusku (24) dëdunkuna karqan. 7 Paytami Israel runakunata achäquita ashipaykaptin Davidpa wawqin Simeapa tsurin Jonatán wanutsirqan.
8 Tsay filisteo runakunami karqan Gat markapita jatusaq casta runakuna. Paykunatami David y soldädunkuna wanutsirqan.