Job
Job nishqan
21 Tsayno niptinmi Job kayno nirqan:
2 “Nishqäkunata shumaq mayamaptikiqa shonqüpis kushikunqami.
3 Parlamuptï shumaq mayamänaykipaq pacienciayki kaykulätsun.
Asipämayta munarqa parlayta ushariptïraq asikärinki.
4 “Noqaqa manami runatatsu reclamaykä, sinöqa Tayta Diostami.
Imanir nakaykashqäta mana tantiyatsimaptinmi pacienciäpis ushakashqa.
5 Parlapashqäta mayamashpaykimi pasaypa mantsakar shimiki tsapashqa mayarpankipaq.
6 Kikïpis tantiyayta mana kamäpakur pasaypami mantsakä.
Cuerpüpis fiyupami shiririn.
7 “¿Imanirraq fiyu runakunaqa wakinpita mas rïcuyan?
¿Imanirraq awkinyashqanyaq paykunaqa kawapäkun?
8 Tsurinkunata y wilkankunata rikashqanyaqmi kawapäkun.
9 Tsay runakunataqa Tayta Diospis manami castigantsu.
Wayinkunachöpis mana mantsakuypami jawkala täkärin.*
10 Törunkunapapis atskami tsurinkuna kan.
Wäkankunapis mana shuluylapami mirapäkun.
11 Tsurinkunapis uysha malwanöraqmi pañapäkun.
12 Tamburkunata, arpakunata y pinkullukunata tukarmi pasaypa kushikushpan qatswapäkun.
13 Tsay runakunaqa wanushqanyaqmi rïcu karkaykan.
Mana nakaylapami wanupäkunpis.
14 “Fiyu runakunaqa Tayta Diosta kaynömi nin:
‘Jawkala kawakunäpaq kachaykamay.
Munashqaykinöqa manami kawayta munätsu’.
15 Tsaynöpis kaynömi nipäkun:
‘¿Pitaq Tayta Diosqa payta sirvinantsipaqqa?
¿Imatataq jorquntsi payta manakur?’*
16 Tsayno niptinpis rïcu kashqanqa manami kikilankunapitatsu kaykan, sinöqa Tayta Diospitami.
¡Paykuna yarpashqannöqa manami ichiklatapis yarpayta munätsu!
17 “Fiyu runakunataqa elaqpita wanuqta imaypis manami rikantsitsu.
Manami imaypis paykunataqa desgracia pasantsu.
Tayta Dios manami imaypis rabyar paykunataqa castigantsu.
18 Manami shukukuy wayra oqshata apaqno paykunataqa elqätsintsu.
19 “Mana castigaptinmi runakunaqa nipäkun tsurinkunatana Tayta Dios castigananpaq kashqanta.
Noqaqa kaynömi nï: Tsurinkunata castigananpa trukanqa kikin jutsa ruraqkunata castigatsun.
Tsaynöpami jutsa rurayta kacharinanpaq kikinkuna tantiyakärinqa.
20 Kikinkunata desgracia pasatsun.
Lapanpaq munayniyuq Tayta Dios castigaptin nakapäkutsun.
21 Wanushqana kaykarqa tsurinkunata castigaptinpis manami lakikärinqatsu.
22 Tsayno yarpaptïpis ¿pitaq kantsi Tayta Diosta yätsinantsipaq?
Payqa jana patsacho kaykaqkunatapis juzganmi.
23 “Wakin runakunaqa jawka kawaykashqalanchömi wanun.
Kalpalancho kaykälarraqmi ushakan.
24 Paykunaqa wanushqanyaqpis manami qeshyantsu.
Weray weraymi kawapäkun.
25 Wakin runakunanami itsanqa lakishqa kawaykashqancho wanun.
Paykunaqa kushishqa kawana kashqantapis manami musyantsu.
26 Imano kawarpis lapantsimi ushakäshun.
Lapantsitami kuru mikamäshun.
27 “Noqaqa musyämi imata yarpapäkushqaykitapis.
Maliciaykämi lutanta rimashqäta nipäkamänaykipaq kashqanta.
28 Shonquykichöpis kaynömi yarparkaykanki:
‘Manami Job nishqannötsu kaykan.
Job nishqanno kaptinqa ¿imanirtaq fiyu runakuna rïcu karpis ushakan?¿Imanirtaq paykunapa wayincho taqkunapis desgracia pasaptin ushakan?’
29 “Tsayno yarparpis ¿manaku parlapäkushqanki nänipa pasaq runakunawan?
Paykunaqa maytsaypapis aywarmi musyan imano kashqantapis.
30 Tsaymi kayno nipäkun:
‘Ima desgraciapis fiyu runataqa manami pasantsu.
Fiyu runaqa Tayta Diospa castïgunpitapis qeshpinmi.
31 Tsay runataqa jutsata rurashqanta pipis manami nintsu.
Jutsata ruraptinpis manami pipis castigantsu.
32 Wanuptinqa shumaqmi pampapäkun.
Nirkurqa pampashqanchöpis täpapäkunraqmi.
33 Pampaq apaptinpis runakuna tsaytsikami qatirpan.
Pamparashqanpis kuyaylapaqmi kaykan’.
34 “Qamkunaqa shakyätsimayta munarpis lutankunatami rimarkaykanki.
Lapan nimashqaykipis manakaqlapaqmi kaykan”.