Ezequiel
Wayrapakuq warmiman Jerusalénta tinkutsishqan
16 TAYTA DIOSMI kayno nimarqan: 2 “Runapa tsurin, Jerusalén runakuna lutankunata rurashqanpita anyapay. 3 Jerusalén markata kayno ninki: ‘TAYTA DIOSMI kayno nin: Jerusalén, ¡qamqa kaykanki *Canaáncho yuriq warmimi! ¡Papänikiqa kaykan amorreo aylu runami! ¡Mamaykipis kaykan heteo aylu warmimi! 4 Yurishqayki junaq manami pipis pupu watuykita ruturqantsu. Manami pipis armatsishurqaykitsu ni kachi yakuwanpis lushipäshurqaykitsu. Inchanawanpis manami inchashurqaykitsu. 5 Manami pipis kuyapäshurqaykitsu. Kuyapäshunaykipa trukanqa melanäshushpaykimi yurishqayki junaq jitarishurqayki.
6 “ ‘Tsaymi nawpaykipa pasar rikarqä yawarlana jaytaykachaykaqta. Tsayta rikarmi kuyapar kayno nirqä: “¡Ama wanuytsu!”
7 “ ‘Shuntakushpämi yörano jatunyänaykipaq qamta winatsirqä. Winashpaykimi kuyaylapaq jipashyarqayki. Chuchuyki winaptinmi shapraykipis yurirqanna. Itsanqa röpaynaq qarapächulami kaykarqayki.
8 “ ‘Tsawraqa nawpaykipa yapay pasarmi rikarqä jipash poqushqana kar runawan tänaykipaq alina kaykashqaykita. Tsaymi warmï kanaykipaq shuntakushpä qarapächu kaptiki punchüwan tsapaparqä. Nirkurnami tänantsipaq promitinakur *pactuta rurarqantsi. Tsaypita patsami noqapa warmïna kashqanki’.* TAYTA DIOSMI tsayno nin.
9 “ ‘Tsaypitanami yawarlana kaykaqta armarkatsir perfümita winaparqä. 10 Nirkurmi kuyaylapaq bordashqa röpata y alinnin kaq zapatuta jatiparqä. Lïnupita kuyaylapaq awashqa wachkuwan wachkaparkurmi sëda tëlata umaykimanpis shukuparqä.
11 “ ‘Kamaraqla kanaykipaqmi kuyaylapaq adornukunata jatiparqä. Makikimanpis brasilëtakunatami jatiparqä. Nirkurmi kuyaylapaq kanaykipaq walqatapis walqaparqä. 12 Senqaykimanpis kuyaylapaq adornutami churaparqä. Rinrikimanpis zarcïllutami jatiparqä. Umaykimanpis kuyaylapaq corönatami jatiparqä. 13 Tsaymi qellaywan y qoriwan adornashqa karqayki. Bordashqa röpaykipis lïnupita y sëdapitami karqan. Alinnin kaq tantata, abëjapa mishkinta y olïvupa aceitintami mikuq kanki. Kuyaylapaq kar y imaykayuqpis rikakurmi reina kaymanpis chayashqanki. 14 Tsay jatipashqäkunawanmi kuyaylapaq kamaraqla karqayki. Kuyaylapaq kashqaykitami maytsay nacionkunachöpis parlapäkuq’ ”. TAYTA DIOSMI tsayno nin.
15 “ ‘Kuyaylapaq kashqaykiman atiënikurmi pïmaywanpis luta kakushqanki. Munaq kaq yatapäkunanmi kashqanki.* 16 Ïdulukunata adorakunan capillakunatami röpaykiwan adornashqanki. Tsaycho ïdulukunata adorarmi warmi runanta jarukur juk runawan kakuqno kashqanki. ¡Imanirtaq tsayno rikakushqanki! ¡Tsaynöqa ama imaypis rurankimantsu karqan!
17 “ ‘Kamaripashqä qellaypita, qoripita y kuyaylapaq alhäjakunapita runa niraq ïdulukunata ruraykurmi adorashqanki. 18 Kuyaylapaq bordashqa röpata jatipashqätami tsay rurashqayki ïdulukunata jatipashqanki. Nirkurmi noqapaq kaq aceitita y inciensutapis tsay ïdulukunata qoykushqanki. 19 Mikunaykipaq kamaripashqä alinnin kaq tantata, aceitita y abëjapa mishkintapis tsay rurashqayki ïduluman ali asyaynin* chayananpaqmi rupatsishqanki. TAYTA DIOSMI tsayno nin.
20 “ ‘Tsaynölami noqapaq kaq tsurikikunata warmita olqutapis adorashqayki ïdulukunapaq rupatsishqanki. Ïdulukunata adorashqaykiwan mana contentakushpayki 21 ¿imanirtaq tsurikikunatapis pishtarkur ïdulukunapaq rupatsishqanki? 22 Jipashyarkur ïduluta adorarnami mana yarpankinatsu wamra kaptiki ali rikashqäta ni qarapächula ni yawarlana qochpashqaykita’.
23 “TAYTA DIOSMI kayno nin: ¡Wawalaw! ¡Tsayno kashqaykipita kanan imaraq pasashunki! 24 Pläzakunachöpis ïdulukunata adoranaykipaq tolduta sharkatsishqanki. 25 Pïmaywanpis kakunaykipaqmi cälli esquïnakunachöpis tsayno rurashqanki. Tsaychömi pïmaytapis anchapashqanki.*
26 “ ‘Hechorpano pishqun kaptinmi vecïnuyki Egipto runakunawanpis kakushqanki.* Paykunawan kakushpaykimi fiyupa rabyanätsimashqanki. 27 Tsayno kashqaykipitami qamta castigar nacionnikita takshayätsinanpaq contrayki filisteo runakunapa makinman entregashqä. Pasaypa mana alita rurashqaykita rikarmi paykunapis penqakärirqan.
28 “ ‘Shanaripakur runata mana ajashpaykimi Asiria runakunawanpis kakushqanki. Paykunawan mayjina kakurpis manami yamashqankitsu*. 29 Tsaynölami Babilonia negocianti runakunawanpis kakushqanki. Paykunawan kakurpis shanaripakushqalami kaykashqanki. 30 Tsayno kaptikipis qaqlaykicho yawarnikipis manami kantsu. *Wayrapakuq warmino kashqayki ¿manaku penqakuypaq kaykan?’ TAYTA DIOSMI tsayno nin.
31 “ ‘Cälli esquïnakunacho y pläzakunacho runakunawan kakushpayki wayrapakuq warmino cobranaykipa trukanqa mana cobraylapami piwanpis kakunki. 32 Runanta jarukuq warminömi kaykanki. 33 Wayrapakuq warmiqa cobranmi. Qamqa cobranaykipa trukan pägankimi. Tsayno päganki maytsaypitapis shamuq runakunatami. 34 Pägashunaykipa trukanqa qammi pägaykanki. Tsayno rurashpayki wayrapakuq warmipitapis peormi kaykanki.
35 “ ‘Pïmaywanpis kakuq Jerusalén, TAYTA DIOS nishqanta mayay. 36 TAYTA DIOSMI kayno nin: Mana penqakuypami qarapachakur waynaykikunawan kakushqanki.* Tsaynöpis ïduluykikunata adoranaykipaqmi wawaykikunatapis *altarcho wanutsishqanki. 37 Tsaymi kuyashqayki kaqkunatapis y chikishqayki kaqkunatapis lapan waynaykikunata nawpaykiman shuntamushaq. Paykunapa nawpancho qamta qarapachaptïmi lapanpis penqaynikita rikaptin pasaypa penqakunkipaq.*
38 “ ‘Jukwan jukwan jarukamashqaykipita y wanutsikuq kashqaykipitami fiyupa rabyakushpä castigashayki. 39 Tsaymi waynaykikunapa makinman kachaykuptï sharkatsishqayki tolduykikunata y qeshtarashqayki cämaykikunata ushakätsinqa. Röpaykita qechushushpayki adornuykikunatapis apakurmi jinaylatana kacharishunkipaq.
40 “ ‘Tsaytsika runakuna shamurmi saqmapäkushunkipaq y espädankunawanmi tuksipäkushunkipaq. 41 Wayikikunatapis rupatsirmi ushapäkunqapaq. Lapan warmikuna rikaykaptinmi tsayno ushakätsinqa. Wayrapakuq warmi mana kaptikinami waynaykikunata päganaykipaqpis qellayniki mana kanqanatsu. 42 Tsayraqmi rabyaynï pasanqa. Lutankunata manana ruraptikiqa manami rabyashaqnatsu.
43 “ ‘Wamra kaptiki ali rikashqäta qonqaykurmi lutankunata rurar pasaypa rabyanätsimashqanki. Tsay jananmanmi fiyupa shanaripakur pïmaywanpis purikushqanki. Tsayno penqaypaq kawashqaykipitami castigashayki’. TAYTA DIOSMI tsayno nin.
44 “ ‘Castigaptï lapan runakunami asipäshushpayki kayno nipäkunqa: “¡Wawanpis mamannölami kaykan!”
45 “ ‘Qampa mamayki kashqa heteo aylu warmimi y taytaykinami kashqa amorreo aylu runa.* Mamaykipis nanaykikunapis runanta y wawankunatami chikishqa.* 46 Samaria markami mayor nanayki kaykan. Payqa norti kaq läduchömi wawankunawan tarqan. Shulka nanaykinami Sodoma marka kaykan. Payqa sur kaq läduchömi wawankunawan tarqan. 47 Paykunata rikakurmi jutsa rurayta qalaykushqanki. Nirkurpis paykunapita mas peormi lutan ruraykunaman churakashqanki.
48 “ ‘Noqa TAYTA DIOSMI jurar kayno nï: Qam rurashqaykino y wawaykikuna* rurashqannöqa manami nanayki Sodomapis ni wawankunapis rurapäkushqatsu. 49 Wawankunawan nanayki Sodomapis mikuynin putsuy putsuy kaptin jawka kawashpanmi orgullösu rikakärishqa. Tsayno karmi waktsakunata y pobrikunata imaypis mana yanapashqatsu. 50 Pasaypa orgullösa rikakurmi melanaypaq jutsata rurapäkushqa. Tsayno kashqanta rikarmi elqätsishqä.
51 “ ‘Nanayki Samariapitapis peormi jutsata rurashqanki. Qam jutsata rurashqaykipitaqa nanaykipa jutsanqa manami aläpatsu. 52 Mas melanaypaq kaqkunata rurashqa karmi nanaykikunapita mas jutsayuq kaykanki. ¡Tsayjinanpa jutsayuq kaykarqa pasaypa penqakuy!
53 “ ‘Sodomata y Samariata wawantintami yapay yanapashaq. Tsaynölami qamtapis yapay yanapashaykipaq. 54 Yanapaptïpis mana alita rurashqaykipita fiyupami penqakunkipaq. Tsaymi nanaykikunapis kushikärinqa qamno jutsata mana rurapäkushqanpita. 55 Yanapashqä witsanmi nanayki Sodomapis wawankunawan y nanayki Samariapis wawankunawan unay kawashqanno yapay jawkana kawapäkunqa. Tsaynölami qampis wawaykikunawan jawkana kawapäkunkipaq.
56 “ ‘Orgullösa kashqayki witsanmi nanayki Sodomata pasaypa manakaqman churarqayki. 57 Tsay witsanqa jutsata rurashqayki manaraqmi mayakarqanraqtsu. Kananmi itsanqa Edom nación, Filistea nación y lapan vecïnuyki nacionkunapis tsayta musyaykur manakaqman churapäkushunki. 58 Shanaripakur pasaypa melanaypaq kaqkunata rurashqaykipita castigaptïmi fiyupa nakankipaq. TAYTA DIOSMI tsayno nin.
59 “ ‘TAYTA DIOSMI kayno nin: Qamqa manakaqman churamarmi pactu rurashqantsita cumplishqankitsu. Tsaymi kananqa makïta apankipaq. 60 Tsayno castigarpis jipash kashqayki witsan pactu rurashqantsita manami qonqashaqtsu. Tsaymi imayyaqpis alina kawanantsipaq yapay pactuta rurashun. 61 Tsaynöpis mayor nanaykita y shulka nanaykita wawaykikunano kananpaqmi makikiman churamushaq. Paykuna wawaykino kananpaq mana parlakushqa kaptintsipis tsaynömi rurashaq. Tsayno ruraptïmi jutsa rurashqaykita yarparkur pasaypa penqakunkipaq.
62 “ ‘Qamwan yapaymi pactuta rurashun. Tsayraqmi TAYTA DIOS kashqäta musyankipaq. 63 Lapan jutsa rurashqaykita perdonaptïmi mana alikunata rurashqaykita yarparkur fiyupa penqakushpayki upälakunkipaq’. TAYTA DIOSMI tsayno nin”.