Levítico
Püru kaq y impüru kaq uywakuna
11 Moisésta y Aarónta TAYTA DIOS kayno nirqan: 2 “Israel runakunata kayno niy: ‘Uywakunata mikupäkunki 3 ishkay shilluyuq kutipaq kaqta. 4 Kutipaq kaptinpis cada chakincho ishkay shilluyuq mana kaptinqa ama mikupäkunkitsu. Tsaynöpis cada chakincho ishkay shilluyuq kaptinpis mana kutipaq kaptinqa ama mikupäkunkitsu.
“ ‘Tsayno kaptinqa *camëllu aytsata ama mikupäkunkitsu. Camëlluqa kutipaq karpis cada chakincho manami ishkay shilluyuqtsu. Tsaymi qamkunapaq *impüru kaykan. 5 Tsaynöla tejón aytsata ama mikupäkunkitsu. *Tejonqa kutipaq karpis manami ishkay shilluyuqtsu. Tsaymi qamkunapaq impüru kaykan. 6 Tsaynöla munti cunish aytsata ama mikupäkunkitsu. Munti cunishqa kutipaq* karpis manami ishkay shilluyuqtsu. Tsaymi qamkunapaq impüru kaykan. 7 Kuchi aytsatapis ama mikupäkunkitsu. Kuchiqa ishkay shilluyuq karpis mana kutipaq karmi qamkunapaq impüru kaykan. 8 Tsay uywakunapa aytsantaqa ama mikupäkunkitsu. Wanuptinpis ama yataylapis yatankitsu. Tsay uywakunaqa qamkunapaq impürumi kaykan.
9 “ ‘Mayucho kaqkunata y lamarcho kaqkunatapis alëtayuq y escämayuq kaqkunalata mikupäkunki. 10 Lamarcho kaptinpis, mayucho kaptinpis escämaynaq y alëtaynaq kaqkunataqa ama mikupäkunkitsu. Tsaykunaqa qamkunapaq impürumi kaykan. 11 Tsaykunapa aytsantaqa ama mikupäkunkitsu. Impüru kaptin wanushqatapis melananki. 12 Lapantapis alëtaynaq y escämaynaq kaqkunataqa impüru kaptin melananki.
13 “ ‘Wakin kaqtaqa päriqkunatapis ama mikupäkunkitsu. Tsaypa trukanqa impüru kaptin melananki. Ama mikupäkunkitsu ankata, wiskulta, lamarcho pescädu tsariq äguilata, 14 milänu nishqan ankata, tukuy casta halconkunata, 15 tukuy casta cuervukunata, 16 *avestruzta, chushiqta, qewllata*, tukuy casta ankata, 17 tukuta, cormorán nishqan yaku pätuta, ibis nishqan yaku pätuta, 18 cisnita, pelïcanuta, condorta, 19 *cigüeñata, lapan casta garzata, abubillata y chikchita.
20 “ ‘Lapan casta päriq y chusku chakiyuq insectukunapis* qamkunapaq impürumi kaykan. Tsaykunataqa melananki. 21 Chusku chakiyuq y älayuq saltaqkunatami itsanqa mikupäkunki. 22 Tsayno kaptinqa lapan casta chukluskunapis alimi kaykan mikupäkunaykipaq. 23 Mana saltaqkunataqa päriq kaptinpis y chusku chakiyuq kaptinpis ama mikunkitsu.
24 “ ‘Kanan tantiyatsishayki imata yatar impüru rikakunaykipaq kashqantapis. Pipis impüru uywa wanushqata yatarqa patsa tsakashqanyaqmi impüru kanqa. 25 Tsay wanushqa uywakunata pipis joqarirqa röpanta taqshakunqa. Tsayno taqshakurpis patsa tsakashqanyaqmi impüru kanqa.
26 “ ‘Ima uywapis ishkay shilluyuq karpis mana kutipaq karqa qamkunapaq impürumi kaykan. Tsay uywakuna wanuptin mayqanpis yataq kaqqa impürumi rikakunqa.
27 “ ‘Chaki paltalanwan puriq uywakunapis* qamkunapaq impürumi kaykan. Tsay uywakuna wanuptin pipis yataq kaqqa patsa tsakashqanyaqmi impüru kanqa. 28 Tsay impüru uywakuna wanushqa jitaraykaqta joqariq kaqqa röpanta taqshakunqa. Taqshakurpis patsa tsakashqanyaqmi impüru kanqa.
29 “ ‘Tsaynöpis pachalanpa y lätaypa puriqkuna qamkunapaq impürumi kaykan. Tsaykuna kaykan waywash, ukush y lapan casta shulakkunami. 30 Shulakkuna impürumi kaykan salamanquesa karpis, cocodrilu karpis, lagartu karpis, lagartija karpis y camaleón karpis. 31 Tsaykunaqa qamkunapaq impürumi kaykan. Pipis tsaykuna wanuptin yataq kaqqa patsa tsakashqanyaqmi impüru kanqa.
32 “ ‘Tsay impüru kaqkuna wanur imamanpis töpashqan kaqqa impürumi kanqa qeru karpis, röpa karpis, qara karpis, costal karpis, herramienta karpis. Töpaq kaqtaqa jukla yakuman jatinki. Tsayno ruraptikipis patsa tsakashqanyaqmi impüru kanqa.
33 “ ‘Tsay impüru kaqkuna wanur mitu mankaman winakaptinqa manka rurincho kaq lapanpis impürumi kanqa. Tsayno kaptinqa mankatapis pakinki. 34 Ima mikuymanpis tsay mankacho kaykaq yaku pilchiptinqa mikuypis impürumi rikakunqa. Tsay mankacho kaykaq yakupis impürumi rikakunqa. 35 Hornu jananman o tulpa jananman tsay impüru kaqkuna wanur shikwaptinqa impürumi rikakunqa. Tsaykunataqa impüru kaptin chipyaq talamarinki.
36 “ ‘Tsayno kaptinpis yaku upukunayki pukyucho o pözucho tsay impüru kaqkuna wanushqa winaraptinpis tsay yaku manami impürutsu rikakunqa. Wanushqata yataq kaqmi itsanqa impüru rikakunqa.
37 “ ‘Murunaykipaq kaq muruman tsay impüru kaqkuna wanur töpaptinpis muru manami impürutsu rikakunqa. 38 Muru ushmaraykaq jananman shikwaptinmi itsanqa impüru rikakunqa.
39 “ ‘Mikunaykipaq kaq uywa wanuptin pipis yataq kaqqa patsa tsakashqanyaqmi impüru kanqa. 40 Kikilan wanushqa uywapa aytsanta mikuq kaqqa röpanta taqshakunqa. Tsay wanushqa uywata jorquq kaqpis röpanta taqshakunqa. Tsayno taqshakurpis patsa tsakashqanyaqmi impüru kanqa.
41 “ ‘Pachalanpa y lätaypa puriqkunataqa imatapis ama mikupäkunkitsu. Tsaykunaqa impüru kar melanaypaqmi kaykan. 42 Tsaykunata ama mikupäkunkitsu pachalanpa puriptinpis o chuskun chakiwan puriptinpis o atska chakinwan puriptinpis. Tsaykunaqa impüru karmi melanaypaq kaykan. 43 Cuidädu tsaykunata yatar qamkuna impüru rikakunkiman. 44 Noqaqa TAYTA DIOSNIKIMI kaykä. Noqaqa *santumi kaykä. Tsayno kaykaptinqa nishqäkunata cäsukur santu kapäkuy. Tsayno kaptinqa pachalanpa y lätaypa puriqkunata ama mikupäkunkitsu. 45 TAYTA DIOSNIKI kanäpaqmi Egiptupita qamkunata jorqamushqä. Noqaqa santumi kaykä. Tsayno kaykaptïqa qamkunapis santu kapäkuy.*
46 “ ‘Kay leykunami kaykan tukuy casta uywakuna, tukuy casta päriqkuna, yakucho tukuy casta kaqkuna y tukuy casta pachalanpa y lätaypa puriqkuna 47 mayqan impüru kashqanta y mayqan püru kashqantapis tantiyapäkunaykipaq. Tsaynölami tantiyankipaq mayqanta mikunaykipaq kashqanta y mayqanta mana mikunaykipaq kashqantapis’ ”.