Salmos

88 (2) Salvamaq TAYTA DIOSNILÄ, tsakaypapis junaqpapis yanapamänaykipaqmi manakamü.

 2 (3) ¡Manakamushqäta wiyaykalämay!

¡Ruwakamushqäta awniykalämay!

 3 (4) Fiyupami nakaykä.

Wanuypis janächönami kaykan.

 4 (5) Wanunäpaqna kashqantami pïmaypis yarpapäkun.

Pasaypami janjampaykachaykä.

 5 (6) Ayakuna jitaraykashqancho jitaraqnömi kaykä.

Guërracho wanutsishqa runa pamparaykaqnömi kaykä.

Kacharishqayki runanönami kaykä.

Pasaypa qonqashqayki runanönami kaykä.

 6 (7) Mantsariypaq patsapa shiminman qaykamaqnömi pasaypa tsakayman qaykarimashqanki.

 7 (8) Pasaypa rabyar castigamaptikimi lamarpa ölan tsapamashqanno kaykä. Selah

 8 (9) Lapan amïgükunata nawpäpita qarquriptiki japalänami rikakushqä.

Paykunaqa rikamaytapis manami munapäkunnatsu.

Carcilcho wichqaraqnömi maypa qeshpiytapis mana kamäpakütsu.

 9 (10) Pasaypa waqaylawanmi nawïpis tsakarpunna.

Waran waran qamlatami manakamü, TAYTA DIOS.

Makïta joqarkur qamta ruwakamü.

10 (11) Milagrukunata ruraptikipis ¿wanushkuna rikanqatsuraq?

Pamparashqanpita agradëcikushunaykipaq ¿sharkamunqatsuraq? Selah

11 (12) Kuyakuq kashqaykipita ¿sepultüracho rimapäkunqatsuraq?

Ali kashqaykipita ¿ayakuna wilanakunqatsuraq?

12 (13) Wanurqa lapantapis qonqaykunqami.

Alikunata rurashqaykita y espantaypaq rurashqaykitapis ¿piraq yarpanqa?*

13 (14) Noqami itsanqa yanapamänaykipaq qamlata manakamü, TAYTA DIOS.

Tsaka tsakalami qamta ruwakamü.

14 (15) TAYTA DIOS, ¿imanirtaq qonqaykamanki?

¿Imanirtaq noqapita *pakakunki?

15 (16) Mözu kashqäpita patsami pasaypa nakar awja puntalanpa wanuypita qeshpishqä.

Mana awantaypaq kaq castïgukunawanmi nakatsimashqanki.

Mastaqa mananami awantayta kamäpakünatsu.

16 (17) Pasaypa rabyakurkur castigamaptikimi mantsakashqa kaykä.*

17 (18) Nakaylami imay hörapis tumapaykäman.

Tsay nakaykunawanmi yakucho shenqaykaqno kaykä.

18 (19) Amïgükunatapis y aylükunatapis nawpäpita qarqushqankimi.

Kananqa yanawyaykaqchönömi lakishqa kaykä.