Joel

1 TAYTA DIOS revelashqantami Petuelpa tsurin Joel kayno wilakurqan:

 2 Mayor runakuna, kanan nishqäta shumaq mayapäkamay.

Judá nacioncho taq runakuna, kanan wilakushqäta wiyapäkamay.

Kay castïgutanöqa ¿imaylapis rikapäkushqankiku?

Taytayki kawashqan witsan kayno mantsariypaq castïgu ¿imaylaqa kashqaku?

 3 Kay castïgu imano kashqantapis tsurikikunata wilapanki.

Tsurikikunapis tsurinkunata wilapanqa.

Tsaynöla wilkaykikunapis tsurinkunata wilapanqa.

 4 Jatusaq chukluskuna katushqantapis akapa chukluskunami ushashqa.

Akapa chukluskunapita qeshpiqlantapis malumyakunami mikushqa.

Tsaypita putsuqlantapis shiwrikunami ushashqa.*

 5 Upyalaman churakashqa kaq runakuna, tantiyakäriy.

Shinkashqaykipita kachakarkur waqapäkuy.

Chukluskuna üvata ushaptin upyanaykipaq vïnupis manami kannatsu.

 6 Yupaytapis mana atipaypaq soldädukunanömi tsay chukluskuna markantsiman juntakämushqa.

Kirunkunapis waqunkunapis leonpanöraqmi kaykan.*

 7 Lapan üvakunatapis chakranpami ushashqa.

Hïguspa rämantapis pasaypami ushashqa.

Yörantapis tululantami kachaykushqa.

8 Tänanpaq promitishqan mözu wanuykuptin virgen jipash lütu röpata jatikurkur waqashqanno iktsuypa iktsur waqapäkuy.

 9 Cürakunapis waqarkaykan tsaki mikuy ofrendata ni vïnutapis TAYTA DIOSPA templunman pipis manana apaptinmi.

10 Trïgupis manami kannatsu.

Üvakunapis tsakishqanami.

Olïvu yörakunapis ushakashqanami.

Lapan chakrakunachöpis polvulanami sharkuykan.

11 Chakracho aruqkuna, üvata cosechaqkuna, makikita choqpakurkur waqapäkuy.

Trïgutapis cebädatapis manakaqlapaqmi murupäkushqanki.

12 Üva yörakunapis tsakikäkushqanami.

Hïguskunapis ushakashqanami.

Granädakunapis, palmërakunapis, manzänapa yörankunapis y lapan plantakunapis tsakikäkushqanami.

Tsaymi runakuna pasaypa mantsakashqa karkaykan.*

13 Tayta Diosta *altarcho sirviq cürakuna, qachqa röpata jatikurkur waqapäkuy.

Tsaki mikuypis ni vïnupis Tayta Diosnintsipa wayinman apamunanpaq manami kannatsu.

14 Mayor runakunata y pampa runakunata Tayta Diosnintsipa wayinman juntakänanpaq qayatsipäkuy.

TAYTA DIOSTA manakur lapayki ayunapäkuy.

15 ¡TAYTA DIOS juzganan junaq chayaykämunnami!

Tsay junaq chayamuptin ¡imanöraq runa nakaykulanqa!

Tsay junaqmi lapanpaq munayniyuq Tayta Dios tsaytsika runakunata ushakätsinqa.*

16 Mikuynintsi ushakaptin pasaypa muchuychönami kaykantsi.

Tsaymi Tayta Diosnintsipa templunman aywarpis mana kushikuntsinatsu.

17 Murushqantsi trïgupis manami winamushqatsu.

Mikuy pirwakuna wayintsikunachöpis wayralami tumaykan.

18 Qewata maychöpis mana tarirmi wäkakunapis pasaypa kuyapaypaq waqarkaykan.

Tsaynölami uyshakunapis cabrakunapis wanur ushakarkaykan.

19 ¡TAYTA DIOS, yanapaykalämay!

Jirkacho qewatapis y munti yörakunatapis ninami rupar ushashqa.

20 Raqrapa aywaq yakupis tsakishqami kaykan.

Chunyaq jirkacho qewakunatapis ninami ushashqa.

Tsaymi jirka uywakunapis waqapaykäshunki.*