2 Crónicas
5 TAYTA DIOSPA templunta ruratsiyta Salomón usharkurnami templupa manëjunkunata tsayman churananpaq apatsirqan.* Tsay manëjukunataqa Salomón ruratsirqan TAYTA DIOSPAQ taytan David churashqan qoripita y qellaypitami.
Babulta templuman apapäkushqan
2 Tsaypitanami Salomónqa Jerusalénman qayatsirqan lapan Israel mayor runakunata, trïbukunapa mandaqnin runakunata y Israel aylukunacho mas respitädu runakunatapis. Paykunata qayatsirqan TAYTA DIOSPA *Pactu Babulninta *Davidpa Markanpita templuman apapäkunanpaqmi.* Davidpa Markanpa jukaq jutinmi kaykan *Sión. 3 Qanchis kaq killacho jatun fiestata ruraykashqan junaqmi* tsay qayatsishqan runakunawan Salomón juntakarqan.
4 Lapan mayor runakuna juntakaykuptinnami *levitakuna babulta umrukurkur templuman apapäkurqan. 5 Paykunawanmi cürakunapis tsay babulta, Tinkuna Tolduta y manëjunkunatapis apapäkurqan.
6 Templuman chayaykatsirmi babulpa nawpanman rey Salomónqa lapan Israel runakunawan juntakarqan. Tsaychömi Tayta Diosta adorashpan yupaytapis mana atipaypaq tsaytsika uyshakunata, cabrakunata y törukunata pishtarkur *altarcho rupatsirqan.
7 Nirkurnami TAYTA DIOSPA Pactu Babulninta cürakuna churarqan Lugar Santïsimucho ishkay *querubinkunapa älankuna rurinman. 8 Tsay querubinkunapa älankunami babul jananpa mashtararqan. Tsaynöpami babul y wintukunan qerukunapis querubinkunapa älankuna rurincho karqan. 9 Wintukunan qerukunaqa largu karmi Lugar Santupita rikakarqan. Alarpitami itsanqa mana rikakarqannatsu. Tsaynölami kananyaqpis kaykan. 10 Tsay babulchöqa Horebcho Moisés churashqan ishkay läja rumikunalami winararqan.* Tsay läjakunachömi qelqararqan Israel runakuna Egiptupita yarqamushqan witsan paykunawan TAYTA DIOS *pactuta rurashqan.
11 Lugar Santïsimuman babulta churarkurmi cürakuna yarqukurqan. Lapanpis tsay cürakunaqa mayqan turnucho töcananpaq kaptinpis purificakushqami karkaykarqan. 12 Leví trïbu cantaq runakunami altarman inti jeqamunan kaq nawpancho ichirpaykarqan lïnupita rurashqa röpan jatishqa y platïllunkuna, *salteriunkuna, arpankuna aptashqa. Paykunami karqan Asaf, Hemán, Jedutún, tsurinkuna y aylunkuna. Paykunawanmi karkaykarqan *cornëta tukaq pachak ishkay chunka (120) cürakunapis.
13 Tsaymi cornëtata, platïllukunata y wakin instrumentukunatapis tukaptin cantaqkuna TAYTA DIOSTA agradëcikur alabapäkurqan kayno nir:
“¡Tayta Diosqa alilata ruraqmi!
¡Kuyapäkuyninqa manami imaypis ushakantsu!”*
Tsayno nir alabarkaykaptinmi TAYTA DIOSPA templunta pukutay tsapakurkurqan. 14 Pukutay tsayno tsapakurkuptinmi y kikin TAYTA DIOS tsay pukutaycho kaptinmi cürakunaqa ima ruraytapis mana kamäpakur yarqukärirqan.*