Salmos
Kamashqanwan y palabranwan Tayta Dios musyatsimantsi
(1) Cantaqkunapa mandaqninpaqmi. Kay salmuqa David qelqashqanmi.
19 (2) Jana patsami wilakuykan Tayta Dios munayniyuq kashqanta.
Azulyaraykaqmi musyatsimantsi Tayta Dios lapanta kamashqanta.
2 (3) Junaqpapis waran waranmi musyatsimantsi.
Tsakaypapis cada paqasmi tantiyatsimantsi.
3 (4) Manami runa rimashqannötsu riman ni parlashqanpis manami mayakantsu.
4 (5) Tsayno kaptinpis wilakuyninqa maytsaychömi musyakaykan.*
Palabrankunaqa patsa kuchunyaqmi chayaykan.
Inti täkunantapis Tayta Diosmi kamashqa.
5 (6) Tsaypitami inti kushishqa yarqamun tsayraq casarashqa mözuno.
Ali cörriq mözunömi kushishqa aywan.
6 (7) Jana patsapa jukaq kuchunpita jeqamur jukaq kuchunpanami jeqan.
Shanayninpitaqa manami imapis qeshpintsu.
7 (8) TAYTA DIOSPA leyninkunaqa kikin Diospita karmi imaypis mushuq kawayman churamantsi.
TAYTA DIOSPA palabranqa yärakuypaq karmi yachayta qomantsi.
8 (9) TAYTA DIOSPA yachatsikuyninkunaqa ali karmi shonquntsita kushikatsin.
TAYTA DIOSPA mandamientunkunaqa *püru karmi* shakyätsimantsi.
9 (10) TAYTA DIOSTA *mantsakunantsipaq tantiyatsimashqantsikunaqa limpiu karmi imaypis mana ushakantsu.
TAYTA DIOS nishqankunaqa rasun kaq karmi pay munashqanno kaykan.
10 (11) Alinnin qoripitapis mas munapaypaqmi kaykan.
Abëjapa mishkinpitapis masmi mishkin.*
11 (12) Leynikikunawanmi sirviqnikita tantiyatsinki jutsata mana rurananpaq.
Nishqaykikunata cumplirqa bendicionnikitami chaskinqa.
12 (13) ¿Piraq tantiyanman imanir jutsata rurashqantapis?
Pakaylapa jutsata rurashqäpita perdonaykalämay.
13 (14) Musyaykar jutsata mana ruranäpaq tsapaykalämay.
Shonqü munashqanta mana ruranäpaq yanapaykalämay.
Tsaynöpami munashqaykino kawashpä imatapis contraykita mana rurashaqtsu.
14 (15) Shimï rimashqankunapis y shonqü yarpashqankunapis munashqaykino kaykulätsun, TAYTA DIOS.
Qammi tsapämaqnï y salvamaqnï kaykanki.