Éxodo
Chunka mandamientukuna
20 Tayta Diosmi kayno nirqan:
2 “Noqaqa TAYTA DIOSNIKIMI kaykä. Egiptucho ashmay kashqaykipitami jorqamushqä.
3 “Juk dioskunamanqa ama yärakunkitsu.
4 “Ima ïdulutapis ama rurankitsu jana patsacho kaykaq niraqta, kay patsacho kaykaq niraqta ni lamar rurincho kaykaq niraqtapis. 5 Tsaykunamanqa ama qonqurpakunkitsu ni adorankitsu.* Noqalami [munayniyuq] TAYTA DIOSNIKI kaykä. Noqalata adoramänaykitami munä. Tsaymi mana cäsukamar ïdulukunata adoraqkunataqa castigashaq kikinta, tsurinta, wilkanta y wilkanpa tsurintapis. 6 Noqata kuyamar mandamientükunata cumpliqkunatami itsanqa waranqa (1,000) *generación kashqanyaq kuyapar yanapashaq.*
7 “TAYTA DIOSNIKIPA jutinta lutalaqa ama joqarinkitsu. Jutinta lutala joqariq kaqtaqa castiganqami.
8 “Jamay junaq *sagrädu kashqanta ama qonqankitsu.* 9 Semänacho soqta junaq arushpayki lapan ruranaykipaq kaqkunata ruranki. 10 Qanchis kaq junaqchöqa TAYTA DIOSNIKITA adorashpayki ama arunkitsu.* Tsaynöpis ama arutsinkitsu tsurikikunata olqutapis warmitapis, ashmaynikikunata olqutapis warmitapis, uywaykikunata ni nacionnikicho jäpa runakunatapis. 11 TAYTA DIOSPIS jana patsata, kay patsata, lamarta y lapan imaykatapis soqta junaq kamarkurmi qanchis kaq junaqcho jamarqan. Tsayno jamashqanpitami tsay junaqta bendicionninta churashpan sagrädu junaq kananpaq nirqan.*
12 “Mamaykita y taytaykita respitanki.* Tsaynöpami TAYTA DIOSNIKI qoykushunaykipaq kaq nacioncho atska wata kawankipaq.*
13 “Runa mayikita ama wanutsinkitsu.*
14 “Majaykita ama jarukunkitsu.*
15 “Ama suwakunkitsu.*
16 “Manakaqtaqa pitapis ama tumpankitsu.*
17 “Runa mayikipa wayinta ama munapankitsu. Tsaynöpis ama munapankitsu warminta, olqu ashmayninta, warmi ashmayninta, törunta, bürrunta ni imaykankunatapis”.*
Israel runakuna mantsakushqan
18 Tsay hörami Israel runakuna mayarqan räyu bunrurushqanta y *cornëtata tukamushqantapis. Tsaynöpis rikarqan elqümushqanta y jirka qoshtamushqanta. Tsaymi fiyupa mantsakärishpan karulapita rikarparqan. 19 Tsaychömi Moisésta kayno nipäkurqan: “Qamla ayway Tayta Dioswan parlamunaykipaq. Tayta Dios nishushqaykita wilamaptiki lapantami cäsukärishaq. Noqakunata Tayta Dios parlapämaptinqa wanupäkushaqchari”.*
20 Tsawraqa Moisés kayno nirqan: “Ama *mantsakäriytsu. Tayta Dios shamushqa munayniyuq kashqanta tantiyar jutsata mana rurapäkunaykipaqmi”.
21 Tsaypitanami runakuna karulapita rikarpaykaptin Tayta Dios kaykashqan yanawyaykaq pukutay rurinman Moisés witsarqan.
Altarta imano rurananpaqpis tantiyatsishqan
22 Tsaypitanami Moisésta TAYTA DIOS kayno nirqan: “Israel runakunata kayno niy: ‘Tayta Diosmi nin: Jana patsapita parlamushqätami qamkuna mayashqanki. 23 Adorapäkunaykipaq ima diostapis qoripita ni qellaypita ama rurapäkunkitsu.
24 “ ‘*Altarta noqapaq alpapita rurapäkuy. Tsaycho rupatsina sacrificiuta y jawka kawakuy sacrificiuta rupatsipäkunki uyshata karpis, cabrata karpis, wäkata karpis o töruta karpis. Maycho adoramänaykipaq nishqä kaqcho tsayno ruraptikimi noqa shamur bendicionnïta qoshaykipaq. 25 Noqata adoramänaykipaq altarta perqarqa laqläni rumikunalawan perqapäkunki.* Laqlashqa rumiwan perqapäkuptikiqa manami alitsu kanqa. 26 Tsaynöpis ama rurapäkunkitsu grädayuqtaqa. Grädayuqta rurarkur witsaptiki penqaynikimi rikakanqa’ ”.