Gálatas
Galacia provinciacho taq yärakuq mayinkunaman apóstol Pablo cartata apatsishqan
Carta qalaykunan
1 Galacia provinciacho kaykaq wawqi panikuna:
Noqa Pablumi kay cartata qamkunapaq apaykätsimü. *Apóstol kanäpaq manami runakunatsu churamashqa, sinöqa Jesucristo y payta kawaritsimuq Tayta Diosmi.
Kaycho kaykaq wawqi panikunami qamkunapaq salüdunta apatsikamun. 2 - 3 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki. 4 Papänintsi Tayta Dios munashqannömi kay patsacho jutsa ruraypita salvamänantsipaq Jesucristo wanurqan.* 5 Tayta Dios imayyaqpis alabashqa kaykulätsun. Amén.
Wawqi panikuna lutan yachatsikuyta chaskikushqan
6 Musyapäkushqaykinöpis Jesucristupa kuyakuyninwanmi Tayta Dios qayashushqanki. Tsayta musyaykarqa ¿imanirtaq lutan yachatsikuyta chaskikur manaraqpis aykäta Tayta Diospita witikärishqanki? ¡Tsaytaqa manami imano tantiyakuytapis atipätsu! 7 Jesucristupa wilakuyninpita mas juk wilakuyqa manami salvakunantsipaq kantsu. Tsayno kaptinpis wakin runakuna Jesucristupa wilakuyninman yaparkurmi lutankunata yacharkaykätsishunki.
8 Qamkunata yachatsishqäta manakaqman churar lutanta pipis yachatsiptinqa infiernuman Tayta Dios qaykutsun. Noqakunatapis lutanta yachatsiptïqa infiernuman qaykamätsun. Jana patsapita shamuq *angiltapis lutanta yachatsiptinqa infiernuman qaykutsun. 9 Yapaypis kaynömi nï: Pipis Jesucristupa wilakuynin jananman lutan yachatsikuyta yapaq kaqtaqa infiernuman qaykutsun.
10 Tsayno nishpä ¿runakuna alabamänantatsuraq ashiykä? ¿Runakunapita ali rikashqa kaytatsuraq munaykä? Noqaqa manami runakuna alabamänanpaqtsu yachaykätsï, sinöqa Tayta Dios: “Alitami rurashqanki” nimänanpaqmi.* Runakuna alabamänan rayku yachatsirqa manami Jesucristupa sirviqnintsu käman.
Apostolnin kananpaq Pabluta Jesucristo churashqan
11 Wawqi panikuna, shumaq tantiyakäriy. Ali wilakuyta wilakushqäqa manami runakunapa yarpaynintsu kaykan. 12 Tsaynöpis manami tsay wilakuyta runatsu yachatsimashqa, sinöqa kikin Jesucristumi revelacioncho tantiyatsimashqa.
13 Qamkuna musyankimi nawpata Israel runakunapa costumbrinkunata cumplir imano kashqätapis. Tsay witsanqa Jesucristuta chaskikuqkunapa contran sharkur qatikacharmi lapanta ushakätsiyta munarqä.* 14 Wakin Israel mayïkunapitapis masmi costumbrïkunata välitsirqä.* Lapan winay mayïkunapitapis masraqmi Moisés qelqashqankunata cumplirqä.
15 Imano kaptinpis manaraq yuriptïmi Tayta Dios kuyamashpan payta sirvinäpaq akramashqa.* 16 Nirkurmi Jesucristuta chaskikunäpaq shumaq tantiyarkatsimar* mana Israel runakunaman wilakuyninta apanäpaq kachamashqa.
Tsayno kachamaptinmi pitapis tapukurqänatsu wilakuyninta tantiyatsimänanpaq. 17 Tsaynöpis manami noqapita mas punta kaq *apostolkunawan parlanäpaqpis Jerusalénman aywarqätsu. Tsaypa trukanqa Arabia partipami aywakurqä. Tsaypitanami Damasco markaman yapay kutirqä. 18 Tsaypita kimsa watataraqmi Pedruwan parlaq Jerusalénman aywarqä.* Tsaychömi chunka pitsqa junaq paywan qoyämurqä. 19 Tsaychömi reqirqä Señor Jesucristupa wawqin Santiaguta. Itsanqa wakin apostolkunataqa manami tarirqätsu. 20 Tayta Dios musyanmi mana lulakuykashqäta.
21 Tsaypitanami Siria y Cilicia provinciakunapa aywarqä.* 22 Judea provinciacho* wawqi panikuna manami mayqanpis reqimarqanraqtsu. 23 Paykunaqa kayno niqtashi mayapäkurqan: “Qatikachämaqnintsi runami kananqa Jesucristupa wilakuyninta wilakur puriykan”.
24 Tsayno niqta mayarshi Tayta Diosta alabapäkurqan.