Hechos
Bernabéta y Sauluta Espíritu Santu akrashqan
13 Antioquía *iglesiachömi karqan profëtakuna y yachatsikuqkuna. Paykunami karqan Bernabé, Yana Runa nishqan Simón, Cirenipita kaq Lucio, Manaén y Saulo. Manaénta y rey Herodestaqa wamra kaptin tsay wayilachömi ashmarqan. 2 Juk junaqmi Tayta Diosman yärakuqkuna ayunar alabarkaykaptin Espíritu Santu kayno nirqan: “Bernabéta y Sauluta churapäkuy wilakuynïta wilakur puripäkunanpaq. Tsaypaqmi paykunata qayashqä”.
3 Ayunarkurnami Bernabépa y Saulupa umanman makinkunata churaykur Tayta Diosta manakärirqan. Nirkurmi paykunata despacharqan.
Chipricho wilakushqan
4 Espíritu Santu tsayno kachaptinmi Bernabé y Saulo chayarqan Seleucia markaman. Tsaypitanami *büquiman witsarkur Chipre islaman aywapäkurqan. 5 Salamina markaman chayaykurmi *sinagögakunacho Tayta Diospa wilakuyninta wilakärirqan. Marcos nishqan Juanpis paykunata yanaparmi purirqan.
6 Chipripa pasar wilakurmi Pafos markaman chayashpan Barjesús jutiyuq Israel runata taripäkurqan. Payqa profëta tukuq brüjumi karqan. 7 Tsay brüjumi Chipripa mandaqnin Sergio Pauluta yanapar purirqan. Sergio Pauluqa ali yarpayniyuq runami karqan. Tayta Diospa wilakuyninta mayayta munarmi Bernabéta y Sauluta qayatsirqan. 8 Brüjunami paykunapa contran sharkur Sergio Pauluta micharqan wilakushqanta mana chaskinanpaq. Barjesústaqa brüju kaptinmi Elimas* nipäkuq.
9 Tsayno michaptinmi Sauluqa rabyarqan. (Saulupa jukaq jutinmi karqan Pablo.) Tsaymi rikärir Espíritu Santupa munayninwan 10 kayno nirqan: “¡Diablu munashqanta rurarmi qamqa Tayta Diospa contran kaykanki! ¿Imayyaqtaq runakunata lulapar Tayta Diospa wilakuqnin tukunki? 11 Tsayno kashqaykipitami Tayta Diospa castïgunwan qapra rikakur juk tiempuyaq atsikyaq patsata mana rikankipaqtsu”.
Tsayno niptinmi jinan höra qapra rikakurqan. Maypapis aywayta mana kamäpakurmi runakunata ruwakurqan janchananpaq. 12 Qaprayashqanta rikaykur y Diospa wilakuynin ali kashqanta tantiyakurmi Sergio Paulo criyirqan.
Pisidiacho kaq Antioquíacho wilakushqan
13 Tsaypitanami *büquiman witsarkur Pafos markapita Pablo yanapaqninkunawan aywapäkurqan Panfiliacho kaykaq Perge markaman. Tsaycho paykunata kachariykurmi Marcos nishqan Juan Jerusalénman kutikurqan. 14 Perge markapita aywarmi Pablo y Bernabé chayapäkurqan Pisidiacho kaq Antioquía markaman. Jamay junaq kaptinnami *sinagögaman aywapäkurqan. 15 Leykunata y profëtakuna qelqashqanta liyiyta usharkuptinmi sinagögacho mandaqkuna Pablo y Bernabé jamaraykashqanman juk runata kachapäkurqan kayno ninanpaq: “Wawqikuna, imalapis yachatsimänaykipaq kaptinqa jukla yachatsipäkamay”.
16 Tsawraqa Pablo ichirkur runakuna upälakunanpaq makinta joqarishpan kayno nirqan: “Israel runakuna y Tayta Diosta *mantsakuq mana Israel runakuna, yachatsishqäta shumaq mayapäkamay. 17 Adorashqantsi Tayta Diosshi unay ayluntsikunata akraykur Egiptucho jäpa kaykaptinpis jatun nación rikakunanpaq yanaparqan.* Nirkurnashi milagrukunata rurashpan Egiptupita jorqamurqan.* 18 Chusku chunka (40) watano chunyaq jirkapa purir mana cäsukäriptinpis pacienciakurqanshi.* 19 Tsaypita *Canaánman chayaykatsirnashi qanchis nacionkunata* ushakaykatsir herenciankuna qoykurqan.* 20 Egiptucho kashqanpita Canaáncho herenciankunata chaskishqanyaq chusku pachak pitsqa chunka (450) watanöshi pasarqan.
“Canaánchönashi profëta Samuel* kawashqan witsanyaq Tayta Dios juezkunata churaparqan mandananpaq.* 21 Tsaypitanashi mandaqnin rey kananta runakuna manakuptin* Benjamín trïbu Cispa tsurin Saúlta churaparqan.* Payshi chusku chunka (40) wata rey karqan. 22 Tsaypitanashi Saúlta jorqurir Davidtana churarqan rey kananpaq. Paypaqshi Tayta Dios kayno nirqan: ‘Isaípa tsurin Davidqa shonqüpaqnömi kaykan. Payqa lapan nishqäkunatami cäsukunqa’.*
23 “Tsaypitanami Tayta Dios promitishqannöla rey Davidpa aylunpita salvamaqnintsi Jesús Israelcho yurirqan. 24 Manaraq Jesús wilakuptinmi Israel runakunata Bautizaq Juan wilaparqan jutsankunata kacharir bautizakärinanpaq.* 25 Tsaypita wanunanpaq walkalana pishiykaptinmi Juan kayno nirqan: ‘¿Pï kashqätataq yarpapäkunki? Manami noqatsu Cristo kä. Cristuqa qepätaraqmi shamunqa.* Noqaqa manami lanqi watunta paskapänaläpaqpis merecïtsu’.*
26 “Abrahampita miraq Israel wawqikuna y Tayta Diosta mantsakuq mana Israel runakuna, noqantsimanmi salvakunantsipaq ali wilakuy chayamushqa. 27 Jerusaléncho taq runakunaqa y autoridäninkunaqa profëtakuna qelqashqanta sinagögacho cada jamay junaq liyirpis manami tantiyapäkurqantsu Jesúspita qelqarashqanta. Tsaymi profëtakuna qelqashqanta cumplir Jesústa wanutsipäkurqan. 28 Jutsaynaq kaykaptinpis payta wanutsinanpaqmi Pilatuta manakärirqan.* 29 Profëtakuna qelqashqannölami lapanpis pasarqan. Wanurkuptinnami cruzpita jorqurir pampapäkurqan.* 30 Wanutsipäkuptinpis Tayta Diosmi kawaritsimushqa. 31 Kawarirkamurmi Galileapita Jerusalénman* paywan aywaq discïpulunkunata atska kuti yuriparqan. Paykunami Jesúspita kanan wilakurkaykan.
32 “Tsaynölami noqakunapis Tayta Diospa wilakuyninta qamkunata wilaparkaykä. Unay ayluntsikunata promitishqantami 33 Tayta Dios cumplishqa. Tsayno cumplirqan Jesucristuta kawaritsimurmi. Ishkay kaq salmuchöpis Jesucristupita kaynömi qelqaraykan:
“ ‘Qamqa tsurïmi kanki.
Kanan junaqpitaqa taytaykinami kaykä’.*
34 Jesucristo kawarimur imaypis manana wanunanpaq kashqantaqa Tayta Dios kaynömi niykan:
‘Davidta promitishqä *santu bendicionkunata qamtami qoykushayki.
Tsay promitishqäta imayyaqpis cumplishaqmi’.*
35 Mas juk salmuchöpis kaynömi qelqaraykan:
‘Santu sirviqniki kaptïmi sepultüracho ayä ismunantapis mana munankipaqtsu’.*
36 “Manami kikinpaqtsu David tsayno qelqarqan. Davidqa Tayta Dios munashqanta cumplirkur wanuptinmi unay aylunkuna pamparashqancho paypapis ayan ushakarqan. 37 Jesústami itsanqa Tayta Dios kawaritsimushqa. Paypa ayanqa sepultüracho manami ismur ushakashqatsu.
38 “Wawqikuna, nishqäta shumaq tantiyakäriy. Jesucristo kayninpami jutsantsikunata Tayta Dios perdonamantsi. 39 Lapantapis payman yärakuq kaqtaqa jutsaynaqtanami Tayta Dios chaskin. *Moisés qelqashqan leykunata cumplishqanpitaqa manami pipis salvakuntsu. 40 Cuidädu profëtakuna qelqashqancho nishqanno qamkunatapis pasashunkiman. 41 Paykuna qelqashqanqa kaynömi niykan:
“ ‘Mana cäsukamaqkuna, pasaypa mantsakäriy.
Pasaypa mantsakuypaq kaqkunata ruranäpaqnami kaykä.
Imano ruranäpaq kashqanta wilapäshuptikipis manami criyipäkunkipaqtsu’ ”.*
42 Sinagögapita Pablo y Bernabé yarquptinmi [mana Israel runakuna] ruwapäkurqan jukaq jamay junaqpis yapay yachatsinanpaq. 43 Pabluwan y Bernabéwanmi Israel runakuna y Diosta cäsukuq mana Israel runakunapis atskaq aywapäkurqan. Paykunatami Pablo shakyätsirqan kuyapäkuq Tayta Diosman imaypis yärakärinanpaq.
Mana Israel runakunatana yachatsishqan
44 Jukaq jamay junaqnami tsay markacho cäsi lapan runakuna Diospa wilakuyninta mayayta munar *sinagögaman juntakarqan. 45 Tsaytsika runakunata rikaykurmi wakin Israel runakuna chikishpan Pablo parlashqanta manakaqman churapäkurqan.
46 Tsawraqa Pablo y Bernabé mana mantsakuypa kayno nirqan: “Israel runakuna kaptikimi Tayta Diospa wilakuyninta qamkunata puntata wilapashqä. Tsayno wilapaptïpis *mana ushakaq kawayta chaskikuyta manami munapäkunkitsu. Mana chaskikäriptikimi mana Israel runakunatana wilapäshaq. 47 Paykunata wilapänantsipaqmi Tayta Dios kayno nishqa:
“ ‘Maytsay nacionkunapaqpis atski kanaykipaqmi churashqä.
Tsaynöpami maytsaychöpis runakuna salvakärinqa’ ”.*
48 Tsayno parlashqanta mayaykurmi mana Israel runakuna kushikur Tayta Diosta alabapäkurqan. Tsaynöpami mana ushakaq kawayta tarinanpaq Tayta Dios akrashqankuna lapanpis Jesucristuman yärakärirqan.
49 Tsawraqa Tayta Diospa wilakuyninta Pablo y Bernabé markan markan wilakärirqan. 50 Tsayno wilakäriptinmi Tayta Diosta cäsukuq reqishqa warmikunata y respitashqa runakunata Israel runakuna shimita qorqan Pablupa y Bernabépa contran sharkapäkunanpaq. Contran sharkur tsay markakunapita qarquptinmi 51 chakinpita polvuta tapshiriykur* Iconio markapana aywakärirqan. 52 Jesucristupa discïpulunkunaqa* Espíritu Santupa munaynincho kashpanmi kushishqa kawapäkurqan.