2 Juan
Apóstol Juanpa ishkay kaq cartan
Carta qalaykunan
1 Tayta Dios akrashqan warmi y wawankuna:*
*Mayor wawqi karmi kay cartata apaykätsimü. Qamkunata lapan shonqüwanmi kuyä. Manami noqalatsu kuyä, sinöqa Tayta Diospa wilakuyninta wakin chaskikuqkunapis kuyashunkimi. 2 Qamkunata kuyapäkü Tayta Diospa wilakuyninta noqakunano chaskikushqa kaptikimi. Paypa wilakuynintaqa imaypis manami qonqashuntsu. 3 Tayta Dios y Tsurin Jesucristo kuyapäshushpayki ali kawapäkunaykipaq yanapaykuläshunki. Tsaynöpis ali wilakuynin nishqanno kawar kuyanakärinaykipaq yanapaykuläshunki.
Kuyanakur kawanantsipaq nishqan
4 Wakin wamraykikuna Tayta Diospa mandamientun nishqanno kawarkaykashqanta rikarmi fiyupa kushikushqä.* 5 Tsaymi kanan qamta ruwakü jukniki juknikipis kuyanakärinaykipaq. Kay mandamientuqa manami mushuqtsu, sinöqa unaypitanami musyashqantsi.* 6 Rasunpa kuyakuq karqa Tayta Diospa mandamientunkunata cäsukushun. Paypa mandamientunqa nimantsi kuyanakur kawanantsipaqmi. Kuyanakunantsipaq kashqantaqa unaypitanami musyashqantsi.*
Lutan yachatsikuqkuna puriykashqan
7 Kay patsacho atskaqmi lutan yachatsikuqkuna purirkaykan. Paykunaqa nirkaykan Jesucristo rasunpa runa mana kashqantami. Runakunata tsayno criyitsirmi *anticristo karkaykan.* 8 Cuidädu tsay runakuna qamkunatapis criyiykätsishunkiman. Criyitsishuptikiqa Jesucristupa wilakuyninta chaskikärishqaykipis manakaqpaqmi kanqa. Paykunata mana chaskiparmi itsanqa gloriacho premiuta chaskipäkunkipaq.
9 Pipis Jesucristupa wilakuyninta kacharir lutan yachatsikuyta chaskiparqa manami rasunpatsu Tayta Diosta chaskikushqa. Jesucristupa wilakuyninta mana kachariqkunami itsanqa Jesucristuta y Tayta Diostapis rasunpa chaskikushqa.*
10 Tsayno kaykaptinqa lutan yachatsikuqkunata chayamuptin ama chaskipaytsu ni wayikimanpis patsatsiytsu. 11 Lutan yachatsikuqkunata chaskipaq kaqqa paykunanömi lutanta rurarkaykan.
Carta ushanan
12 Yätsinäpaq maspis kaykanraqmi. Itsanqa cartalacho manami qelqamushaqtsu. Kikï shamurnami mastaqa tantiyatsishayki.* Tsaychömi shumaq kushikushun.
13 Tayta Dios akrashqan nanaykipa wawankunapis* salüdunkunata apatsikamunmi. [Amén.]