Job
40 Tsaynöpis Jobta TAYTA DIOS kaynömi nirqan:
2 “Tantiyakuq runaqa ¿noqawan churakanmantsuraq?
Noqawan rimanakuyta munarqa mä nimay”.*
3 Tsawraqa TAYTA DIOSTA Job kayno nirqan:
4 “Imatapis mana musyaq karmi rimayta kamäpakütsu.
Tsaymi upälakushpä makïwan shimïta tsapakü.
5 Parlashqa karpis mastaqa mananami parlakushaqnatsu.
Mas juk yarpaytaqa manami rimakushaqnatsu”.
6 Huracán wayra rurinpitami Jobta TAYTA DIOS kayno nimurqan:
7 “Rasunpa ali chölu karqa tapushqäta contestamänaykipaq shumaq kamarikuy.*
8 ¿Imanirtaq mana ali rurashqäta niykanki?*
¿Jutsaynaq kashqaykita yarparku tsayno nimanki?
9 ¿Noqanöku qamqa kalpayuq kaykanki?
¿Räyunöraqku rimashqaykipis mayakan?
10 Rasunpa tsayno karqa mä munaynikicho kaqkunata noqano manday.
Noqano alabashqa kanaykipaq mä corönaykita jatikuy.
11 Rabyashqa karqa mä imatapis ruray.
Runa tukuqkunata mä castigay.
12 Paykunata mä penqayman churay.
Fiyu runakunatapis mä ushakätsiy.
13 Tsay runakunata wanurkatsir mä pampaykuy.
Ali chölu karqa mä lapanta tsakayman wichqaykuy.
14 Tsayno ruraptikiqa munayniyuq kashqaykipitami felicitashayki.
15 “Kananqa rikay behemotta.*
Qamta kamashqänölami paytapis kamashqä.
Tsay uywaqa törunömi qewata mikun.
16 Waqtancho y rikrankunacho imano kalpan kashqantapis tantiyakuy.
17 Chupanpis kuyun cedru yöra kuyuqnömi.
Anku ankunkunapis reyätanöraqmi kaykan.
18 Tulunkunapis broncinöraqmi kaykan.
Chankankunapis fiërrunöraqmi kaykan.
19 “Paytami lapan uywapitapis mas puntata kamarqä.
Kamashqa karmi munayniyuq kaykä ushakätsinäpaqpis.
20 Behemot mikunanpaqmi jirkakunachöpis qewa winamun.
Tsaychömi jirka uywakunapis pañapäkun.
21 Copösu yöra sikinchömi punurpan.
Ututukuna kashqan mituchömi pakarpäkun.
22 Yörakunami rämanwan lantupan.
Mayu kuchuncho saucikunami jiruruypa lantupan.
23 Mayu bunyaypa bunyar aywaptinpis manami mantsakuntsu.
Senqanyaq yaku tsapaptinpis manami imapis qokuntsu.
24 Rikchaykaptinqa ¿piraq tsarinman?
¿Piraq senqanta uchkurkur argöllata jatipanman?