Salmos
Tayta Dios yanapakuq kashqan
Kay salmuqa Jerusalénman aywaqkuna alabananpaqmi kaykan.
121 Jirkakunapa rikachakurmi kayno yarpachakü:
“¿Maypitaraq yanapamaqnï shamunqa?”
2 Noqapa yanapamaqnïqa kay patsata y jana patsata kamaq TAYTA DIOSMI kaykan.*
3 Paymi tsapämantsi imapis mana pasamänantsipaq.
Cuidamaqnintsi karmi imaypis mana pununtsu.
4 Israel runakunapa cuidaqninqa imaypis rikchashqalami kaykan.
5 TAYTA DIOSMI imapitapis cuidamantsi.
Paymi ima peligrupitapis tsapämantsi.
Yanapamänantsipaq noqantsiwanmi imaypis kaykan.
6 Tsaymi intipis mana rupamäshuntsu.
Killapis manami serinamäshuntsu.
7 TAYTA DIOSMI tsapämantsi imapis mana pasamänantsipaq.
8 TAYTA DIOSMI maypa aywaptintsipis kananpis y imaypis rikaykämantsi.