Salmos
Tayta Diosta alabashqan
147 ¡Aleluya!
Kushikuypaqmi kaykan salmukunata cantar Tayta Diosnintsita alabashqantsi.
Payta alabarqa kushikuntsimi.
2 TAYTA DIOSMI Jerusalénta yapay sharkaykätsin.
Israel runakunatapis maytsaypitami shuntaykämun.
3 Lakishqa kaykaqkunatapis paymi shakyätsin.
Qeriyuq kaptinpis jampinmi.
4 Qoylarkuna ayka kashqantapis musyanmi.
Lapan qoylarkunatapis jutinpami reqin.
5 Tayta Diosqa pasaypa munayniyuqmi kaykan.
Paypa yachayninqa mana ushakaqmi.
6 Waktsakunatapis TAYTA DIOSMI yanapan.
Fiyu runakunatanami itsanqa penqayman churan.
7 TAYTA DIOSTA agradëcikushpantsi alabashun.
Arpata tukapalanpa salmukunata cantar Tayta Diosnintsita alabashun.
8 Paymi ciëlutapis pukutaywan tsapan.
Paymi tamyatapis tamyatsimun.
Paymi qewakunatapis jirkakunacho winatsimun.
9 Paymi uywakuna mikunanpaqpis qewata winatsimun.
Pushapa ankakuna yarqanar waqaptinpis mikuytami taritsin.
10 Manami guërrapaq cawallukunata rikartsu TAYTA DIOS kushikun.
Manami pelyayta yachaq soldädukunata rikartsu kushikun.
11 Tsaypa trukanqa kushikun payta *mantsakuptintsimi.
Tsaynöpis kushikun kuyakuq kashqanman yärakuptintsimi.
12 ¡Jerusaléncho taqkuna, TAYTA DIOSTA alabapäkuy!
¡*Sióncho taqkuna, Tayta Diosta alabapäkuy!
13 Paymi markaykipa punkunkunata shumaq trancan.
Markaykicho taqkunapaqmi bendicionninta churamun.
14 Lindëruykita respitatsiptinmi jawkala tarkaykanki.
Mikuyniki atska kananpaqmi bendicionninta churamun.
15 Tayta Diosmi kay patsa imano kananpaqpis mandan.
Mandaptin jinan hörami cumplikan.
16 Paymi yoraq jakuta mashtaykuqnöraq rajutapis rajutsimun.
Qasapatapis uchpatanöraqmi warätsimun.
17 Tayta Diosmi rumitanöraq runtu tamyatapis tamyatsimun.
Tsaymi mana awantaypaq qasan.
18 Tayta Dios niptinmi tsururupis tsulun.
Paymi wayratapis wayrätsimun y yaku aywananpaqpis kamakätsin.*
19 Jacobpita miraqkunatami palabranta musyatsirqan.
Israel runakunatami estatütunkunata y nishqankunata musyatsirqan.*
20 Tsaynöqa wakin nacionkunata manami musyatsirqantsu.
Paykunaqa manami imaypis Tayta Dios nishqankunata musyashqatsu.
¡Aleluya!