Jueces
Israel runakunata Jefté salvashqan
11 Galaad particho taq juk ali chölu runapa jutinmi karqan Jefté.* Papäninpa jutinmi karqan Galaad. Mamannami karqan *wayrapakuq warmi. 2 Legïtimu warminchöpis Galaadpa tsurinkuna karqanmi. Paykuna winarkurmi wayinpita Jeftéta qarqurqan kayno nir: “Qamqa kaykanki papänïpa tsuripakuylanmi. Tsaymi qamtaqa papänïpa kaqtaqa ima herenciatapis mana rakipäshaykitsu”.
3 Wawqinkuna tsayno qarquptinmi Tob partiman Jefté aywakurqan. Tsaychömi asaltantikunawan juntakaykur suwakur purirqan.
4 Tsay witsanmi amonita runakuna Israel runakunata atacapäkurqan. 5 Tsaymi Galaad particho taq Israel mayor runakuna Tob partiman aywaykur Jeftéta 6 kayno nipäkurqan: “Amonita runakunawan pelyaptï mandamaqnï kanaykitami munapäkü, tayta”.
7 Tsayno niptinmi Jefté kayno nirqan: “Qamkunaqa ¿manaku chikimashpayki taytäpa wayinpita qarqamashqanki? Qarqaykämarqa ¿ima penqaynikiwantaq shapäkamunki yanapanäta munar?”
8 Tsawraqa Galaadpita aywaq mayor runakuna kayno nipäkurqan: “Runakuna atacamaptin ima ruraytapis mana kamäpakurmi qamman shapäkamushqä, tayta. Aywaykuläshun amonita runakunawan pelyäshimänaykipaq. Pelyäshimaptikiqa Galaad particho mandamaqnï kanaykipaqmi churapäkushaykipaq”.
9 Tsayno niptinmi Jefté kayno nirqan: “Amonita runakunata vincinäpaq TAYTA DIOS yanapamaptinqa ¿rasunpaku mandaqniki kanäpaq churamankipaq?”
10 Tsawraqa Galaadpita aywaq mayor runakuna kayno nipäkurqan: “Imatapis nimashqaykita rurapäkunäpaqmi TAYTA DIOS rikaykämaptintsi promitipäkü”.
11 Tsayno niptinmi paykunawan Jefté aywarqan. Galaadman chayaykuptinnami runakuna payta churapäkurqan mandaqnin kananpaq. Guërracho yanapananpaq Galaadcho nishqannölami Mizpaman aywaykur TAYTA DIOSPA nawpanchöpis Jefté nirqan.
12 Nirkurnami amonita runakunapa mandaqnin reyman kachakunata Jefté kacharqan. Chayaykurmi kayno nipäkurqan: “¿Imanirtaq nacionnïman yaykaykamur atacapäkamashqanki?”
13 Tsayno niptinmi amonita runakunapa mandaqnin rey kayno nirqan: “Egiptupita yarqakamurmi Arnón mayupita Jaboc mayuyaq y hasta Jordán mayuyaq nacionnïpita chakräkunata y markäkunata qamkuna qechumarqayki. Imapis manaraq kashqanyaq kutiykatsimay”.
14 Tsayno nishqanta wilaptinmi amonita runakunapa mandaqnin reyman kachakunata Jefté yapay kacharqan. 15 Chayaykurmi tsay kachakuna kayno nirqan: “Kaynömi Jefté niykan:
“ ‘Noqakunaqa manami moabita runakunapa ni amonita runakunapa nacionninpita mayqan partitapis qechushqätsu.* 16 Unay aylükunaqa Egiptupita yarqamur chunyaq jirkapa pasamurmi Puka Lamarman chayapäkamurqan. Tsaypita pasamurmi Cadesman chayapäkamurqan. 17 Tsayman chayaykamurmi Edom nacionpa mandaqnin reyta ruwakärirqan nacionninpa pasakärinanpaq. Tsayno ruwakäriptinpis pasamunanta manami munarqantsu.* Tsaynölami Moab nacionpa mandaqnin reytapis ruwakäriptin paypis mana munarqantsu nacionninpa pasamunanta. Tsaynöpami Cadeslacho patsakärirqan.
18 “ ‘Pasamunanta mana munaptinmi Edom* y Moab nacionkuna lindërun nawpalanpana chunyaq jirkapa tumapäkamurqan. Inti jeqamunan kaq lädupa aywar Arnón mayuman chayaykurmi campamentunta rurapäkurqan. Itsanqa manami moabita runakuna tashqanman tsimparqantsu.
19 “ ‘Tsaypitanami unay aylükunaqa kachakunata kacharqan amorreo runakunapa mandaqnin rey Sehónman. Paymi Hesbóncho tarqan. Chayaykurmi kayno nipäkurqan: “Aywaykashqä kaqman chayanäpaq nacionnilaykipa pasakuykuläshaq, tayta”.
20 “ ‘Tsayno niptinpis resilashpanmi Sehón mana munarqantsu Israel runakuna nacionninpa pasananta. Tsaypa trukanqa soldädunkunawan aywaykur Jahazacho campamentunta rurarkur unay aylükunawan pelyapäkurqan. 21 TAYTA DIOS yanapaptinmi rey Sehónta y paywan kaykaq runakunata ushakätsirqan. Tsaynöpami tsay particho taq amorreo runakunapa markankuna y chakrankuna noqakunapana kaykan. 22 Tsay parti karqan Arnón mayupita Jaboc mayuyaq y chunyaq jirkapita hasta Jordán mayuyaqmi.*
23 “ ‘Kikin TAYTA DIOSMI amorreo runakunata qechurkur noqakunata tsay partita qoykamarqan. ¿Tsayno kaykaptinku kananqa qamkuna qechumayta munarkaykanki? 24 Quemos diosniki qoshushqaykikunaqa qamkunapaqmi kanqa y TAYTA DIOSNÏ qomashqankunaqa noqakunapaqmi kanqa.
25 “ ‘Moab nacionpa mandaqnin rey Ziporpa tsurin Balacpita* ¿mas munayniyuq kashqaykitaku qamkuna yarpaykanki? Payqa manami Israel runakunata imaypis atacashqatsu ni achäquita ashipashqatsu.
26 “ ‘Tsaynöpis kimsa pachak (300) watanami Hesbón markapita Aroer markayaq lapan tsay chakrakuna y markakuna Israel runakunapana kaykan. Tsaypita patsami Arnón mayu nawpancho kaq markakunapis Israel runakunapana kaykan. Shuntayta munarqa ¿imanirtaq kananyaq mana shuntashqankitsu? 27 Tsaynöpis kananqa manami noqakunatsu qamkunata achäquita ashipaykä, sinöqa qamkunami achäquita ashipaykämanki. Kananmi jueznintsi TAYTA DIOS juzgamäshun noqakunata karpis o qamkunata karpis’ ”.
28 Jefté tsayno wilakatsiptinpis amonita runakunapa mandaqnin reyqa manami cäsuparqantsu.
Tayta Diosta Jefté promitishqan
29 Tsawraqa TAYTA DIOSPA Espïritun valuratsiptinmi Jeftéqa Manasés trïbu runakuna tashqan Galaad partipa tumarqan runakunata shuntashpan. Galaad particho kaykaq Mizpaman kutiykurmi shuntashqan runakunata pushakurkur Jefté aywarqan amonita runakunawan pelyapäkunanpaq. 30 Yarqushqan hörami TAYTA DIOSTA promitir Jefté kayno nirqan: “Amonita runakunata asulanäpaq yanapamaptikiqa 31 wayïman kutiptï pipis chaskikamänanpaq punta yarqamuq kaqmi qampaq rupatsina sacrificiu kanqa”.
32 Tsaypita amonita runakuna tashqan partiman chayaykuptin Jeftéta TAYTA DIOS yanaparqan paykunata asulapäkunanpaq. 33 Aroer markapita Minitman y tsaypita hasta Abel-queramimman chayashqanyaq amonita runakunapa ishkay chunka (20) markankunata ushakätsirqan. Tsaynöpami amonita runakunata Israel runakuna vincipäkurqan.
34 Mizpaman kutir wayinman Jefté chayaykaptinmi juklayla warmi tsurin panderëtata tukar qatswaraykar tariparqan. Jeftépa manami mas tsurinkuna karqantsu olqupis ni warmipis. 35 Tsaymi tsurinta rikärir pasaypa lakikur röpantapis rachishpan Jefté kayno nirqan: “¡Ay hïja! ¡Kananqa pasaypa lakikuymanchaq churaykamashqanki! ¿Imapaqraq yarqaykämurqaykipis? TAYTA DIOSTA promitishqätaqa imaykanöpapis cumplishaqmi”.*
36 Tsayno niptinmi tsurin kayno nirqan: “Amonita runakunata vincipäkunaykipaq yanapaykäshuptikiqa TAYTA DIOSTA promitishqaykita imaykanöpapis cumpliy, papä. 37 Itsanqa ruwakuläshayki. Virginlaraq wanukunäpaq kaykaptinqa ishkay killa yanasäkunawan jalqakunapa waqar puriykamushaqraq”.
38 Tsayno ruwakuptinmi Jefté awnirqan. Tsaymi yanasankunawan ishkay killa jalqakunapa waqar purimurqan. Tsayno waqarqan virgen kaykälar wanunanpaq kaptinmi. 39 Ishkay killa cumplirkur papänin kaqman kutiykuptin Tayta Diosta promitishqannölami Jefté rurarqan. Tsaynöpami Jeftépa tsurinqa virginla wanukurqan. 40 Tsaypita patsami Israel jipashkunaqa cada watacho chusku junaqyaq Jeftépa tsurinpaq waqar puripäkun.