Ezequiel
Kuyapaptinpis Israel runakuna Tayta Diosta mana cäsukushqan
20 Judá nacionpita noqakunata prësu apamashqanpita soqta wata chusku killa isqun junaqna Babiloniacho tarkaykaptïmi juk ishkay Israel mayor runakuna TAYTA DIOSTA tapukuq shamushpan nawpäman jamakamurqan. 2 Tsaymi TAYTA DIOS kayno nimarqan: 3 “Runapa tsurin, Israel mayor runakunata kayno niy: ‘TAYTA DIOSMI kayno nin: ¿Tapukamaqku qamkuna shamushqanki? Tapukamaptikipis manami wilashaykitsu’. TAYTA DIOSMI tsayno nin.
4 “Runapa tsurin, ¡tsay runakunata olqüpay! ¡Olqüpashpayki yarpätsiy unay aylunkuna melanaypaq jutsakunata rurashqanta!* 5 Paykunata kayno ninki: ‘TAYTA DIOSMI kayno nin: Israel runakunata akrashpämi Egiptucho kaykaptin yanaparqä. Tsaynöpis makïta joqarkur jurashpämi kayno nirqä: “Noqaqa TAYTA DIOSNIKIMI kaykä”.
6 “ ‘Tsay junaqmi paykunata nirqä Egiptupita jorqamur akrashqä nacionman pushanäpaq kashqanta. Tsaychöqa lëchipis abëjapa mishkinpis yakunöraqmi atska kaykan. Tsay nacionqa wakin nacionkunapitapis maypis täkuypaqmi kaykan.* 7 Tsaymi paykunata kayno nirqä: “Tsararashqayki ïdulukunata jitapäkuy. Egipto runakuna adorashqan ïdulukunatapis ama adorapäkuynatsu.* Noqaqa TAYTA DIOSNIKIMI kaykä”.
8 “ ‘Tsayno niykaptïpis paykuna conträ rikakurmi nishqäkunata mana cäsukamarqantsu. Manami ïdulunkunatapis jitarirqantsu ni Egipto runakuna adorashqan ïdulukunatapis adorayta kacharirqantsu. Tsaymi fiyupa rabyashpä Egiptucho kaykaptilanna castigayta munarqä. 9 Tsayno rabyarpis juk lädu nación runakuna mana jamurpämänanpaqmi mana castigaylapa Egiptupita jorqamurqä.
10 “ ‘Jorqaramurnami chunyaq tsaki jirkapa pushamurqä. 11 Tsaychömi wilaparqä leynïkunata y mandamientükunata cumplir ali kawayta taripäkunanpaq kashqanta.* 12 Tsaynöpis jamay junaqkunata respitananpaqmi musyatsirqä.* Tsay junaqqa paykunapaq y noqapaq señalmi kaykan. Tsaynöpami tantiyapäkun TAYTA DIOSNIN kar *santu kananpaq akrashqäta.
13 “ ‘Tsayno yanapaykaptïpis conträmi chunyaq jirkacho rikakärirqan.* Leynïkunata cumplir ali kawayta tarinanpaq kashqanta niykaptïpis mana cäsukamashpanmi cumplipäkurqantsu. Jamay junaqkunatapis manami respitapäkurqantsu. Tsaymi fiyupa rabyashpä chunyaq jirkalachöna ushakätsiyta munarqä. 14 Ushakätsiyta munarpis juk lädu nación runakuna Egiptupita jorqamushqäta musyaptinmi jamurpämänanta mana munar pacienciakurqä.
15 “ ‘Chunyaq jirkacho mana ushakätsirpis pushaykashqä nacionman manana yaykapäkunanpaqmi nirqä.* Tsaychöqa lëchipis abëjapa mishkinpis yakunöraqmi atska kaykan. Wakin nacionkunapitapis mas kuyaylapaqmi kaykan. 16 Tsay nacionman mana yaykatsirqätsu ïdulukunaman yärakur mandamientükunata y leynïkunata mana cäsukärishqanpita y jamay junaqkunata mana respitapäkushqanpitami.
17 “ ‘Tsayno kaptinpis pasaypa kuyapashpämi chunyaq jirkacho mana ushakätsirqätsu. 18 Tsaypa trukanqa tsurinkunata kaynömi nirqä: “Taytaykikunano lutanta ama rurapäkuytsu. Paykuna adorashqan ïdulukunatapis ama adorapäkuytsu. 19 Noqaqa TAYTA DIOSNIKIMI kaykä. Estatütükunata y leynïkunata cumplipäkuy. 20 Jamay junaqmi qamkunapaq y noqapaq señal kaykan. TAYTA DIOSNIKI kashqäta tantiyanaykipaq jamay junaqta imaypis respitapäkuy”.
21 “ ‘Tsayno wilapaykaptïpis tsurinkuna conträ rikakurmi estatütükunata y leynïkunata mana cäsukärirqantsu. Tsay leykunata cumplir ali kawayta tarinanpaq kashqanta musyaykarpis manami cumplipäkurqantsu. Jamay junaqtapis manami respitapäkurqantsu. Tsayno kaptinmi pasaypa rabyashpä chunyaq jirkalachöna ushakäratsiyta munarqä. 22 Ushakätsiyta munarpis juk lädu nación runakuna Egiptupita jorqamushqäta musyaptinmi jamurpämänanta mana munar pacienciakurqä.
23 “ ‘Jukla mana ushakätsirpis chunyaq jirkacho jurashpämi paykunata nirqä maytsay nacionkunamanpis y maytsay markakunamanpis qarqunäpaq.* 24 Tsayno niykaptïpis leynïkunata ni estatütükunata manami cumplipäkushqatsu. Jamay junaqtapis manami respitapäkurqantsu. Paykunapis taytankunanölami ïdulukuna adorayman churakashqa karqan.
25 “ ‘Tsaymi kachariykurqä mana ali costumbrikunata chaskipar lutankunata rurar kawapäkunanpaq. 26 Mana ali costumbrikunata rurarmi qechpa wamrankunata ïdulukunapaq *altarcho rupatsipäkurqan. Tsayno rurananpaq kacharirqä lutanta rurarkaykashqanta tantiyakur mantsakänanpaq y castigaykashqäta musyapäkunanpaqmi’.
Tayta Dios castigananpaq y kuyapänanpaq nishqan
27 “Runapa tsurin, Israel runakunata kayno ninki: ‘TAYTA DIOSMI kayno nin: Unay ayluykikunapis ïdulukunata adorarmi pasaypa rabyanätsimarqan. 28 Tsayno kaptinpis jurar promitishqänölami qoykunäpaq kaq nacionman chayatsirqä.
“ ‘Chayaykatsiptïnami jirkankunacho y jatusaq yörakuna sikinkunachöpis ïdulukunapaq sacrificiukunata rupatsipäkurqan. Pasaypa rabyanätsimashpanmi tsay dioskunata adorar inciensuwanpis qoshtatsiq y vïnutapis jichapaq.* 29 Tsayno ruraptinmi paykunata olqüpar kayno nirqä: ¡Imataq tsay jirkancho kaykan tsayman adoraq aywapäkunaykipaqqa!
“ ‘Olqüpar nishqänömi tsay adorashqan sitiukunapa jutin kananyaqpis Bama* kaykan’ ”.
30 “Israel runakunata kayno ninki: ‘TAYTA DIOSMI kayno nin: ¿Unay ayluykikuna adorashqan ïdulukunataku qamkunapis adorarkaykanki? 31 Tsay ïdulukunata adorar wamraykikunata rupatsishpaykimi kananyaqpis pasaypa jutsata rurarkaykanki. Israel runakuna, ¿tsayno rabyaykätsimarku tapukamayta munarkaykanki? Tapukamaptikipis manami wilashaykitsu. Noqa TAYTA DIOSMI tsayno kananpaq jurä.
32 “ ‘Qamkunaqa kaynömi nipäkushqanki: “Wakin nación runakunano qeruta y rumita noqantsipis adorashun”.
“ ‘Israel runakuna, tsayno yarpashqayki manami alitsu kaykan. 33 Noqa TAYTA DIOSMI jurar kayno nï: Lapan kalpäwan pasaypa rabyar castigarmi munaynïcho tsararäshayki. 34 Pasaypa rabyashqa castigar juk lädu nacionkunaman qarqushqa karpis munaynïwanmi shuntapäkamushayki. 35 Markakunapita chunyaq jirkakunaman apaykurmi castigashayki. 36 Egiptupita jorqamur chunyaq jirkacho unay ayluykikunata castigashqänömi qamkunatapis castigashayki’. TAYTA DIOSMI tsayno nin.
37 “ ‘Mitsikuq runa jukpa uyshankunapita uyshankunata shuntaqnömi qamkunatapis shuntashayki. Nirkurmi rurashqantsi *pactu nishqanno kawapäkunaykipaq tantiyatsishayki. 38 Achäquita mana ashipäshunaykipaqmi mana cäsukamaqkunata y conträ sharkuqkunata qamkunapita qarqushaq. Juk lädu nacionkunapita jorqamurpis manami Israelman yaykunanta kachapäshaqtsu. Tsayraqmi TAYTA DIOS kashqäta tantiyakärinkipaq.
39 “ ‘Israel runakuna, noqa TAYTA DIOSMI qamkunata kayno nï: Mana cäsukamayta munashpaykiqa ïdulukunata adoranaykipaq ayway imay ari. Itsanqa ïduluykikunapaq ofrendakunata apar jutïta manakaqman churapäkunaykita manami kachapäshaykitsu. 40 Tsaypa trukanqa tiempu chayamunqanami *sagrädu jirkannïcho lapayki adoramänaykipaq. Tsay jirkanqa Israelcho alinnin jirkanmi kaykan. Noqa TAYTA DIOSMI tsayno nï.
“ ‘Tsay jirkanchömi apashqayki ofrendakunatapis chaskishaq. Mikuynikipita punta wayuq kaqta, uywaykipita punta yuriq kaqta y imatapis noqapaq apamushqaykitaqa chaskishaqmi.
41 “ ‘Juk lädu nacionkunacho mashtakashqa karkaykaptiki shuntaptïmi lapan runakunapis musyanqa qamkunata kuyaq *santu Dios kashqäta. Inciensuwan qoshtatsiptiki kushikushqänömi qamkunata yanapar kushikushaq.
42 “ ‘Unay ayluykikunata promitishqä nacionman chayatsiptïraqmi TAYTA DIOS kashqäta tantiyakärinkipaq. 43 Tsaynöpis jutsa rurashqaykita y lutankunata rurashqaykita yarparkurmi pasaypa lakikur penqakärinkipaq. 44 Tsaychöqa manami jutsata rurashqaykiman tuputsu ni pasaypa mana alikunata rurashqaykiman tuputsu castigashayki, sinöqa kuyapäshaykimi. Israel runakuna, tsayraqmi TAYTA DIOS kashqäta tantiyakärinkipaq’. TAYTA DIOSMI tsayno nin”.
Sur kaq lädu parti imano kananpaq nishqan
45 (21.1) TAYTA DIOSMI kayno nimarqan: 46 (21.2) “Runapa tsurin, sur kaq läduman rikärir *Neguevcho kaykaq muntikunata desgracia pasananpaq kaqta wilay. 47 (21.3) Neguevcho kaykaq muntikunata kayno ninki: ‘¡TAYTA DIOS nishqanta mayay! Paymi kayno nin: Qamkunacho ninawan rupatsiptïmi lapan yörakuna rupar ushakanqa tsakipis y oqupis. Mana upiypa rupaptinmi sur kaq läducho y norti kaq läducho taq lapan runakunapis shanayta qaqlancho mayanqa.* 48 (21.4) Lapan runakunami musyapäkunqa ninata ratatsiptï mana upiypa rupashqanta’ ”.
49 (21.5) Tsaymi kayno nirqä: “¡Ay Tayta Dios! Runakuna nirkaykan wilakushqäta mana tantiyashqantami. Kanan nimashqaykita wilakuptï peornachari mana tantiyanqatsu”.