Jueces
Canaánpita mana qarqushqan runakuna
3 Kaycho qelqaraykan mayqan marka runakunatapis *Canaáncho TAYTA DIOS mana ushakätsishqankuna. Tsayno mana ushakätsirqantsu qepa yuriq Israel runakunata jutsa rurayman inkitapäkuptin probananpaqmi. 2 Tsaynöpis tsay runakunata TAYTA DIOS mana ushakätsirqantsu qepa yuriq Israel runakuna pelyayta yachakunanta munarmi. 3 Tsay runakunami karqan filisteo runakunapa pitsqa mandaqninkuna, cananeo runakuna, sidonio runakuna y Líbano jalqakunacho taq heveo runakuna. Tsay heveo runakunaqa tarqan Baal-hermón jalqapita hasta Hamatyaqmi.*
4 Tsay runakunata TAYTA DIOS mana ushakätsirqantsu Israel runakunata jutsa rurayman inkitananpaqmi. Tsaynöpami musyayta munarqan unay aylunkunata Moisés yachatsishqan leykunata cäsukärinanpaq o mana cäsukärinanpaq kashqantapis. 5 Tsaynöpami Israel runakuna talukashqa tarqan cananeo, heteo, amorreo, ferezeo, heveo y jebuseo runakunawan. 6 Tsay runakunapa tsurinkunawanmi warmi tsurinkunata y olqu tsurinkunata tätsirqan. Paykunawan tsayno tarmi diosninkunatapis adorapäkurqan.
Israel runakunata Otoniel salvashqan
7 TAYTA DIOSTA mana cäsukur *Baal dioskunata y *Asera diösapaq jawishqan raku qerukunata adorashpanmi Israel runakuna TAYTA DIOSTA pasaypa rabyanätsirqan. 8 Tsaymi Mesopotamia nacionpa mandaqnin rey Cusan-risataimpa munayninman Israel runakunata kachaykurqan. Tsaynöpami Israel runakunaqa pusaq wata payta sirvipäkurqan. 9 Tsaymi TAYTA DIOSTA manakäriptin paykunata salvananpaq Calebpa sobrinun Otonielta TAYTA DIOS ali yanaparqan. Otonielpa papänin Cenazqa Calebpa shulka wawqinmi karqan.* 10 TAYTA DIOSPA Espïritun Otonielta yanapaptinmi Israel runakuna churarqan jueznin kananpaq. Tsaymi runakunata pushakurkur pelyananpaq aywaptin TAYTA DIOS yanaparqan Cusan-risataimta vincipäkunanpaq. 11 Tsaypitaqa Otoniel wanushqanyaq chusku chunka (40) wata Israel runakuna jawka kawapäkurqan.
Israel runakunata Aod salvashqan
12 Israel runakuna TAYTA DIOSTA mana cäsukur yapay rabyanätsiptinmi Moab nacionpa mandaqnin rey Eglónta TAYTA DIOS yanaparqan munaynincho tsararänanpaq. 13 Tsawraqa amonita y amalecita runakunawan Israel runakunata vinciykurmi Palmëra Markata* qechurqan. 14 Tsay junaqpitami rey Eglónpa munaynincho Israel runakunaqa chunka pusaq wata karqan.
15 Tsaymi TAYTA DIOSTA manakuptin Gerapa tsurin Aodta* TAYTA DIOS yanaparqan Israel runakunata salvananpaq. Aodqa itsuq makinwan imatapis ruraqmi karqan. Tsaynöpis Benjamín trïbu runami karqan. Paywanmi Israel runakunaqa impuestu shuntashqankunata rey Eglónman apatsirqan.
16 Impuestuta manaraq aparmi Aodqa pulan metru largutano ishkan waqtanpa afilashqa espädata rurarqan. Tsay espädatami röpan rurinpa alawqa kaq tseqlanman jatirkurqan. 17 Nirkurna impuestu shuntashqankunata rey Eglónman aparqan. Eglónqa pasaypa wera runami karqan. 18 Apashqanta qoykurnami Aodqa yanaqaqninkunawan kutikärirqan. 19 Kutikuykashqanchömi Gilgalcho kaykaq rumipita rurashqa ïdulukunaman chayaykur Aodqa rey Eglónman kutirqan. Chayaykurmi kayno nirqan: “Pakaylapa wilarkushayki, tayta”.
Niptinmi rey Eglónqa mandäshiqninkunata nirqan waqtaman upälala yarqukärinanpaq. 20 Yarqukäriptinmi jamaräkunan cuartuncho Aodwan rey Eglón ishkalanna kaykarqan. Tsaymi rey Eglónpa nawpanman witiykur Aod kayno nirqan: “Tayta Dios nimashqanta wilashayki, tayta”.
Niptinmi jamarashqan trönunpita Eglón sharkurqan. 21 Tsawraqa alawqa kaq tseqlanpita itsuq kaq makinwan espädanta jorqurir Aodqa Eglónta pachanpa tuksiriykurqan. 22 Eglón pasaypa wera kaptinmi espädaqa makin tsarikunantin yaykurqan elqänanyaq. Tsaymi jorquyta mana kamäpakur kachariptin ishpaninpis yarqamurqan. 23 Tsayno kaykaqta kachariykurmi Aodqa punkuta ruripita llävirkur ventänapa yarqurir aywakurqan.
24 Aod aywakuptinnami rey Eglónpa mandäshiqninkuna kutiykur punku wichqaraykaqta taripäkurqan. Tsaymi yarpapäkurqan ruricho ishpakuykashqanta. 25 Rey Eglón mana yarqamuptinmi may höra shuyarpaykashqancho lläviwan kicharir yaykapäkurqan. Yaykushpanmi taripäkurqan pampacho wanushqa jitaraykaqta.
26 Rey Eglónpa mandäshiqninkuna shuyarpashqanyaqmi Aodqa Gilgalcho kaykaq ïdulukuna nawpanpa pasarir Seirat nawpanman qeshpiykur pakakurqan. 27 Tsaypita aywaykur Efraín jalqakunaman chayaykur *cornëtata tukarqan Israel runakuna tsayman juntakänanpaq. Juntakarkuptinnami lapanpa puntanta Jordán mayuman Aod urarqan.
28 Manaraq urarmi kayno nirqan: “Kananmi contrantsi moabita runakunata vincinantsipaq TAYTA DIOS yanapamäshun”.
Tsaymi Jordán mayu väduman aywaykur pitapis pasananta mana kachaparqantsu. 29 Moabita runakuna pelyananpaq shamuptinmi wanutsipäkurqan chunka waranqano (10,000) ali pelyaq soldädukunata. Tsaychöqa manami juklaylapis kawaykar quëdarqantsu. 30 Tsaynömi Israel runakunaqa vincirqan moabita runakunata. Tsaypita patsami pusaq chunka (80) wata Israel runakuna jawka kawapäkurqan.
Israel runakunata Samgar salvashqan
31 Aod wanuykuptinnami Anatpa tsurin Samgarna Israel runakunata contrankunapita salvarqan. Paymi picalawan soqta pachak (600) filisteo runakunata wanutsirqan.