Jonás
Jonás rabyakushqan
4 Nínive runakunata Tayta Dios mana ushakätsiptinmi Jonás pasaypa rabyakurqan. 2 Tsaymi TAYTA DIOSTA kayno nirqan: “TAYTA DIOS, musyämi kuyapäkuq y perdonakuq Dios kashqaykita. Kuyakuq karmi juklaqa mana rabyakunkitsu. ‘Castigashaq’ nirkurpis jutsankunata kachariptinqa manami castigankinatsu.* Markächo kaykarmi maliciarqä Nínive runakunata kuyapänaykipaq kashqanta. Tsaymi Tarsisman qeshpir aywakuyta munarqä. 3 Wilakarkatsimar mana ushakaykätsirqa jukla shuntakamay. Kay patsacho kawanäpa trukanqa jukla wanuküman”.
4 Tsayno manakuptinmi TAYTA DIOS kayno nirqan: “Rabyakushqaykiqa ¿alitsuraq kaykan?”
5 Tsaypitami Nínive markapita Jonás aywakurqan inti jeqamunan läduman. Tsaychömi ramädata ruraykur Nínive markata ima pasashqantapis rikananpaq lantuman jamakurqan.
6 Tsawraqa Jonás lantukunanpaqmi ramäda jananpa calabäzata TAYTA DIOS winatsimurqan. Calabäzapa raprankuna shumaq lantupaptinmi Jonás pasaypa kushikurqan. 7 Tsayno kaykaptinmi calabäzapa yöranta mikunanpaq jukaqnin tuta shiwrita TAYTA DIOS yuritsirqan. Mikuptinmi calabäza tsakikäkurqan. 8 Tsaypitanami inti jeqamuptin akaq wayrata Jonásman Tayta Dios wayrätsimurqan. Intipa shanayninpis fiyupa umanman chayaptinmi pitirpunanpaq kashqanta Jonás yarparqan. Tsaymi wanuyta munar kayno nirqan: “¡Kawanäpa trukanqa jina wanuküman!”
9 Tsawraqa Tayta Dios kayno nirqan: “Calabäza tsakikäkushqanpita rabyakushqayki ¿aliku kaykan?”
Tsayno niptinmi Jonás kayno nirqan: “Awmi. Pasaypami rabyanaykä”.
10 Tsawraqa TAYTA DIOS kayno nirqan: “Manami qamtsu tsay calabäzata murushqanki ni qamtsu winatsimushqanki. Juk tsakaymi winamushqa y jukaqnin junaqnami tsakikäkushqa. Tsayno kaptinpis tsay calabäzapaq lakikuykanki lantupäshunaykipaq manana kaptinmi. 11 Nínive markachöqa pachak ishkay chunka waranqapita (120,000) masmi runakuna karkaykan. Paykunaqa manami musyapäkuntsu ali y mana ali kashqantapis. Tsaymi tsay calabäzapaq lakikushqaykipitapis masraq noqa lakikü Nínive markacho runakunapaq y uywakunapaqpis”.