Job
Mana tantiyakuypa parlashqanta Job tantiyakushqan
42 Tsaypitanami TAYTA DIOSTA Job kayno nirqan:
2 “Lapanpaq munayniyuq kashqaykita musyämi.
Ruranaykipaq yarpashqaykitaqa lapantami kamakätsinki.
3 Kaynömi nimashqanki: ‘¿Pitaq kanki lutanta ruraq kashqäta nimänaykipaq?’*
Mana tantiyakuypami lutanta nishqä, Tayta.
Tapushqäkunata tantiyatsimaptikipis manami tantiyayta kamäpakümantsu karqan.
4 “Tsaynöpis kaynömi nimashqanki: ‘Imata nishqätapis mayamay.
Imata tapukuptïpis wilamay’.*
5 “Kananyaq qampita rimaqlatami mayashqä, Tayta.
Kananmi itsanqa kikï qamta rikashqä.
6 Nishqäpita fiyupa penqakurmi alpaman y uchpaman jamaykur perdonta manakü”.
Libru ushanan
7 Jobta TAYTA DIOS tsayno parlaparkurmi Temánpita kaq Elifazta kayno nirqan: “Qamkunaqa sirvimaqnï Jobno manami rasun kaqtatsu noqapita parlashqanki. Tsaymi pasaypa rabyaykä qampita y ishkay amïguykikunapita. 8 Kananqa uywaykipita qanchis töruta y qanchis uyshata apakurkur sirvimaqnï Job kaqman aywaykur jutsaykikunapita sacrificiuta rupatsiy.* Tsaychömi sirvimaqnï Job qamkunapaq ruwakamanqa. Lutankunata rimashqaykipita castiganäpaq kaykarpis pay manakamaptinmi qamkunata mana castigashaykinatsu. Sirvimaqnï Jobmi itsanqa rasun kaqta rimashqa”.
9 Tsaymi Elifaz, Bildad y Zofar aywaykur Tayta Dios nishqanno rurarqan. Job manakuptinmi TAYTA DIOS paykunata perdonarqan.
10 Tsaypitanami Jobta TAYTA DIOS yanaparqan unay kashqanno alina kawananpaq.* Tsaymi imaykankunapis ishkay kuti masraq karqan. 11 Tsaypitanami wawqinkuna, paninkuna, amïgunkuna y lapan unay reqinakushqankuna watukuq aywar Jobpa wayincho fiestata rurapäkurqan. Tsaychömi lakipashqanta wilar consulapäkurqan lapan desgracia payta pasashqanpita y imayka qeshyawan TAYTA DIOS nakatsishqanpita. Nirkurmi cada ünun Jobta qoykurqan qellayta y qoripita rurashqa sortëjata.
12 TAYTA DIOSMI Jobta bendicionninta qorqan unay rïcu kar tsararashqanpitapis masta. Tsaymi karqan chunka chusku waranqa (14,000) uyshankuna, soqta waranqa *camëllunkuna (6,000), juk waranqa (1,000) törunkuna y juk waranqa (1,000) china bürrunkuna.
13 Tsaynöpis qanchismi olqu tsurinkuna karqan y warmi tsurinkunapis kimsaraqmi karqan. 14 Mayor kaq warmi tsurinpa jutintami churaparqan Jemima jutin kananpaq. Paypa qepanman kaqtanami jutinta churaparqan Cesia jutin kananpaq. Nirkur mas qepanman kaqtanami jutinta churaparqan Keren-hapuc jutin kananpaq. 15 Jobpa kuyaylapaq jipash tsurinkunanöqa manami maychöpis karqantsu. Paykunatapis olqu tsurinkunatano iwalmi herenciata rakiparqan.
16 Tsaypitami Job kawarqan pachak chusku chunkan (140) wata. Tsayno kawarmi rikarqan tsurinkunata, wilkankunata, wilkankunapa tsurinkunata y paykunapa tsurinkunatapis. 17 Tsayno atska wata kawarkushpanmi pasaypa awkinyashqana Job wanukurqan.