Job
Job nishqan
19 Tsayno niptinmi Job kayno nirqan:
2 “¡Imayyaqraq lakikatsimashpayki manakaqkunata rimarkaykanki!
3 Yaparir yaparir conträ rimar ¿manaku penqakärinki?
4 Rasunpa jutsata rurashqa kaptïpis ¿imataq qamkunata qokushunki?
5 Qamkunaqa noqapita mas ali kashqaykita yarparmi jutsäpita nakaykashqäta niykämanki.
6 Shumaq tantiyapäkuy.
Redninwan tsariqnömi Tayta Dios tsarimashqa.
7 “ ‘¡Wanuykätsiman!’ nir qaparaptïpis manami pipis salvamantsu.
Yanapamänanpaq ruwakuptïpis manami pipis wiyamantsu.
8 Maypapis mana yarqunäpaqmi Tayta Dios tsapata churapämashqa.
Purinä nänitapis yanawyaykaq tsakaymanmi tikratsishqa.
9 Lapan imaykätapis paymi ushakätsishqa.
Kananqa pipis mananami respitamannatsu.
10 “Pasaypa desgraciaman Tayta Dios jitarpamaptinmi sapipita jitarishqa yörano kaykä.
Tsaymi imata ruranäpaqpis valornï mana kantsu.
11 Tayta Dios rabyarmi contran runatano castigamashqa.
12 Lapan soldädunkuna shamurmi jiruruypa tsapämashqa.
Wayïtapis jiruruypami tsaparaykan.
13 “Wawqïkunapis y amïgükunapis noqapita witikurmi jäpa runatanöna rikapäkaman.*
Tsayno kananpaq Tayta Diosmi kamakätsishqa.
14 Aylükunapis manami watukamannatsu.
Amïgükunapis qonqaykamashqanami.
15 “Wayïcho taqkunapis y ashmaynïkunapis jäpa runatanönami rikaman.
Paykunapaqqa mana reqishqa runanömi kaykä.
16 Ashmaynïkunapis yanapamänanpaq ruwakuptï manami wiyaq tukärintsu.
17 Jämaynï asyaptinmi warmïpis melanäman.
Wawqïkunapis rikamayta manami munapäkuntsu.
18 “Wamrakunapis manakaqmanmi churaman.
Ichirkuptïpis asipämanmi.
19 Amïgükunapis pasaypami ajayämashqa.
Kuyanakushqä kaqkunapis chikimanmi.*
20 Pasaypa uyutaptïmi tulükunapis yupariylapaqna kaykan.
Tsaynöpami wanuy wanuylatana rikchakuykä.
21 “Amïgükuna kaykarqa kuyapaykalämay.
Tayta Dios castigamaptinpis qamkunaqa ama kachaykalämaytsu.
22 ¿Imanirtaq qamkunapis Tayta Dios lakikatsimashqan jananman lakikatsimanki?
Qayapämarpis ¿manaku contentakärinki?
23 “¡Pilaraq nishqäkunatapis qelqaykunman!
¡Ojalä acta libruchöpis qelqaraykunman!
24 ¡Alimi kanman imaypis mana börrakänanpaq cincilwan takapaylapa rumiman qelqaptin y tsay letrakunata plömuwan yanayätsiptin!
25 “Noqaqa musyämi salvamaqnï kashqanta.
Paymi abogädü kar kay patsacho favornï sharkunqa.
26 Aytsä ismur ushakaptinpis kawarirkamurqa Tayta Diosta rikashaqmi.
27 Manami juktsu rikanqa, sinöqa kikïmi nawïwan rikashaq.*
Tsay junaqta rikanäpaq shonqüpis imanöraqchi amipa amiykun.
28 “Qamkunaqa jutsata rurashqäta yarparmi imanöpapis jitapaykämanki.
29 Itsanqa kikikikuna castigashqa kanaykipaq kashqanta yarpachakäriy.
Tantiyakäriy Tayta Dios castigakuq kashqanta.
Jutsa ruraqkunataqa espädawanmi ushakätsinqa”.*