Job
Elifaz yapay nishqan
22 Tsaypitanami Temán partipita shamuq Elifaz kayno nirqan:
2 “Mayjina yachaq karpis ¿Tayta Diosta pilapis yanapanmantsuraq?
3 Alilata ruraptiki lapanpaq munayniyuq Tayta Diosqa ¿kushikuntsuraq?
Mayjina ali kashqaykipis ¿Tayta Dios munashqannötsuraq kaykan?*
4 Manami Tayta Diosta cäsukur kawashqaykipitatsu castïguta chaskiykanki.
5 Tsaypa trukanqa jutsata rurashqaykipitami castigaykäshunki.
Jutsaykikunapis aypämushqanami kaykan.
6 “Qamqa capazchari marka mayikipa imaykantapis mana kuyapaypa prenda tsariq kanki.
Tsayno rurar capazchari waktsakunapa röpantapis qechuq kanki.
7 Yakuta manakushuptikipis capazchari mana qoykurqaykitsu.
Yarqaykar puriqkunatapis capazchari mana qaraykurqaykitsu.
8 Qamqa rïcu y respitädu kar capazchari imapis munaylaykicho kananpaq kashqanta yarparqayki.
9 Capazchari viüdakunatapis mana yanaparqaykitsu.
Waktsakunatapis capazchari nakatsirqayki.
10 Tsayno kashqaykipitachari kanan pasaypa nakaykanki.
11 Tsaymi tsakäpakushqano kar imanir nakashqaykitapis mana tantiyankitsu.
Cargashqa mayuman jeqaqnömi kaykanki.
12 “Lapanpita mas altuchömi Tayta Dios kaykan.
Mas janacho kaq qoylarkunapitapis mas janaqanchömi kaykan.
13 Karucho kashqanta yarpar capazchari qamqa kayno nishqanki:
‘Tayta Diosqa imano kashqätapis manami musyantsu.
Yanawyaykaq tsakaqpitaqa ¿imanöpataq rikamunqa?
14 Pukutay rurincho kaykar y intëru ciëlucho pasyakurqa manami rikamantsu’.*
15 “Tsayno nirqa ¿unay runakuna lutanta rurashqannöku qampis rurayta munaykanki?
16 Cargashqa mayu imaykatapis apar ushakashqannömi paykunapis manaraq hörancho wanur ushakashqa.
17 Lapanpaq munayniyuq Tayta Dios mana castigananpaq kashqantami yarpapäkurqan.
Tsayno yarparmi kayno nipäkurqan: ‘Tayta Diosta manami rikaytapis munätsu’.
18 Tsayno nir Tayta Diosta manakaqman churaptinpis pay yanapaptinmi rïcuyarqan.
¡Tsay runakuna yarpashqannöqa manami yarpätsu!
19 “Fiyu runakunata Tayta Dios castigashqanta rikarmi ali runakunapa shonqunpis atsikyarkunqa.
Jutsaynaq runakunapis asiparmi kayno ninqa:
20 ‘Imano karpis chikimaqnintsi runakunaqa ushakashqanami kaykan.
Imaykantapis chipyaqmi nina ushashqa’.
21 “Tsayno mana pasashunaykipaq Tayta Dios munashqanno kaway.
Tsawraqa bendiciontami chaskinkipaq.
22 Pay yachatsishushqaykitaqa shumaq mayakuy.
Lapan nishushqaykita shonquykiman churakuy.
23 Jutsa rurayta kacharir lapanpaq munayniyuq Tayta Dios munashqanno yapay kawaptikiqa paymi yanapashunkipaq.
24 Alinnin kaq qorikimanpis ama yärakuytsu.
Tsaypa trukanqa polvutano y mayucho qolutatano rikanki.
25 Tsaykunaman mana yärakuptikiqa lapanpaq munayniyuq Tayta Diosmi yanapashunkipaq.
Qoriyuq y atska qellayyuq runakunapitapis mas alimi kawankipaq.
26 “Tsaynöpami lapanpaq munayniyuq Tayta Diosman yärakur kushishqa kawankipaq.
27 Payqa manakuptiki yanapashunkipaqmi.
Yanapashuptikimi payta promitishqaykitapis cumplinkipaq.
28 Imata ruranaykipaq yarpashqaykipis alimi kamakanqa.
Atskichöno kashpaykimi kushishqa kawankipaq.
29 “Orgullösukunataqa Tayta Dios penqaymanmi churan.
Humildikunatami itsanqa yanapan.
30 Jutsaynaq runataqa salvanmi.
Jutsaynaq kaptikiqa qamtapis salvashunkimi”.