Salmos
Kuyapänanpaq Tayta Diosta manakushqan
(1a) Kay salmuqa Tayta Diosta David manakushqanmi kaykan.
86 (1b) TAYTA DIOS, ruwakamushqäta mayaykalämay.
Pasaypa lakikur ima ruraytapis manami kamäpakütsu.
2 Munashqaykino kawarmi wanuypita salvaykamänaykipaq manakamü.
Sirviqniki karmi ima desgraciapitapis tsapaykamänaykipaq ruwakamü.
Diosnï kaptikimi qamman yärakamü.
3 Tayta Dios, kuyapaykalämay.
Imay hörapis qamtami manakamü.
4 Sirviqniki karmi valorta qoykamänaykipaq manakamü.
Qamlamanmi imay hörapis yärakamü.
5 Qamqa alilata ruraqmi y perdonakuqmi kanki.
Qamman yärakamuqkunataqa kuyapankimi.
6 TAYTA DIOS, manakamushqäta mayaykalämay.
Ruwakamushqäta chaskiykalämay.
7 Imaypis mayamashqaykita musyarmi lakikushqä höra manakamü.
8 Tayta Dios, manami qamnöqa ima diospis kantsu.
Qam rurashqaykitanöqa manami pipis rurantsu.
9 Qammi lapan nacionkunata kamashqanki.
Lapan nación runakunami adorashunaykipaq shapäkamunqa.
Nawpaykiman qonqurpakamurmi jutikita joqarinqa.*
10 Qam japalaykimi Dios kaykanki.
Munayniyuq kashpaykimi espantaypaq milagrukunata ruraykanki.
11 Imano kawanäpaqpis nänikita reqiykatsilämay,* TAYTA DIOS.
Tsay nänikipami imaypis purishaq.
Lapan shonqüwan qamta *mantsakunäpaq yanapaykalämay.
12 TAYTA DIOS, lapan shonqüwanmi alabashayki.
Jutikita joqarirmi imaypis adorashayki.
13 Noqataqa pasaypami kuyamanki.
Wanuypitapis salvamashqankimi.
14 Tayta Dios, fiyu runakunami conträ sharkushpan wanutsimayta munarkaykan.
Tsay runakunaqa manakaqmanmi churaykäshunki.
15 Tayta Dios, qamqa ali shonqu y kuyapäkuqmi kaykanki.
Juklaqa manami rabyakunkitsu.
Kuyapäkuq y rasun kaqlata rimaqmi kaykanki.
16 Manakamushqäta wiyamashpayki kuyapaykalämay.
Sirviqniki kaykaptïqa valorta qoykalämay.
Sirvishuqniki warmipa wawan kaykaptïqa salvaykalämay.
17 Conträkuna penqakärinanpaq paykunapa rikay nawin yanapaykalämay.
TAYTA DIOS, qamlami yanapamanki y kushikatsimanki.