Juan
Tayta Diosta Jesús manakushqan
17 Tsayno nirkushpanmi jana patsata rikärir Jesús kayno nirqan: “Hörä chayamushqanami, Papä.* Tsuriki kaykaptïqa glorificaykalämay*. Tsaynöpami noqapis glorificashayki*. 2 Lapan runakunapaq munayniyuq kanäpaqmi churamashqanki. Tsaymi munayniyuq kaykä makïman churamushqayki runakunata *mana ushakaq kawayta qonäpaq. 3 Mana ushakaq kawayta tariqkunaqa qamtami *reqipäkushunki. Tsaynölami noqatapis reqipäkaman. Tsaynöpami tantiyakärin japalayki Dios kashqaykita y noqata kachamashqaykita.
4 “Runakuna alabashunaykipaqmi lapan nimashqaykikunata kay patsacho cumplishqä. 5 Papä, kay patsa manaraq kaptin nawpaykicho munayniyuq kashqäno kananpis munayniyuq kanäpaq shuntakalämayna.
6 “Imano kashqaykitapis discïpulükunata yachatsishqämi. Qampa kaptinmi paykunata akrarkur makïman churamushqanki. Tsaymi wilakuynikita wilapaptï cäsukärishqa. 7 Kananqa lapan yachatsishqäkuna y rurashqäkuna qam munashqaykino kashqanta musyapäkunnami. 8 Lapan nimashqaykitami paykunata yachatsishqä. Tsaymi yachatsishqäkunata chaskikur tantiyakärin qampita kay patsaman shamushqäta.
9 “Manami lapan runakunapaqtsu manakaykämü, sinöqa discïpulükunalapaqmi. Qampa kaptinmi paykunata makïman churamushqanki. 10 Lapanpis noqaman yärakamaqkunaqa qampami kaykan y qamman yärakuqkunapis noqapami kaykan. Discïpulükuna yärakamashqanpitami runakuna tantiyakurkaykan noqata kachamashqaykita. 11 Kay patsapita qam kaqman kutikamuptïpis paykunaqa kay patsachöraqmi karkaykanqa. *Santu Tayta Dios, noqantsi juklayla kashqantsino paykunapis juklaylano kananpaq ali rikaykulay.
12 “Makïman churamushqayki runakunataqa [kay patsacho] alimi rikashqä. Tsayno ali rikaptïmi mayqanpis mana oqrakashqatsu. Jukmi itsanqa *Satanás munashqanta rurar oqrakashqa. Tsayno pasashqa Tayta Diospa palabran nishqanno kananpaqmi.*
13 “Kananqa qam kaqmannami kutikamushaq. Kay patsacho discïpulükunata yachatsishqä noqa kushishqa kashqäno paykunapis kushishqa kawananpaqmi. 14 Wilakuynikita wilapaptïmi chaskikärimashqa. Munashqaykita rurashqäno paykunapis ruraptinmi qamta mana cäsukuq runakuna chikipäkun. 15 Chikiptinpis manami kay patsapita jukla pushakunaykipaqtsu manakamü, sinöqa Satanáspita tsapaykunaykipaqmi. 16 Qampa makikicho kashqänömi paykunapis makikichöna karkaykan.
17 “Wilakuynikiqa rasun kaqmi kaykan. Wilakuyniki nishqannöla ali kawapäkunanpaq yanapaykulay. 18 Kay patsaman kachamashqaykinölami paykunatapis munashqaykita rurananpaq kachaykä. 19 Nimashqaykinölami lapantapis cumpliykä. Tsaynöpami noqata rikakamar paykunapis nishqaykikunata cumplipäkunqa.
20 “Manami discïpulükunalapaqtsu manakamü, sinöqa wilakärishqanta chaskikur noqaman yärakamuqkunapaqpis manakamümi. 21 Noqantsi juklayla kashqantsino kikinpurapis y noqantsiwanpis juklaylano kawananpaq yanapaykulay. Tsayno kawapäkushqanta rikarmi wakin runakunapis tantiyakärinqa kachamashqayki Cristo kashqäta.
22 “Wilakuynikita tantiyatsimashqaykinölami tantiyatsishqä. Tsaynöpami noqantsi juklayla kashqantsino paykunapis juklaylano kapäkunqa. 23 Paykunawan juklaylanömi kaykä y qampis noqawan juklaylami kaykanki. Tsaynöpami paykunapis juk shonqunöla kuyanakur kawapäkuptin kachamashqayki Cristo kashqäta runakuna tantiyapäkunqa. Tsaynöpis tantiyakärinqa noqata kuyamashqaykino paykunatapis kuyashqaykita.
24 “Makïman churamushqayki runakuna noqawan kanantami munä, Papä. Nawpächo karnami rikamanqa munayniyuq kanäpaq churamashqaykita. Kay patsata manaraq kamar kuyamashpaykimi munayniyuq kanäpaq churamarqayki.
25 “Papä, mana cäsushuqniki runakunaqa manami qamta reqishunkitsu. Noqami itsanqa qamta reqï. Tsaynöpis makïman churamushqayki runakunaqa musyanmi kay patsaman kachamashqaykita. 26 Qampa wilakuynikitami yachatsishqä. Tsaynölami imaypis yachatsishaq noqawan juklaylano kawapäkunanpaq y noqata kuyamashqaykino paykunapis kuyanakunanpaq”.