Salmos
Tayta Diospa makincho kawashqantsi lapanpitapis mas ali kashqan
(1a) David qelqashqan salmu.
16 (1b) Tayta Dios, qamlamanmi yärakamü.
Mana ali ruraykunapita tsapaykalämay.
2 TAYTA DIOSTA manakurmi kayno nishqä:
“Qammi noqapa Señornï kaykanki.
Qampa makikicho kawashqäqa lapanpitapis mas alimi kaykan”.
3 Kay patsacho munashqaykino kawaq *santu runakunaqa rasunpa ali runakunami karkaykan.
Paykunapita lapan shonqüwanmi kushikü.
4 Juk diosta adoraqkunaqa pasaypami nakapäkunqa.
Noqaqa juk diospa *altarninmanpis manami uywapa yawarninta winapäshaqtsu.
Jutinkunatapis manami imaypis rimashaqtsu.
5 TAYTA DIOS, kikikimi herenciä kaykanki.
Qammi bendicionta imaypis churamunki.
Lapan pasamänanpaq kaqkunatapis qamqa musyankimi.
6 Lapan kamaripämashqayki pasaypa alimi kaykan.
Tsaymanqa manami imapis tinkuntsu.
7 TAYTA DIOSMI imano kawanäpaqpis tantiyatsiman.
Tsaymi payta imaypis alabashaq.
Tantiyatsimashqantaqa tsakaypapis yarparaykämi.
8 TAYTA DIOSTAMI imay hörapis yarparaykä.
Alawqa kaq nawpächo karmi imaypis yanapaykäman.
9 Tsaymi shonqüpis pasaypa kushikun.
Shimïpis paytami alaban.
Payman yärakurmi imaypis jawka kawaykä.