Salmos
Chikiqninkunapita salvananpaq manakushqan
(1) Cantaqkunapa mandaqninpaqmi. Ama ushakätsiytsu nishqan tönuwan kay salmuta cantapäkunki. Saúlpita qeshpir machayman pakakushqanta yarparmi kay salmuta David qelqarqan.*
57 (2) Tayta Dios, kuyapaykalämay.
Ama kachaykalämaytsu.
Qamlamanmi amparakamü.
Peligru pasashqanyaq älayki rurinman pakaykalämay.
2 (3) Poderniyuq Tayta Dios, imaypis yanapamaqnï kaptikimi qamta manakamü.
3 (4) Qammi jana patsapita kuyapämashpayki imaypis yanapamanki.
Chikimaqnïkuna rabyashqa qatikachämaptinpis qammi salvamanki. Selah
4 (5) Conträkuna wanutsimayta munaptinmi leonkunapa chawpinchöno kaykä.
Paykunapaqa kirunkunapis lanzano y flëchanömi kaykan.
Qallunkunapis afilashqa espädanömi kaykan.
5 (6) Tayta Dios, gloriachöpis lapanpaq munayniyuqmi kaykanki.
Kay patsachöpis lapanta mandaqmi kaykanki.*
6 (7) Chikimaqnïkunami purikunäman trampata churapämashqa.
Pasaypa mantsakurmi ima ruraytapis mana kamäpakurqätsu.
Purikunämanmi pözuta uchkushqa.
Tsayno kaptinpis kikinkunami tsayman jeqashqa. Selah
7 (8) Tayta Dios, shonqü listumi kaykan.
Tsaymi himnukunata cantar alabashayki.
Lapan shonqüwanmi qamta alabashayki.
8 (9) ¡Rikchay, alma!
¡Rikchay, arpa! ¡Rikchay, *salteriu!
¡Tsaka tsakala Tayta Diosta alabashun!
9 (10) Tayta Dios, lapan runakunapa nawpanchömi qamta alabashayki.
Maytsay nación runakunapa nawpanchömi alabashayki.
10 (11) Kuyamashqaykita manami imanöpis tantiyayta kamäpakütsu.
Jana patsachöpis manami pipis qamno promitishqanta cumpliq kantsu.*
11 (12) Tayta Dios, gloriachöpis lapanpaq munayniyuqmi kaykanki.
Kay patsachöpis lapanta mandaqmi kaykanki.