Ezequiel
Ïdulu adoraqkunata castigananpaq nishqan
14 Juk ishkay Israel mayor runakunami wayïman chaykamur nawpäman jamakärirqan. 2 Tsaymi TAYTA DIOS kayno nimarqan: 3 “Runapa tsurin, kay runakunaqa ïdulukuna adorayman uman churakashqami karkaykan. Tsaymi imata tapukärimaptinpis mana wilapäshaqtsu.
4 “Paykunata kayno ninki: ‘TAYTA DIOSMI kayno nin: Mayqanikipis ïdulu adorayman umayki churakashqa karqa profëtaman tapukuq ama aywapäkuytsu. Aywapäkuptikiqa ïduluman yärakushqaykiman tupumi castigashaykipaq. 5 Tsayno castigaptï capazchari ïdulukuna adorayta kacharinkimanpis. Ïdulukunata adorashpaykimi mana cäsukärimankitsu’.
6 “Tsayno kaykaptinqa Israel runakunata kayno ninki: ‘TAYTA DIOSMI kayno nin: Ïdulukunata adorayta y melanaypaq mana alita rurashqaykita kacharir nishqäkunata cäsukäriy. 7 Noqata mana cäsukamashpan mayqan runapis ïdulukuna adorayman uman churakashqa kaykar profëtaman tapukuq aywaptinqa kikïmi castigashaq, Israel runa kaptinpis o Israelcho taq jäpa runa kaptinpis. 8 Tsay runawan kikï churakarmi lapan runakuna rikakunanpaq ushakätsishaq. Tsaynöpami kuyashqä runakunacho tsay niraq runakuna mana kanqanatsu. Tsayta rikarmi TAYTA DIOS kashqäta musyapäkunkipaq.
9 “ ‘Tsay runa tapukushqanta mayqan profëtapis wilakuptinqa tsay profëtatapis kuyashqä Israel runakunacho kaykaqtami ushakätsishaq. Imata wilakurpis noqa TAYTA DIOS pantakätsiptïmi lutankunata wilakunqa. 10 Tapukuq runatapis y lula profëtatapis castigashaqmi. 11 Tsaynöpami Israel runakuna mana qonqamanqanatsu ni jutsata mana ruranqanatsu. Paykunami kuyashqä runakuna kanqa. Noqanami paykunapa Diosnin kashaq’. TAYTA DIOSMI tsayno nin”.
Jerusalén runakunata castigananpaq nishqan
12 TAYTA DIOSMI kayno nimarqan: 13 “Runapa tsurin, maytsay nacionchöpis runakuna mana cäsukamar jutsata rurapäkuptinqa muchuywanmi castigashaq. Tsaynölami uywankunatapis ushakätsishaq. 14 Tsay nacioncho Noé, Daniel y Job taptinpis runakuna manami castïgupita qeshpinqatsu. Tsaypa trukanqa Noé, Daniel y Joblami ali kawashqanpita qeshpinqa”. TAYTA DIOSMI tsayno nin.
15 “Tsay nacioncho taq runakunata ushananpaq y pipis tsaypa mana purinanpaqmi mikukuq chucaru uywakunata kachashaq. 16 Tsayno castiganäpaq kaykaptï Noé, Daniel y Job tsay nacioncho tarpis manami warmi tsurinta ni olqu tsurinta salvayta kamäpakunqatsu. Tsaypa trukanqa kikilankunami salvakärinqa. Tsayno kaptinqa tsay nación chipyaqmi ushakanqa. Noqa TAYTA DIOSMI tsayno kananpaq jurä.
17 “Tsaynöpis intëru nacionta atacananpaq soldädukunata kachamuptï runakunata y uywakunata wanutsir ushaptinqa 18 tsay kimsan runakuna tsay nacioncho tarpis manami warmi tsurinta ni olqu tsurinta salvayta kamäpakunqatsu. Tsaypa trukanqa kikinkunalami salvakärinqa. Noqa TAYTA DIOSMI tsayno kananpaq jurä.
19 “Fiyupa rabyashpä tsay nacionman pesti qeshyata kachaptï runakunapis uywakunapis ushakaptinqa 20 Noé, Daniel y Job tsay nacioncho tarpis manami warmi tsurinta ni olqu tsurinta salvayta kamäpakunqatsu. Tsaypa trukanqa paykunalami ali kawaq kashqanpita pesti qeshyapita salvakärinqa. Noqa TAYTA DIOSMI tsayno kananpaq jurä.
21 “Noqa TAYTA DIOSMI kayno nï: Jerusaléncho pasaypa nakapäkunanpaqmi chusku castïgukunata kachamushaq. Tsay castïgukunami kanqa guërra, yarqay, mikukuq uywakuna y pesti qeshyakuna.* Tsay castïgukunawanmi runakunapis uywakunapis chipyaq ushakanqa.
22 “Tsaymi juk ishkaylana runakuna kawaykar quëdanqa. Paykunatami tsurintinta warmita olqutapis Babiloniaman prësu apakamunqa. Tashqaykiman chayamuptinmi ïdulukuna adoraykaqta y jutsata ruraykaqta rikapäkunkipaq. Tsayta rikarmi tantiyakärinkipaq imanir tukuy niraq castïguwan Jerusalénta pasaypa ushakätsishqäta. 23 Tsayraqmi tantiyakärinkipaq paykuna jutsata rurashqanpita Jerusalénta ushakätsishqäta”. TAYTA DIOSMI tsayno nin.