Jueces
Gaza markacho Sansón kashqan
16 Juk kuticho Sansón aywarqan filisteo runakunapa markan Gazaman. Tsaychömi *wayrapakuq warmipa wayinman aywaykur paywan punurqan. 2 Markancho kaykashqanta musyarmi Gaza runakuna jiruruypa churanakur marka yaykuna punkucho täparqan kayno wilanakushpan: “Patsa wararkuptinnami tsarirkur wanuratsishun”.
3 Sansónqa pulan paqasyaqlami punurqan. Tsay hörami aywakur markaman yaykuna punku wichqaraykaqta tarirqan. Tsaymi punkuta jorqurir quiciuntinta trancantinta umrukurkur apakurqan Hebrón tsimpan jirkanyaq.*
Dalilata Sansón namurashqan
4 Tsaypita qepatanami Sorec pampacho taq Dalilatana Sansónqa kuyakurkurqan. 5 Tsayta musyaykurmi filisteo runakunapa mandaqninkuna aywaykur Dalilata kayno nirqan: “Sansónpa kalpan tsayjinanpa imano kashqanta y payta imano vincinantsipaq kashqantapis musyanantsipaq kuyaq tumpala tapunki. Wilamaptikiqa imanöpapis prësu tsariykurmi liyapäkushaq. Nirkur juknï juknïmi pägashayki waranqa pachak (1,100) siclo qellayta”.*
6 Tsaymi Sansónta Dalila kayno tapurqan: “¿Imanöpataq tsayjinanpa kalpasapa kaykanki? ¿Imawan liyashuptikitaq kalpaynaq rikakunkiman?”
7 Tsayno tapuptinmi Sansón kayno nirqan: “Flëchapaq rurashqa qanchis manaraq tsakiq wanuwan liyamaptin kalpä manami kanqanatsu. Tsaynöpami wakin runanölana rikakushaq”.
8 Sansón nishqanta wilaykuptinmi filisteo runakunapa mandaqninkuna apaparqan qanchis manaraq tsakiq wanuta. Tsaywanmi Sansónta Dalila liyarqan. 9 Manaraq liyarmi Dalilaqa runakunata wayinman pakarqan. Tsaymi Sansónta liyarkushpan kayno nirqan: “¡Sansón, filisteo runakuna janaykichönami!”
Tsayno niptinmi Sansónqa ismushqa hïlutano wanuta rachirirqan. Tsaymi filisteo runakuna mana tantiyarqantsu imanir aläpa kalpayuq kashqantapis.
10 Tsaypitanami Sansónta Dalila kayno nirqan: “¿Imanirtaq lulapämashqanki? Kananqa rasun kaqta wilamay. ¿Imano liyashuptikitaq mana qeshpinkimantsu?”
11 Tsawraqa Sansón kayno nirqan: “Manaraq imatapis liyashqan mushuq waskawan liyamaptinqa kalpä manami kanqanatsu. Tsaynöpami wakin runanölana kashaq”.
12 Tsaymi Dalilaqa mushuq waskawan liyarkur qayararqan kayno nir: “¡Sansón, filisteo runakuna janaykichönami!”
Tsay hörapis Dalilaqa runakunata maynami wayincho pakaraykätsirqan. Filisteo runakuna janancho kashqanta niptinmi Sansónqa llanu hïluta rachiqnöla waskakunata rachirirqan.
13 Tsaypitanami Sansónta Dalila yapay kayno nirqan: “¡Yapaymi lulapämashqanki! Kananqa rasun kaqta wilamay. ¿Imano liyashuptikitaq mana qeshpinkimantsu?”
Tsayno niptin Sansón kayno nirqan: “Kalwawan awashqaykiman qanchis piltäta awarkur shumaq takanki. Nirkurqa jawiraykaq estäcaman awata shumaq watanki”.
14 Tsayno niptinmi estäcaman shumaq wataykur qayararqan kayno nir: “¡Sansón, filisteo runakuna janaykichönami!”
Tsayno niptinmi Sansónqa punuykashqanpita sharkurkur estäcantinta tsutariykurqan.
15 Tsawraqa Dalila kayno nirqan: “Rasun kaqta mana wilaykämarqa ¿imanirtaq ‘kuyämi waylümi’ nimanki? Kimsa kutinami lulapämashpayki mana wilamankiraqtsu imanöpa kalpayki kashqantapis”.
16 Waran waran Dalila tsayno tapupaptinmi Sansónqa pasaypa lakikurqan. 17 Tsaymi Dalilata rasun kaqta wilashpan kayno nirqan: “Manaraq yuriptïmi nazareo* kanäpaq Tayta Dios akramashqa. Tsaymi iti kashqäpita patsa aqtsäta pipis mana rutumashqatsu. Aqtsäta pipis rutuptinqa kalpaynaqna rikakur wakin runanölami kashaq”.
18 Rasun kaqta wilashqanta musyaykurmi filisteo runakunapa mandaqninkunaman Dalila wilakatsirqan kayno nir: “¡Kanan itsanqa lapayki shapäkamuy! ¡Rasun kaqtami Sansón wilamashqa!”
Tsawraqa mandaqkuna promitishqannölami qellayta apakurkur Dalilaman aywapäkurqan. 19 Nirkurnami Sansónta Dalila melqaynincho punukätsirqan. Punukäkuptinmi juk runata qayaykur Sansónpa qanchis piltankunata rututsirqan. Tsaynöpa Sansón kalpaynaq rikakuptin 20 qayararqan kayno nir: “¡Sansón, filisteo runakuna janaykichönami!”
Tsaymi Sansónqa rikcharkur yarparqan imaypis salvakushqannöla salvakunanpaq kashqanta. Itsanqa mana musyarqantsu Tayta Dios manana yanapashqanta. 21 Tsawraqa filisteo runakunaqa jinan höra Sansónta prësu tsarirkur ishkan nawinta jorqurqan. Gaza markaman prësu apaykushpan bronci cadinawan watapäkurqan carcilcho rumi mulinuta tumatsinanpaq. 22 Tsaycho kaykaptinmi aqtsanpis yapay winarqan.
Sansón wanushqan
23 Tsaypitami filisteo runakunapa mandaqninkuna juntakaykur diosnin *Dagónpaq sacrificiukunata rupatsipäkurqan. Tsaycho kushikurmi tsay mandaqkuna kayno nipäkurqan: “¡Contrantsi Sansóntami diosnintsi Dagón munaynintsiman churamushqa!”
24 Sansónta rikaykurmi runakuna diosninta alabar kayno nipäkurqan: “¡Mikuynintsita ushakätsiq y wanutsimaqnintsi Sansóntaqa diosnintsi Dagónmi munaynintsiman churamushqa!”
25 Tsayno kushikärishpanmi kayno nipäkurqan: “¡Sansónta burlakunantsipaq carcilpita apamuy!”
Tsaymi carcilpita apaykuptin pasaypa burlakushpan templu tuknaraq ishkay columna chawpinman ichitsirqan.
26 Tsawraqa janchaqnin mözuta Sansón kayno nirqan: “Templu tuknaraq columnata yatatsimay tuknakunäpaq”.
27 Tsay hörami templu rurincho filisteo runakunapa mandaqninkunawan tsaytsika runakuna kaykarqan. Sansónta burlakushqanta rikäkurmi warmipis olqupis kimsa waranqano (3,000) templu janancho kaykarqan.
28 Tsaymi Sansónqa TAYTA DIOSTA manakur kayno nirqan: “TAYTA DIOS, kalpä yurinanpaq yapay yanapaykalämay. Tsaynöpami ishkan nawïta jorqushqanpita juk golpila filisteo runakunata ushakätsishaq”.
29 Tsayno manakurkurmi templuta tuknaraq ishkan columnakunaman tuknakurqan itsuq kaq makinwan jukaqman y alawqa kaq makinwan jukaqman. 30 Nirkurmi qayararqan kayno nir: “¡Filisteo runakunawan juntu ushakäshaq!”
Tsayno nir lapan kalpanwan columnakunata tanqariptinmi templu juchur nitirqan lapan runakunata y mandaqninkunata. Puntata wanutsishqanpitapis mas atska filisteo runakunatami tsay höra Sansón wanutsirqan.
31 Tsaypitami Sansónpa wawqinkuna y lapan aylunkuna aywar ayanta apakärirqan pampapäkunanpaq. Papänin Manoa pamparashqanman apaykurmi Sansóntapis pampapäkurqan. Tsayqa Zora y Estaol markakuna chawpinchömi kaykan. Sansónqa Israel runakunapa jueznin karqan ishkay chunka (20) watami.