Salmos

18 (2b) TAYTA DIOS, lapan shonqüwanmi qamta *kuyä.

Qammi valorta qomanki.

 2 (3) TAYTA DIOSQA tsapämaqnï qaqami kaykan.

Pakakunä y salvamaqnïmi kaykan.

Pay japalanmi Diosnï kaykan.

Amparakunä qaqami kaykan.

Paymanmi yärakü.

Escüdü karmi tsapäman.

Munayniyuq karmi imaypis salvaman.

Payqa altunnincho pakakunä machaymi kaykan.

 3 (4) TAYTA DIOSTAMI imaypis alabaläshaq.

Manakuptï conträkunapita imaypis salvamanmi.

 4 (5) Runata prësu tsarirkur liyaqnömi wanuypis janächöna karqan.

Imaykatapis apaq loqlanömi ushakätsimänanpaq karqan.

 5 (6) Wanuypis reyätanwanmi watakarkamarqan.

Ushakätsimänanpaqmi trampata churapämarqan.

 6 (7) Wanunäpaqna kashqanta yarparmi TAYTA DIOSTA manakurqä.

Yanapamänanpaqmi Diosnïta ruwakurqä.

Ruwakuptï templunpita patsami mayamarqan.

Fiyupa lakikur manakushqätami wiyamarqan.*

 7 (8) Patsapis fiyupami kuyurqan.

Jirkakunapa cimientunpis siksikyarqanmi.

Tayta Dios rabyakuptinmi lapanpis kuyurqan.

 8 (9) Senqanpitami qoshtaypis yarqamurqan.

Shiminpitami ninapis yarqamurqan.

Rawraykaq shanshatami aqtumurqan.

 9 (10) Ciëlu punkuta kicharir kikinmi urämurqan.

Chakin uraqanchöpis yana pukutaymi karqan.

10 (11) *Querubín *angilnin muntashqami pärimurqan.

Wayra jananchömi warakayla shamurqan.*

11 (12) Paypa pakakunanqa yanawyaykaq tsakaymi karqan.

Yanawyaykaq pukutaymi payta tsapakurkurqan.

12 (13) Elquyno chipchipyaylami nawpanpita yarqamurqan.

Runtu tamyawan rawraykaq shanshalami tamyamurqan.

13 (14) TAYTA DIOS jana patsapita rimamushqanqa räyunömi mayakämurqan.

Ciëlupitami poderniyuq Diospa vozninpis mayakämurqan.

Runtu tamyawan rupaykaq shansha chawpinpitami rimamurqan.

14 (15) Elquyninta flëchatanöraq jitamuptinmi conträkuna qeshpir wakpa kaypa aywakärirqan.

15 (16) Tayta Dios olqüpämuptinmi lamar rurinpis alayri rikakarqan.

Rabyar pükamuptinmi kay patsata tuknaraqkunapis rikakarqan.

16 (17) Jana patsapitami Tayta Dios yanapamarqan.

Lamar rurincho talpukashqano kaykaptïmi makinwan jorqarkamarqan.*

17 (18) Munayniyuq conträkunapa makinpitami jorqamarqan.

Noqapita mas poderösu kaptinpis paymi salvamarqan.

18 (19) Pasaypa desgracia pasaykämaptinmi conträkuna atacamarqan.

Tsayno kaykaptïmi TAYTA DIOS yanapamarqan.

19 (20) Yanapamarmi aliman churamarqan.

Kuyamashpanmi salvamarqan.

20 (21) Munashqanno kawaptïmi jorqamarqan.

Alilata ruraq kaptïmi salvamarqan.

21 (22) TAYTA DIOS munashqannömi imaypis kawaykä.

Jutsata mana ruraypami payta imaypis qatiraykä.

22 (23) Nishqankunataqa lapantami yarparaykä.

Estatütunkunataqa imaypis cumpliykämi.

23 (24) Noqaqa pay munashqannömi kawashqä.

Lutan ruraykunapitapis witikushqämi.

24 (25) Alilata ruraq kaptïmi ima desgraciapitapis TAYTA DIOS tsapämashqa.

Jutsaynaq kashqäta musyarmi yanapamashqa.

25 (26) Tayta Dios, kuyapäkuqkunataqa kuyapankimi.

Alilata ruraqkunataqa yanapankimi.

26 (27) Ali kawaqkunataqa alimi rikaykanki.

Trampösu kaqkunatami itsanqa castigaykanki.

27 (28) Humildikunataqa salvaykankimi.

Runa tukuqkunatami itsanqa manakaqman churaykanki.

28 (29) TAYTA DIOSNILÄ, noqapaqqa atskinömi kaykanki.

Tsakäpakushqano kaptïpis qammi tantiyatsimanki.

29 (30) Yanapamaptikimi atska soldädukunatapis vincishaq.

Marka murällan altu kaptinpis achpaypami yaykushaq.

30 (31) Tayta Dios munashqanno kawayqa imaypis alimi kaykan.

Lapan promitishqantapis payqa cumplinmi.

Payman yärakuqkunataqa escüdunömi tsapan.*

31 (32) TAYTA DIOSPITA mas juk Diosqa manami kantsu.

Tayta Diosnintsinöqa manami pipis tsapämantsitsu.*

32 (33) Tayta Dios kikinmi kalpatapis qoman.

Pay pusharämaptinmi munashqanno ali kawä.

33 (34) Pay yanapamaptinmi luychunöraq warakayla aywä.

Puntakunapa purirpis mana lutskakaypami purï.

34 (35) Guërracho ali pelyaq kanäpaqpis paymi yachatsiman.

Bronci flëchata wimpitsinäpaqpis paymi kalpata qoman.

35 (36) Qamqa escüdü karmi imapitapis tsapämar salvamashqanki.

Alawqa kaq makikiwanmi tsararämashqanki.

Kuyapämarmi lapanchöpis yanapamashqanki.

36 (37) Qammi shumaq tantiyatsimashqanki maypa aywarpis munashqaykino kawanäpaq.

37 (38) Chikimaqnïkunatapis qati qatiykurmi ushakätsishqä.

Lapanta wanurkatsirraqmi jamaykushqä.

38 (39) Paykunataqa chipyaqmi ushashqä.

Vincishpämi majaypa majar ushashqä.

Manami paykunaqa yapay conträ sharkapäkushqatsu.

39 (40) Qammi guërracho pelyanäpaq kalpata qomashqanki.

Conträkunatami munaynïman churamushqanki.

40 (41) Vincinäpaq yanapamaptikimi kunkapita jarushqä.

“Tsaynöpami chikimaqnïkunata lapanta ushakätsishqä.

41 (42) Paykunataqa qayakuptinpis manami pipis yanapashqatsu.

TAYTA DIOSTA manakuptinpis manami cäsushqatsu.

42 (43) Polvuta wayra apar elqätsishqannömi paykunataqa elqätsishqä.

Mituta cällicho jarushqannömi paykunataqa ushakätsishqä.

43 (44) Israel nacioncho conträ sharkapäkuptinpis qammi salvamashqanki.

Juk nacionkunapa mandaqnin kanäpaqmi churamashqanki.

Jäpa runakunami kanan sirviykäman.

44 (45) Juk lädu nación runakunapis munaynïchömi kaykan.

Imatapis rurananpaq niptïqa paykuna juklami rurapäkun.

45 (46) Tsay jäpa runakunaqa mantsakamanmi.

Qayaptïpis pakarashqanpita siksikyaykarmi yarqapäkamun.

46 (47) ¡Alabashqa kaykulätsun TAYTA DIOS!

¡Alabashqa kaykulätsun tsapämaqnï!

¡Alabashqa kaykulätsun salvamaqnï Tayta Dios!

47 (48) Conträ sharkuqkunata qammi castigashqanki.

Lapan nación runakunatapis munaynïmanmi churamushqanki.

48 (49) Qammi chikimaqnïkunapita salvamashqanki.

Conträ sharkuqkunapita libramashqanki.

Wanutsikuq runakunapitapis tsapämashqankimi.

49 (50) Tsaymi may nacioncho karpis qamta adorashayki.

Lapan shonqüwan cantarmi qamta alabashayki.*

50 (51) Akrashqayki reyta lapanchömi yanapaykanki.

Davidta y paypita miraqkunatami imaypis kuyapaykanki.