Salmos

22 (2) Tayta Dios, Tayta Dios, ¿imanirtaq kachariykamashqanki?*

¿Imanirtaq mana salvamankitsu?

¿Imanirtaq lakikur manakamuptïpis mayamankitsu?

 2 (3) Tayta Dios, junaqpa manakamuptïpis manami yanapamankitsu.

Tsakaypa manakamurpis manami jawka kawayta tarïtsu.

 3 (4) Imano kaptinpis qamqa *santumi kaykanki.

Qamqa reymi kanki.

Qamtami Israel runakuna alabapäkushunki.*

 4 (5) Unay Israel mayïkunapis qammanmi yärakamurqan.

Yärakärimuptinmi imapitapis salvarqayki.

 5 (6) Manakärimuptinmi yanaparqayki.

Qamman yärakamuq runakunataqa manami kachaykurqaykitsu.

 6 (7) Tsayno kaptinpis kurunöla karmi mana cäsushqa kaykä.

Marka mayïkunapis asipämashpan manakaqmanmi churapäkaman.

 7 (8) Rikamaqkunaqa kushipämashpanmi asikärin.

Umantapis awirmi* kayno nipäkun:

 8 (9) “ ‘TAYTA DIOSMANMI yärakü’ nirqanchaq.

Yärakuptinqa salvatsun.

Rasunpa kuyarqa yanapananpaq mä shamutsun”.*

 9 (10) Tsayno nipäkuptinpis qam munaptikimi yurishqä.

Mamäpa melqaynincho jawka kanäpaqpis qammi yanapamashqanki.

10 (11) Manaraqpis yuriptïmi rikamarqayki.

Mamäpa pachancho kashqäpita patsami Diosnï kaykanki.

11 (12) Ama kachaykalämaytsu, Tayta.

Pasaypa lakikuychömi kaykä.

Kachaykamaptikiqa ¡piraq yanapamanqa!

12 (13) Chikimaqnïkunaqa ashtikuq* törukunanömi tumapaykäman.

Paykunaqa karkaykan Basáncho kaykaq kalpasapa törukunanömi.

13 (14) Mikanashqa leonkunanöraqmi qaparpaykan.

Shiminta äyakurkurmi noqaman cörripäkamun.

14 (15) Tsaymi yaku jichar ushakashqanno kalpäpis ushakashqa.

Tulükunapis pasaypami qotukaykan.

Shonqüpis tsuluykaq cëranömi ushakaykan.

15 (16) Shimïpis kankakaypami rupaykan.*

Qallüpis pasaypami tsakiykan.

Wanushqatanömi alpacho kachaykamashqanki.

16 (17) Conträkunaqa kanikuq alqunömi jiruruypa tumapaykäman.

Makïta chakïtapis kanimarmi ushaykamashqa.

17 (18) Tulükunapis yupariylapaqmi kaykan.

Kushipämarmi rikapaykäman.

18 (19) Röpätapis rakipänakushqami.

Mayqanpis apakunanpaqmi suertita jitapäkushqa.*

19 (20) TAYTA DIOSNILÄ, ama kachaykalämaytsu.

Qammi valorta qomanki.

Shamur jukla salvaykalämay.

20 (21) Runakuna wanutsimänanpita tsapaykalämay.

Tsay alqukunapa makinpita salvaykalämay.

21 (22) Tsay leonkunapita washaykalämay.

Tsay ashtikuq törukunapita qeshpiykatsilämay.

22 (23) Salvakuq kashqaykipitami wawqïkunata wilapäshaq.*

Paykunawan juntakaykurmi alabashayki.*

23 (24) TAYTA DIOSTA *mantsakuqkuna, payta alabapäkuy.

Jacobpita miraqkuna, payta adorapäkuy.

Israelpita miraqkuna, payta respitapäkuy.

24 (25) Tayta Diosqa nakaycho kaqkunata kuyapanmi.

Mana qonqaypami paykunata yanapan.

Manakuptinqa mayanmi.

25 (26) Runakuna juntakashqanchömi alabashayki.

Mantsakushuqnikikunapa nawpanchömi promitishqäkunata cumplishaq.*

26 (27) Waktsakunaqa saksashqanyaqmi mikupäkunqa.

TAYTA DIOSTA *ashiqkunaqa paytami alabapäkunqa.

Paykuna imayyaqpis kushishqami kawapäkunqa.

27 (28) May nacionpita karpis TAYTA DIOSMANMI yärakärinqa.

Mayqan aylupita karpis nawpanman qonqurpakuykurmi adorapäkunqa.

28 (29) ¡TAYTA DIOSMI mandamaqnintsi rey kaykan!

¡Paypa munayninchömi lapan nacionkunapis kaykan!

29 (30) Tsaymi munayniyuq runakuna kushikur adorapäkunqa.

Lapan runakunapis wanunanpaq kashqanta tantiyakurmi nawpanman qonqurpakärinqa.

30 (31) Tsurintsikunapis TAYTA DIOSTAMI sirvipäkunqa.

Paypitami imayyaqpis wilakärinqa.

31 (32) Alilata ruraq kashqantami qepa yuriqkunatapis wilapanqa.

Lapantapis cumplishqantami wilapanqa.