Salmos
Tayta Dios munayniyuq rey kashqanpita alabashqan
99 ¡TAYTA DIOSMI mandamaqnintsi rey kaykan!
*Querubinkunapa chawpinchömi trönunpis kaykan.*
Juzgaptinmi kay patsapis y lapan runakunapis siksikyanqa.
2 *Sión jirkancho TAYTA DIOS munayniyuqmi kaykan.
Kay patsacho kaq runakunata lapantami munaynincho tsararaykan.
3 ¡Munayniyuq y espantaypaq kashqanpita alabapäkuy!
¡Payqa *santumi kaykan!
4 Tayta Dios, munayniyuq reymi kaykanki.
Imaypis alilatami ruranki.
Intëru Israel nacionchömi imaypis ali mandanki.
5 ¡TAYTA DIOSNINTSITA alabapäkuy!
¡Nawpanman qonqurpakäriy!
¡Payqa santumi kaykan!
6 Moisés y Aarónmi sirviqnin cürakuna karqan.
Samuelnami imaypis payta manakurqan.
Paykuna manakäriptinmi TAYTA DIOS imaypis yanaparqan.
7 Pukutay ichiraykaqpitami Moisésta y Aarónta parlapämurqan.*
Paykunaqa leyninkunata lapantami cumplirqan.
8 TAYTA DIOSNILÄ, paykuna manakushuptiki mayarqaykimi.
Jutsata rurashqanpita castigarpis perdonarqaykimi.
9 ¡TAYTA DIOSNINTSITA alabapäkuy!
¡*Sagrädu jirkanninman aywaykur qonqurpakäriy!
¡TAYTA DIOSNINTSIQA santumi kaykan!