Jonás
Tayta Diosta Jonás manakushqan
2 (2) Tsawraqa pescädupa pachancho kaykarmi TAYTA DIOSTA Jonás kayno manakurqan:
2 (3) “TAYTA DIOS, pasaypa lakikur manakamuptïmi mayamashqanki.*
Wanunäpaqna kaykar qayakuptïmi salvamashqanki.
3 (4) Lamarman jitarpamaptikimi ruriyaq talpukashqä.
Lamar fiyupa pulchaqyar shamuqpis janäpami pasashqa.*
4 (5) Nawpaykipita qarqamashqaykitami yarpashqä.*
Tsaynöpis yarpashqä *sagrädu templuykiman imaypis manana yaykunäpaq kashqantami.
5 (6) Yaku pasaypa tsaparämaptinmi lamar rurincho kashqä.
Yaku rurincho qewa winamuqpis umämanmi laqakashqa.
6 (7) Pasaypa ruriyaqmi chayashqä.*
Mananami yarqamunäpaq kashqanta yarpashqänatsu.
Wanunäpaqna kaykashqäpita qammi salvamashqanki, TAYTA DIOS.*
7 (8) Wanunaykarnami qamta manakamushqä, TAYTA DIOS.
Manakamushqätami *santu templuykipita mayamashqanki.
8 (9) Ïdulukunata adoraqkunaqa Diospa kuyakuyninta wasqipanmi.
9 (10) Noqami itsanqa lapan shonqüwan agradëcikur sacrificiukunata qampaq rupatsishaq.
Qamta promitishqätaqa lapantami cumplishaq.*
Qamlami munayniyuq kaykanki pitapis salvanaykipaq”.
10 (11) Tsaymi TAYTA DIOS mandaptin pescäduqa lamar kuchunman Jonásta gumitarirqan.