Salmos

73 (1b) Israel runakunataqa Tayta Dios kuyanmi.

Shonquncho imaypis alilata yarpaqkunataqa shumaqmi yanapan.

 2 Tsayno kaykaptinpis noqaqa ichiklapami Tayta Diospita witikushqätsu.

 3 Jutsa ruraq runakuna rïcuyashqanta rikarmi fiyupa rabyakurqä.

 4 Paykunataqa manami qeshyapis tsarintsu.

Wanuytapis manami yarpantsu.

 5 Wakin runakunanöqa manami nakantsu.

Manami ima desgraciapis pasantsu.

 6 Ali chölu tukushpanmi purirkaykan.

Runa mayinta atacananpaqpis kamarikushqami karkaykan.

 7 Imaykankunapis kaptinmi werayaylawan nawinpis saltananraq.

Pasaypa lutan ruraylamanmi churakashqa karkaykan.

 8 Pïmaytapis manakaqmanmi churapäkun.

Pitapis maqananpaq o wanutsinanpaq jurarmi puripäkun.

 9 Tayta Diospa contranmi rimapäkun.

Runa mayinpapis contranmi sharkapäkun.

10 Tsayno kaykaptinpis paykunataqa runakuna alabapäkunmi.

Imata nishqantapis criyipäkunmi.

11 Tsay fiyu runakunaqa kaynömi nirkaykan:

“¿Imanöpataq lapanta Dios musyanqa?

¿Imanöpataq jana patsacho kaykarqa rikanman?”*

12 Tsaynömi fiyu runakuna karkaykan.

Tsayno karpis paykunaqa mana nakaylapami rïcuyarkaykan.

13 Noqaqa manakaqlapaqmi jutsata mana ruraypa kawaykä.

Yanqalapaqmi lutanta mana ruraypa kawaykä.

14 Waran waranmi mana alikuna pasaykäman.

Cada tutami nakaykä.*

15 Tsayno kaptinpis tsay yarpashqäkunata manami parlakütsu.

Tsaykunata rimarqa kuyashqayki runakunata rabyanätsïmanmi karqan.

16 Fiyu runakuna imanir ali kawashqanta manami tantiyayta kamäpakütsu.

17 Tayta Diospa templunman aywarraqmi tantiyakurqä.

Tsaychöraqmi tsay runakuna imano ushakänanpaq kashqanta tantiyashqä.

18 Paykunataqa ima desgracialapis pasanqami.

Ushakänanpaqmi Tayta Dios destinashqa.

19 Paykunaqa elaqpitami asulashqa kanqapaq.

Mantsakuylawanmi ushakanqapaq.

20 Runa sueñuyninta qonqashqannömi paykunapis qonqakanqa.

Tsayno kanqa castigaptikimi, Tayta Dios.

21 Shonqü pasaypa rabyanaptinmi jaqayashqa karqä.

22 Mana tantiyakuq upa runa karmi nawpaykicho uywano karqä.

23 Tsayno kaptïpis qammi yanapamanki.

Alawqa kaq makïpitami jancharämanki.

24 Yätsimarmi shumaq tantiyatsimanki.

Nirkurqa gloriamanmi pushakamankipaq.

25 Jana patsachöpis qamlami salvamaqnï kaykanki.

Kay patsachöpis makikicho karmi kushishqa kawashaq.

26 Kalpä ushakaptinpis y shonqü fiyupa lakikuptinpis qammi imaypis shakyätsimanki.

Kikikimi herenciä imayyaqpis kaykanki.

27 Qampita witikuqkunataqa chipyaqmi ushakätsinkipaq.

Mana cäsukuqkunataqa elqätsinkipaqmi.

28 Noqami itsanqa qamlaman imaypis yärakamushaq.

Qamman yärakamushqäqa lapanpitapis mas alimi kaykan.

Qammi kaykanki tsapämaqnï, TAYTA DIOS.

Yanapamashqaykitami pïmaytapis wilapäshaq.