Mana manchacushpanchi Jehovalaman yaracushun

1. David nishgannopis, ¿öraga imatataj noganchicunapis Jehovata nishwan?

JAUCA jaucala cawacuyta munarpis problemacunaga may chaycho caycanrämi, sasa tiempuchomi cawaycanchi. Unaypis rey Davidga laquicurganmi, chaymi Jehovata cayno nirgan: “¡Imayyaqraq pasaypa lakishqala waran waran purishaq!” (Sal. 13:2).

2. ¿Imapitataj canan yachacurishun?

² Cay caway vidachoga imacunapis laquichimäshunmi, pero ¿imatataj rurashwan waran waran laquicuycarla mana caycänapaj? Imacunapis yarpachacächimashwanmi o laquichimashwanmi, chaypaj caycan sojta shumaj consejucuna. Chay lapanta canan yachacurishun.

¿IMACUNATAJ YARPACHACÄCHIMASHWAN?

3. ¿Imacunataj yarpachacächimashwan, y cay lapanta alchayta puedishwanchuraj?

³ Imapis pasaptinga ‘cananga imataraj rurashaj’ ninchimi. Öraga laquicuycanchi guellaypäna, micuypäna, o imata visticunapaj o wasinchipäpis. Y juc runacunawan caycarga mana alicunata ruranapaj nimashwan, chaypis laquichimanchimi. Manami chaylachu, waran waranmi imaycatapis wiyaycanchi suwacojcunapita, wanuchicojcunapita. Y imayca mana alicunaga pasaycämun runacuna Diosta mana casucushpanmi. Diabluga musyanmi runacuna imaycancunapa yarpachacushganraycur Diosta manana sirvinanpaj (Mat. 13:22; 1 Juan 5:19). Awmi, cay munduga problemancunawan nitipacash caycan.

4. ¿Öraga imatataj nishwan problemacunapa pasar?

⁴ Problemacunapa pasarga shongunchipis nanämashwanrämi. Pipis ninmanmi ‘guellaynë ushacaycanna’ o pipis ninmanmi ‘gueshyäraycur aruynëmanpis aywänachu’. “¿Imaylapis fallashächuraj Diosta?” nirpis laquicushwanmi. Jinamanpis, masraj nacanapaj tiempo chayaycämunna. ¿Imacunaraj pasanga chay wichan?, caypis yarpachacächimanchimi. “¿Alichuraj caycan cay lapanpita yarpachacurga?” nirpis tapucushwanchi.

5. ¿Ima niytataj Jesús munaycargan ‘ama yarpachacäriychu’ nirga?

⁵ Gatejnincunatami Jesusga nirgan mana yarpachacärinanpaj (Mat. 6:25). Chauras, Jesusga niycargan ¿imalapitapis mana yarpachacunapaj?, manami ¿aw? Unay Diospa sirvejnincunaman yarparga, cuentata gocunchi paycunapis laquicärishganta, pero chaypitaga Diosninchi piñacurganchu (1 Rey. 19:4; Sal. 6:3).b ‘Ama yarpachacäriychu’ nirga, Jesusga niycargan problemacuna captinpis Diosninchilata sirvir caycänapaj. Chauras, ¿imatataj rurashwan alapa laquicuycunapa pasashganchi hora? (“Imaraj yanapämäshun” recuadrutapis ricay).

SOJTA SHUMAJ CONSEJUCUNA JAUCA JAUCALA GOYÄNAPAJ

6. Filipenses 4:6, 7 texto nishganno, ¿imata rurartaj alapa laquicuycarla mana cawashunnachu?

⁶ 1) Mana gongaypa Diosta ruwacuy. Laquicushgayqui hora Diosta ruwacurga shonguyqui aliyarcunmanmi (1 Ped. 5:7). Diosga wiyashunquipämi. “Paymi shonquykitapis yarpaynikitapis cuidanqa [...] mana lakikärinaykipaq” (leiriy Filipenses 4:6, 7). Jehovaga santo espiritunwanmi yanapämäshun laquicuycarla mana cawacunapaj (Gál. 5:22).

7. Diosta mañacurga, ¿imatataj payta wilapashwan?

⁷ Jehovata ruwacurga paypa nawpanman shonguyquita mashtapay. Imata wagaycächishunqui, imata nacaycächishunqui, chayta wilapay. Waquin problemacunaga alchacanmanmi, chaypaj Diosta mañacaramuy calpanta y yachayninta. Y mana alchacananpaj captinga Jehovata wilapay yanapäshunayquipaj, chaynopa laquicuy aywacunmanmi. Cayno rurar mañacurga ali clarumi ricäshun imano Jehová contestamashganchita. Jehová musyanmi imay hora contestamänanchipaj. Y caytapis manami gongashwanchu: waran waranmi Diostaga ruwacushwan (Luc. 11:8-10).

8. ¿Diosta mañacuycarga imata ninapätaj mana gongashwanchu?

⁸ Diosta mañacurga wagarpis wagapärishwanmi, chayno captinpis graciaslä nishwanmi imayca alicunata gomashganchipita. Y öraga capazchi shumajlaga wilapayta puedishunchu imano caycashganchita. Pero, “¡yanapaycalamay Tayta!” nishgalapis, Diosninchiga yanapämashwanmi (2 Crón. 18:31; Rom. 8:26).

9. ¿Pilamantaj yaracushwan yanapämänanchipaj?

⁹ 2) Jehovaman yaracuy, ama quiquiquilamanga. Unay Judá runacunaga manchacashgash carcaycargan. Asiria naciunshi atacananpäna caycargan. Chaynash, paycunaga Egipto naciunta yanapänanpaj mañacärergan. (Is. 30:1, 2). Jehovaga claro wilacurgan Egipto naciunwan mana juntacänanpaj (Is. 30:7, 12, 13). Isaiaswanmi wilacurgan imacunata rurapäcunanpaj. Isaías cayno nirgan: “Lakishqa kawapäkunaykipa trukanqa noqaman yärakamay” ninmi Jehová (Is. 30:15a).

10. ¿Imacunapa pasartaj Jehovaman yaracushwan? Tantiachicamuy.

¹⁰ ¿Imacunapa pasartaj Jehovaman yaracushwan? Mä ricärishun. Imaraj canman pipis nishuptiqui ‘guellayta tarinayquipaj nogawan arucushun’ pero tiempo canmannachu Diosta sirvinayquipaj. O mana testigo aroj masiqui nishunquiman ‘cuyaylapa canqui, nogawan cacushun’; o imaraj canman cuyashgayqui familiayqui cayno nishuptiqui: ‘pitataj más cuyanqui, nogata o Diosniquita’. Caycunaga shongunchita nanarcachinmanmi, pero yarpachacushunchu, Jehovaga yanapaycalämäshunmi (Mat. 6:33; 10:37, 1 Cor. 7:39). Alapa alimi canga cawayninchicho pay pushamanganchita jaguirga.

11. ¿Bibliacho imatataj yachacurishwan pipis chiquiycämaptinchi jaucala caycänapaj?

¹¹ 3) Unay Diospa sirvejnincunapita yachacuy. Bibliaga wilacun pïcunataj unay tiempucho mana manchacushpan Jehovaman yaracurgan. Paycunapita yachacurga alichi canman cuentata gocuptinchi imacunataj paycunata yanapashga waquincuna chiquiycaptinpis alapa mana manchacärinanpaj. ¿Manachu Jesuspa gatejnincuna yachachicur siguipäcurgan autoridäcuna ‘ama yachachicuynachu’ niycaptinpis? Awmi, apostulcuna sinchipa cayno nipäcorgan: “Runacunata wiyacunäpa ruquin nogacunaga Tayta Diostami wiyacushaj” (Hech. 5:29, TDI). Magapäcuycaptinpis paycunaga Diospa jutinchomi yachachicur siguipäcurgan, musyapäcurgan Jehová paycunawan caycashganta (Hech. 5:40-42). ¿Esteban pasashganta yarpanquichu?, wanushgan junajpita parlarmi Bibliaga nin: “Gagllanga caycaran anjilpa gagllannöraj”, cayga musyachimanchi wanushgan junaj jaucala caycashganta (Hech. 6:12-15). Payga musyarganmi Diospa nawpancho ali cajta ruraycashganta.

12. 1 Pedro 3:14 y 4:14 textucuna nishgannopis, ¿imanirtaj pipis chiquiycämaptinchipis cushi cushila Diosta sirvishwan?

¹² Diospa poderninwanmi apostulcunaga milagrucunata rurapäcuycargan, chaycho ricacargan paycunawan Jehová caycashganta (Hech. 5:12-16; 6:8). Paycunanoga milagrucunata rurayta puedinchichu pero noganchicunaga Bibliata charanchi, chaychomi Jehová nimanchi yanapämänanchipaj y espiritunwanga imayca mana alicunata vencishwanmi (leiriy 1 Pedro 3:14; 4:14). Chaurasga, sasa tiempo galaycunanpaj cajman yarpachacunapaj trucanga canan imataj ruraycashganchiman yarpachacushwan. Jehovaman yaracushun, ‘paymi yanapajnï’ nir. Chay wichan apostulcunanomi noganchicunapis cayno Jesús wilacamushganta yarpashwan: “Nogami tantiyachishayquipaj imata ninayquipäpis. Chauraga maygan contrayquipis manami ima niytapis camäpacongachu”. Caytapis nirganmi Jesús: “Imano ñacarpis nogaman yäracamorga salbashami canquipaj” (Luc. 21:12-19). Awmi, yaracushganraycur pipis wanuptinga Jehovaga manami gongarcungachu, sharcarachimungami o jatarachimungami.

13. ¿Imatataj yachacushwan Jehovaman mana yaracojcunapitapis?

¹³ Manami lapanchu unay tiempuchoga ali cajta rurapäcurgan, waquincunaga manami yaracärirganchu Jehovaman, paycunapitapis yachacuyta puedinchimi ¿imapaj?: rurashganta mana ruranapaj. Juc-caj caycan Judapa reynin Asá, galananchoga Jehovaman yaracurgan peliaj aywananpaj y ganarganmi, Dios yanapargan vencinanpaj (2 Crón. 14:9-12). Y nircurga, ¿imataj pasargan walca tropanlawan rey Baasapa contran peliaj aywaptin? Caychoga manana yaracurgannachu Jehovaman, chaypa trucanga siriucunata pagargan yanapänanpaj (2 Crón. 16:1-3). Wanunanpäna caycaptinpis Tayta Jehovata ashirganchu (2 Crón. 16:12).

14. ¿Imatataj yachacushwan rey Asá mana alicunata rurashganpita?

¹⁴ Más unaycho problemancuna cashga wichanga, Jehovatami ashirgan rey Asá, pero tiempuwanga chayta rurargannachu. Ganananpaj sirio runacunata ashinganta nirgunchi, chayga alinomi Asapaj caycargan, pero rasun cajchoga mana alimi cargan. Juc profetawanmi Jehová nirgan: ‘Gamga Siriapa reyninmanmi yäracushcanqui. Manami yäracushcanquichu Tayta Diosmanga. Chaymi Siria suldärucuna maquiquipita gueshpisha’ (2 Crón. 16:7). Pajta noganchicunapis quiquilanchiman yaracuycashwan, cawayninchichoga Diospa Palabranmi pushamashwan. Öraga ilajpitami imapis yuriycämunman, chaycho imata ruranapäga Jehovaman yaracurmi tranquilula yarpachacushwan.

15. ¿Imatataj rurashwan Bibliata leicuycarga?

¹⁵ 4) Biblia wilacushganta umachicurcuy. Mana manchacunapaj y Jehovaman yaracunapaj versiculucunata tariycurga, alichi canman chaycunata umachicurcuptinchi. Jina vozniquita jogarcur leiptiqui o imalamanpis guelgariptiquiga alapa alimi canga. Unay tiempuchopis Jehovaga Josueta nirgan leyta junajpa pagaspa leinanpaj y chayman yarpachacunanpaj, chaynopa más yachayniyojraj cananpaj, y leishgancunaga alapami yanapargan pipis contranman shapäcamuptin mana manchacunanpaj (Jos. 1:8, 9). Noganchicunatapis Diospa Palabranga yanapämäshunmi manchacushganchi hora o imayca mana alicunapa pasashganchi hora (Sal. 27:1-3; Prov. 3:25, 26).

16. ¿Congregacänapaj aywarga, imanotaj chaycho Jehová yanapämanchi?

¹⁶ 5) Cristiano masiquipita ama raquicaychu. Jehovapa jutinchomi paycunaga yanapämanchi mana manchacunapaj, yaracuyninchi ali cananpaj. Reuniuninchiman aywarpis shumajmi Diospita yachacunchi, mayna waquincuna comentarcaycanna, mayna waquincunapis cuyapaylapa parlapaycämanchi (Heb. 10:24, 25). Cuyashganchi hermanunchitapis ima laquichimashganta wilapanchi, chayga alimi. “Ali shimilanwan” pipis parlapämaptinchiga cushircachimashwanmi laquishga caycarpis (Prov. 12:25).

17. Hebreos 6:19 texto wilacushganno, ¿imacunata rurartaj guepaman mana cutishunchu?

¹⁷ 6) Ali caway chayamunanman yarparay. Ali caway chayamunanman yarpachacurga “guepaman mana cutiypa” imayca problemacunata aguantanapämi yanapämäshun (leiriy Hebreos 6:19, TDI). Jehovaga nimanchi canan nacachimashganchicuna shamoj tiempucho gongacashgana cananpaj (Is. 65:17). Mushoj Pachachona cashgayquita ricacuy, mana nacaypana, mana wagaypana cashgayquita (Miq. 4:4). Shamoj tiempulaman yarparaycänapaj jina yanapämäshun waquincunata ali wilacuycunata parlapashganchimi. Chaypäga predicaciunman yargunanchi y discipulucunata rurananchi. Chayno rurashpanchiga ‘Tayta Dios shuyaraycächimashganchita chasquishunpaj’ (Heb. 6:11).

18. ¿Imacuna masraj canga cay caway vidacho, y imatataj nimanchi Jehová?

¹⁸ Cay munduga ushacänanpäna caycan. Caway vidachoga problemacunaga masraj yuriycämungaraj, y laquicurpis laquicuycäshunrächi. 2021 watapaj acracämushga textuga shumajmi caycan, yarpächimanchi imayca problemacunapa pasarpis mana manchacuypa Jehovalaman yaracunapaj. Cay watachoga imayca rurashganchicunacho ricacämuchun Jehovapa awnicuyninman yaracushganchita, payga cayta nimanchi: “Lakishqa kawapäkunaykipa trukanqa noqaman yärakamay” (Is. 30:15).