Imanotaj unay profecía yanapäshunquiman

1. ¿Ima profeciatataj Jehová wilacamurgan Adanwan Eva juchalicuptin? (Génesis 3:15).

ICHIC tiempo pasaraptinla Adanwan Eva juchalicushganpita, miraynincuna shamoj tiempucho ali cawacunanpaj Jehová juc profeciata wilacamurgan. Jehová nishgantaga tarinchi Génesis 3:15 (leiriy) textucho.

2. ¿Ima nishwantaj Génesis 3:15 profeciapita?

² Cay profeciaga Bibliapa galanan caj libruchomi caycan y waquin librucunaga cay profeciawanmi tincun. Imanomi juc cuadernupa hojancuna mana mashtacänanpaj chaupincho engranpashga o jirashga caycan. Chaynolami Bibliapa waquin libruncuna y wilacushgancunaga Génesis 3:15 nishganwan tincun. Diosninchega wilacamurgan juc Salvamajninchita cachamunanpaj chaynopa Diabluta y gatirajnincunatapis ushacächinanpaj.b ¡Y cay wilacuyga cushichinmi Jehovata cuyajcunata!

3. ¿Imacunapitataj canan yachacushun?

³ Cay yachachicuychoga Génesis 3:15 textupitami parlarcushun y caycunapitami yachacushun: ¿pïcunapitataj chay profeciacho parlaycan?, ¿imanotaj cumplicuycargan? y ¿imanotaj canan wichan yanapämanchi?

¿PÏCUNAPITATAJ WILACAMUN CHAY PROFECIACHO?

4. ¿Pitaj culebraga caycan, y imanotaj chayta musyanchi?

⁴ Génesis 3:14, 15 textucunachoga wilacamun juc ‘culebrapita’ y culebrapa ‘miraynincunapitapis’, jina juc ‘warmipita’ y warmipa ‘miraynincunapitapis’. Y caycunata tantiarcunapaj Bibliami yanapamäshun.c Puntataga ‘culebrapita’ parlarcushun. Cay culebraga manami Edén jardincho rasunpa parlaycämoj uywacho cargan, sinoga ¿imanoparaj Jehová wilacushgan sentenciata juc culebralaga tantianman cargan? Y Bibliaga Apocalipsis 12:9 textucho nin ‘unay culebraga’ Satanás Diablo cashganta. ¿Y pïcunataj culebrapa miraynincuna.

5. ¿Pïcunataj caycan culebrapa ‘miraynin’?

⁵ Bibliacho ‘miraynin’ niptenga öraga tantiachicun pipis taytanno yarpar galaycuptin y munashganno cawacuptin. Chauraga culebrapa mirayninga caycan Jehovapa contrancho caycaj angelcuna y runacunapis, paycunaga Satanasno Jehovapa contrancho caycan. Chaychomi caycan Noé cawashgan wichan cielupita uramushgan mana ali angelcuna y Diablo munashganta ruraj runacunapis (Gén. 6:1, 2; Juan 8:44; 1 Juan 5:19; Jud. 6).

6. ¿Imanirtaj ninchi Génesis 3:15 wilacushgan warmiga Eva mana cashganta?

⁶ Cananga warmipitana parlarcushun. ¿Evachuraj cargan? Mana. Chay profeciaga nin warmipa miraynin culebrapa umanta jarur nitircunanpaj. Ricashganchinopis culebraga caycan Satanasmi. Chauraga Evapa miraynin juchasapa cashpan Satanasta ushacächinanpaj manami camäpacunmanchu cargan. Chauraga pitaj caycan.

7. ¿Imanotaj Apocalipsis 12:1, 2, 5, 10 textucuna yanapämanchi Génesis 3:15 wilacushgan warmi pï cashganta musyanapaj?

⁷ Bibliapa ushanan caj libro wilamanchi Génesis 3:15 wilacushgan warmi pï cashganta (leiriy Apocalipsis 12:1, 2, 5, 10). Chay warmiga manami runacunanochu, aychayojchu ni tuluyojchu. Chay warmipa chaquinchomi quilla caycan y 12 goylarniyoj coronata umancho jatiraycan. Nircur warmiga juc wamrata gueshyacurgan, chayga Diospa Gobiernun caycan. Cayga ninanmi warmiga cielucho caycashganta, chauraga warmipita parlarga parlaycanchi Jehovata cuyaj y cäsucoj angelcunapitami (Gál. 4:26).

8. ¿Pitaj caycan warmipa principal caj miraynin, y imaytaj chayman ticrargan? (Génesis 22:15-18).

⁸ Jina Diospa Palabranpa yanapacuyninwanmi tantiarcunchi warmipa principal caj miraynin pï cashganta. Chay mirayninga Abrahanpa mirayninmi canan cargan (leiriy Génesis 22:15-18). Y chaynomi cashga, Jesusga Abrahanpa mirayninmi cargan (Luc. 3:23, 34). Pero Satanasta ushacächinanpäga manami japalanchu caycanman cargan. Chaymi Jesús 30 watayoj caycar bautizacuptin Jehová santo espiritunwan acraycurgan Wamranman ticrananpaj. Chauraga chaypita pacha warmipa principal caj mirayninman Jesús ticrargan (Gál. 3:16). Nircur Jesús wanushganpita cawarimuptin Jehová camacächishga “munayniyoj cananpaj, rispitasha cananpämi”. Chaypitapis maquinmanmi “llapantami churasha cay pachacho cajtapis syëlucho cajtapis” y chaytaga rurashga “dyablu camacächishanta illgächinanpaj” (Heb. 2:7; Mat. 28:18; 1 Juan 3:8).

9, 10. 1) ¿Pïcuna mastaj warmipa miraynin caycan y imaytaj chayman ticraycun? 2) ¿Imapitataj canan yachacushun?

⁹ Warmipa mirayninga manami jucnaylachu canman cargan sinoga masrämi caycan. Chaypita parlarmi apóstol Pablo unay judiucunata y waquin naciuncunapitapis acrashga cristianucunata cayno nergan: “Jesucristuta chaskikur Abrahampita miraqnami kaykantsi. Tsaynöpami Abrahamta Tayta Dios promitishqanta noqantsipis chaskintsi” (Gál. 3:28, 29). Jehová juc cristianuta santo espiritunwan acraptin paypis warmipa mirayninman ticraycun. Chauraga warmipa mirayninga caycan Jesucristo y 144.000 cajcunapis (Apoc. 14:1). Paycunaga calpachacärinmi Taytan Jehová munashganno yarpapäcunanpaj y imatapis rurapäcunanpaj.

¹⁰ Canancama tantiashcanchina Génesis 3:15 pïcunapita wilacamushganta. Cananga yachacushun Jehová aunicushganta imano cumplicuycargan y nircur ricashun chay profecía imanotaj canan wichan yanapämanchi.

¿IMANOTAJ CHAY PROFECÍA CUMPLICUYCARGAN?

11. ¿Imanotaj warmipa mirayninpa talunninta culebra canircushga?

¹¹ Génesis 3:15 nin culebraga warmipa mirayninpa ‘talunninta canircunanpaj’. Chayga cumplicurgan Satanaspa maquincho caycaj judiucuna y romanucuna Diospa Wamranta wanuchiptin (Luc. 23:13, 20-24). Pipapis talunnincho juc herida captenga juc tiempupaj japayta puedinmanchu. Chaynolami Jesuspis wanushga captinmi imatapis rurayta puedirganchu, quimsa junajcunano pamparashga caycargan (Mat. 16:21).

12. ¿Imay y imanotaj Jesusga culebrapa umanta jarurcur nitircunga?

¹² Génesis 3:15 niycargan warmipa miraynin culebrapa umanta jarurcur nitircunanpaj y chaypäga Jesús wanushgala manami caycanmanchu cargan. Chauraga Jesuspa talunnincho herida japuy caycashganga alchacanman cargan. ¡Y chaynomi cashga! Pay quimsa junajcuna wanushga caycaptin cawarimurgan espirituno cielucho caycänanpaj. Y Satanaspa horan chayamuptin ushacächenga (Heb. 2:14). Jesuswan gobernapäcamojcunaga yanapangami cay Pachacho Diospa chiquejnincunata chipyaj ushacächinanpaj (Apoc. 17:14; 20:4, 10).d

¿IMANOTAJ CHAY PROFECÍA YANAPÄMANCHI CANAN WICHAN?

13. Cay profecía cumplicushganga, ¿imanotaj yanapämanchi?

¹³ Gam Diospa sirvejnin captiquega cay profeciapa cumplimientun mayna cawayniquicho yanapaycäshunqui. Jesusga cay Pachacho juc runano yurirgan y Taytan imano cashganta yachachimashcanchi (Juan 14:9). Pay ima rurashgancunawan yanapämashcanchi Jehovata reguinapaj y cuyanapaj. Jina canan wichan yachachicuynincunapita y congregaciunta imano pushaycashganpita imaycatami yachacunchi. Jesús yachachimashcanchi imano cawacushganchiwan Jehovata cushichinapaj. Y wanuyninga lapanchitami yanapämanchi. Jesús cawarircamur cieluman cuticurgan y pay yawarninta jichashganwanmi Jehová “llapan juchanchïpita perdunamanchi” (1 Juan 1:7).

14. ¿Imanotaj musyanchi Edén huertacho Jehová wilacushganga jucla mana cumplicunanpaj? Tantiachicamuy.

¹⁴ Edén huertacho Jehová wilacushganga manami jucla cumplicunmanchu cargan. Más tiempurämi pasanman cargan warmipa miraynin yurimunanpaj, Diablupis gatirajnincunata shuntananpaj chaynopa warmipa mirayninwan chiquinacärinanpaj. Cayga tantiachimanchi Diablupa maquincho caycajcunaga Jehovapa sirvejnincunata chiquicurcungapaj. Y tiempo pasariptin Jesuspis discipuluncunata wilacurgan chiquishga capäcunanpaj (Mar. 13:13; Juan 17:14). Guepa pachac watacuna pasashgancunacho chay profecía cumplicuycashgantami ricashcanchi. ¿Imanirtaj chayta ninchi?

15. 1) ¿Imanirtaj Satanaspa maquincho caycajcunaga unaypitapis masraj chiquimanchi? 2) ¿Imanirtaj Satanasta manchacushwanchu?

¹⁵ Jesusga 1914 watacho Reyman ticrashga y ichic tiempula pasariptin Satanasta cielupita gargamurgan. Chaymi Diabluga Pachacho imayca munashgancunata ruraycan, masraj ichiclacho ushacänanpaj cajta musyarir (Apoc. 12:9, 12). Pero chay junaj chayamunancama Diabluga pasaypa rabiashga caycan y Diospa sirvejnincunata nacaycächin (Apoc. 12:13, 17). Chaymi Satanaspa maquincho caycajcunaga unaypitapis masraj canan chiquimanchi. Pero manchacushunchu Satanastawan gatirajnincunataga. Apóstol Pablo nishganno noganchipis cayno nishun: “Tayta Diosninchi faburninchi caycaptenga ¿pinataj contranchi jatarenga?” (Rom. 8:31). Aumi Jehovaman lapan shongunchiwan yäracushun, ricashganchinopis Génesis 3:15 profeciaga casi lapan cumplicuycanna.

16-18. ¿Imataj nipäcun Curtis, Ursula y Jessica Génesis 3:15 profeciata tantiacushganpita?

¹⁶ Jehová wilacushgan profecía Génesis 3:15 textuchoga yanapämanchi imacuna captinpis aguantanapaj. Curtis wauguinchega Guam islacho misioneruno yanapacun, cayno nin: “Öraga problemacunapa pasashgäga alapa laquichimargan y Jehovapitapis casi casi carupächimashga. Pero Génesis 3:15 profeciaman yarpachacushgämi yanapämashga Taytalä Jehovaman yäracur caycänäpaj”. Payga shuyaraycan lapan nacachimashganchicunata Jehová ushacächinanpaj junaj chayamunanpaj.

¹⁷ Ursula paninchega Baviera marcapita (Alemania) caycan y pay Diospa Palabranman yäracunanpäga Génesis 3:15 wilacushganta tantiacushganshi yanapargan. Payga cuentata gocurgan waquin profeciacunapis Génesis 3:15 nishganwan tincushganta. Payga nin: “Cushicurgä tantiarcuptë juchapita y wanuypita salvamänanchipaj Jehová chay profeciata wilacamushganpita”.

¹⁸ Micronesiapita Jessica paninchipis nin: “Yarpaycärami imano ricacushgäta rasunpa cajta tarishgäpita. ¡Génesis 3:15 cumplicuycashgantami cuentata gocurgä! Cay profeciata tantiarcurga yarpächiman cay caway vidaga Dios munashgannochu caycan. Sinoga Jehovata sirvishganchi canan ali cawacushganchipitapis shamoj tiempuchoga más aliraj cawacushun”.

19. ¿Imanirtaj ninchi cay profeciapa ushanan cajpis cumplicunanpaj cajta?

¹⁹ Ricashganchinopis Génesis 3:15 profeciaga cumplicaycanna. Cananga musyanchina warmipa miraynin y culebrapa miraynin pïcuna cashganta. Warmipa principal caj miraynin Jesusga wanushganpita cawarircamur, cielucho imayyajpis cawaj y munayniyoj Rey caycan. Jina walcalanami pishin warmipa jucaj miraynin cielucho lapancuna caycänanpaj. Chauraga Génesis 3:15 profeciapa galanan caj cumplicushgantana ricarga seguro caycanchi ushanan cajpis cumplicunanpaj: ¡Jesús culebrapa umanta nitircungapaj! Chauraga Satanás ushacächishga captenga Jehovapa sirvejnincunaga imaycamapis jaucala cawapäcunga. Chaymi chay junaj chayamunancama ama yamacäshunchu. Diosninchega shuyaran Payman yäracunanchipaj. Warmipa mirayninga yanapangami “kay patsacho pïmay runakunapis” bendecishga cananpaj (Gén. 22:18).