Liejcuna tapucärishgan
¿“Manami alli goyayna cananpächu shamushcä” Jesús nishgantaga imanotaj tantiarcushwan?
Jesusga yachachicurgan piwanpis jaucala goyanapaj. Ichanga juc cuticho discipuluncunata nergan: “Ama nogapaj yarpanquichu ‘Alli goyay cananpänami shamusha’ nerga. Manami alli goyayna cananpächu shamushcä. [...] Cananpitaga wamranmi papäninpa contran canga; warmi wamranmi mamanpa contran canga; llumchuyninmi suyranpa contran canga” (Mat. 10:34, 35). ¿Imanotaj Jesús nishgantaga tantiarcushwan?
Jesusga manami munarganchu familiacuna raquicäcunanpaj, pero payga musyarganmi discipuluncuna chaypaj pasananpaj. Chauraga pipis discipulun cayta munar bautizacuptenga yarpapäcunman rurashganga familiancunata mana cushichinanpaj. Y öraga Jesús mandashganta cäsucunapaj más sasami canman majan o maygan castanpis contranman ticraptin.
Bibliami cristianucunataga nimanchi: “Llapanwan ima-aycanöpapis alli caway-llapa” (Rom. 12:18). Pero öraga Jesús yachachicushgancunaga ‘espada’ japuy canman waquin familiacunapaj. Chayga pasanman juc familiacho mayganlapis Jesús yachachicushganta cäsucur galaycuptin, y waquincuna mana munanchu o contranchopis sharcun. Chauraga jinan wasicho goyajcunami contranman sharcunman Bibliapita yachacuptin (Mat. 10:36).
Jesuspa discipuluncunapa familiancuna juc religiuncho caycaptenga öraga sasami canman Jehovatawan Jesusta cäsucärinanpaj, castancuna inquietaptin ima fiestacunata o costumbritapis rurananpaj. Cristiano cajga acranman pitataj cäsucunanpaj. Jesusga nergan: “Pimi papäninta mamanta nogapita mas cuyan, chayga manami allichu disïpulö cananpaj” (Mat. 10:37). Chaywanga Jesús discipuluncunata manami niycarganchu taytancunata mana cuyananpaj. Jesusga yachachicuycargan yarpachacunapaj imataj más ali cashganta cawayninchicho. Chauraga mana Testigo caj castanchicuna michamaptinchi Jehovata sirvinapaj jinala cuyayculanchi, pero tantiarcunchi pipitapis masga Jehovata cuyanapaj.
Rasunpa cajchoga alapa laquichimanchi castanchicuna contranchiman sharcuptenga. Pero Jesuspa discipuluncunaga pay nishgantami cäsucunchi: “Wañunan captinpis noga munangänuyla mana cawarga discïpulü manam canmanchu” (Mat. 10:38, Biblia Ambo Pasco). Chauraga cristianucunaga musyanchimi Jesusta gatirashpanchi nacanapaj cashganta, chayga canman castanchicunapis contranchiman sharcuptin. Chayno captinpis jinala paycunata respetayculanchi y ali ricayculanchi, chaynopa tiempuwanga paycuna cambiarinman y Bibliapitapis yachacur galaycunmanmi (1 Ped. 3:1, 2).