Jehová pushamänanpaj jaguishcä

INGLATERRAPITA AFRICACAMA

1935 watachomi yurishcä Darlaston marcacho (Inglaterra), y tiyashgä marcacho achca fabricacuna captinmi “yana nación” nir reguipäcurgan. Chuscu watayoj caycaptëmi taytäcuna Jehovapa testiguncunawan Bibliapita yachacur galaycärirgan. 15 watapaj aywaycaptëna cuentata gocurgä yachacushgäga rasunpa cashganta, y 16 watayojna caycaptë bautizacurgä, 1952 watacho.

Chay wichanchomi, aruyta galaycurgä juc jatun fabricacho, chaychomi herramientacuna y carrucunapa piezancunata rurapäcoj. Y jefecunami yachachimar galaycärergan achca fabricacunapa secretariunno arunäpaj, chaymi cushishga caycargä.

Juc cutichomi congregaciuncunata watucaj waugui nimargan, Willenhall congregaciunnëcho Estudio de Libro de Congregación nishgan reuniunpita encargacunäpaj. Chaymi, “canancha cananlaga” nir yarpachacurgä. Chay wichan pulan semanacunacho juc congregaciunmanmi aywaycargä aruynëpita cercalancho, chayga cargan Bromsgrove marcacho, wasëpitaga caruchomi caycargan. Ushanan semanacunachomi ichanga taytäcunawan Willenhall congregaciunman aywaj cä.

Jehovapaj masta rurayta munaycargä, chaymi aunicushcä congregaciunta watucaj waugui nimashganta, aruynë alapa gustaycämaptinpis. Chay ali desiciunwanga Jehová pushamänanpaj jaguiycargä y tiempuwanga imaycata ruranäpaj caycargan.

Bromsgrove congregaciunman aywaycaptëmi, Anne jutiyoj cuyaylapaj panita reguiycurgä, payga Jehovata shumaj sirvej. 1957 watachomi casaracärirgä. Chaypitami ishcaläcuna precursor regularno, precursor especialno, congregaciuncunata watucacojno y betelchopis sirvipäcurgä, Annewanga cushi cushila goyapäcoj cä.

Jina masraj cushicunanchipaj 1966 watacho Bibliapita masraj yachacunanchipaj Galaad escuelaman 42 caj clasiman aywapäcurgä. Nircur Malaui naciunman aywapacunäpaj nipäcamargan. Chaychoga runacuna yachanaylapaj y ali pachächicoj cargan, ichanga musyarganchichu juc ishcay quillacunala chaycho caycänapaj.

ALAPA SASACUNA PASASHGAN MALAUI NACIUNCHO

Malaui naciunmanga chayarganchi 1967 watacho febrero quilla. Chayaycurnami runacuna parlashgan rimayta juc quilla goyay goyay yachachipäcamargan, nircurnami circuitucunata watucacunäpaj mandapäcamargan. Kaiser Jeep carruwanmi viajapäcushcanchi. May chaymanpis chay carruwan chayanapaj cargan, ichanga carreterapa achca yacu aywaycaptenga pasanapaj manami camäpacurganchichu. Öraga chacäpacur punucärej cä mituwan rurashga chuclacunacho. Chuclapa techuncho plasticucunatami churapäcoj cä tamya mana pasananpaj. Galaycunancho sasa captinpis, cushi cushilami Jehovata sirvipäcoj cä.

Abril quillachona mayapäcurgä problemacuna yuriycamushganta. Radiupa wiyargä Malaui naciunpa presidentin doctor Hastings Banda discursuncho nergan Jehovapa testiguncuna impuestucuna mana pagashganta y politicacunacho mana yanapacushganta. Ichanga payga lulacuycarganmi, paycunataga rabiachej neutral cashganchimi y politicacunacho mana yanapacushganchimi.

Setiembre quillapäna periodicocunacho yargurgan, presidentiga hermanunchicunata acusashganta may chaychopis problemacunata ruraycashganta. Juc jatun reuniunchomi wilacurgan Jehovapa testiguncuna imata rurashgantapis michäcunanpaj. Chayga galaycärergan 1967 watacho octubre quilla 20 junajcho. Nircur ichic tiempula pasariptin policiacuna y inmigración nishgan oficialcuna shapäcamurgan sucursalman wichgananpaj y misionerucunata gargunanpaj.

Quimsa junajcuna carcelcho wichgaraycashganchipita gargupäcamargan Mauricio naciunman, ichanga chay naciunpita autoridäcuna quedacunapaj mana munarganchu. Chaymi Jehovapa testiguncunata pushajcuna mandapäcamargan Rodesia naciunman (canan Zimbabue). Chayaycuptinchi, inmigración nishganpita manchanaypaj juc oficial michämashcanchi yaycunapaj cayno nir: “Malauipita gargushga capäcushcanqui. Mauriciuchopis quedacunayquipaj munapäcurganchu, y cayman imapätaj shapäcamushcanqui”. Warmë wagar galaycurgan, ¡pipis quedacunanchipaj munapäcurganchu! Chay hora Inglaterraman cuticuyta munaycargä. Nircur ichanga autoridäcuna sucursalcho posadacunäpaj nipäcamargan y pacha waraptin cuartelman aywanäpaj. Pasaypa uticashgami carcaycargä, ichanga Jehovalaman yäracuycarganchi. Waraynin tardipaypana autoridäcuna nipäcamargan Zimbabue naciuncho quedacunapaj visitanticunano, chay junajtaga imaypis gongashächu. Clarumi ricargä Jehová pushaycalämashganchita.

ZIMBABUEPITA MALAUI HERMANUCUNATA YANAPANCHI

Zimbabue sucursalcho nipäcamargan Malaui y Mozambique naciuncunacho caycaj hermanucunata yanapänäpaj, Departamento de Servicio nishgancho yanapacur. Malauicho hermanucunaga pasaypa gaticachashga carcaycargan. Chay naciuncho congregaciuncunata watucajcuna informicunata apachimashgancunata traducej cä. Juc chacay informita traducinäpaj tardicama quedacurgä, hermanucuna pasaypa nacapäcushganpita leir wagar galaycurgä.a Jina shacyächishga ricacurgä valurchashganpita, yäracushganpita y mana jaguicoj cashganpitapis (2 Cor. 6:4, 5).

Malauicho quedacushgan hermanucuna y gueshpir Mozambiqueman aywacojcuna yäracuynincuna sinchiyächinapaj, publicaciuncuna mana pishinanpaj imaycanopapis calpachacärirgä. Malauicho runacuna más rimaj idioma chichewa nishganman traducejcuna, Zimbabuecho caycaj juc jatun localman aywacärirgan. Juc hermanumi chacrancho chay localcunata sharcachir traductorcunata garaycurgan. Chaynopa, Bibliapita publicaciuncuna jinala yarguycargan.

Chichewa rimaycho juc jatun asambleata camacächishcanchi Malauicho caycaj congregaciuncunata watucajcuna yachacärinanpaj, chaychomi paycunaga temacunata chasquipäcoj y Malauiman cutipäcushgancho hermanucunata yachachinanpaj calpachacärej. Jina chay wichan juc watacho Zimbabue naciuncho Escuela del Ministerio del Reino nishgan camacächishcanchi, chay hermanucuna congregaciuncunata watucajcuna masraj valurcharcunanpaj.

1975 wata febrero quillacho, Mozambiqueman viajargä Malauipita gueshpej hermanucunata watucamunäpaj. Cay hermanucunaga Jehovapa testiguncunata pushajcuna camacächishgancunata shumaj musyargan, chaymi más ancianucunatapis acrargan. Chay mushoj ancianucunami shumaj camacächergan hermanucunapa yäracuyninta masraj sinchiyächinanpaj, discursucunawan yachachipäcunanpaj, junaj junajpaj acracämushgan textuta leipäcunanpaj, La Atalaya revistata leipäcunanpaj y asambleacunatapis rurapäcunanpaj. Chaycho carpacunacho tiyajcunaga asambleacho caycajnomi ricacoj, camacächishga caycargan pïcuna pichapacunanpaj, pïcuna micuycunata aypunanpaj y desorden mana cananpaj encargaducuna cananpäpis. Chay lapancunataga Jehovami bendiciycargan. Cuticunäpäna ¡ali shacyächishga ricacurgä!

Tiempuwan Zambiacho caycaj sucursalmi Malauicho caycaj hermanucunata ricaj. Pero Malauicho caycaj hermanucunata alapa cuyarmi paycunapaj mañacoj cä, waquincunapis noganochi ricacurgan. Zimbabue naciuncho caycaj sucursalchomi yanapacoj cä y achca cutimi juntacoj cä Testigucunata pushaj hermanucunawan, y chaychopis capäcoj Malaui, Sudáfrica y Zambia naciuncunacho yanapacoj hermanucuna. Imaypis cayno tapucärej cä: “¿Ima mastaraj rurashwan Malauicho caycaj hermanucunata yanapänapaj?” nir.

Tiempuwanga hermanunchicunaga alapa gaticachashga manami cargannachu, y ichic ichicla Malauiman cutipäcurgan. Jinan naciuncho quedajcunaga alapa nacapäcurgannachu. Chaymanpis chay partipita naciuncunaga respetapäcurgannami yachachicushganchicunata y mana michäcojnachu, chaynolami 1991 watacho Mozambique naciuncho autoridäcunapis rurapäcurgan. Ichanga jinala tapucuycarganchi: “Malauicho caycaj hermanunchicunaga, ¿imayraj librina predicapäcunga?” nir.

MALAUIMAN CUTIPÄCO

1993 watacho Malauicho mandajga, hermanunchicuna yachachicushganta mana michacunanpäna nergan. Ichic tiempula pasariptin juc misiunero tapumargan: “¿Malauiman cutinquichu?”. Chaypäga 59 watayojnami caycargä, chaymi cayno nergä: “¡Manana, cutinäpaj auquinnami caycä!”. Ichanga chay junajlami Jehovapa testiguncunata pushajcunapita juc mensajita chasquirgä, chaychomi invitapäcamargan Malauiman cutinäpaj.

Zimbabuecho yachachicuytaga gustapäcamajmi. Yachacashgana carcaycargä y ali amigucunatapis reguipäcurgä. Jehovapa testiguncunata Pushajcunaga nipäcamargan munaptinchega Zimbabuelacho quedacunapaj. Jinalancho quedacunapäga facilmi canman cargan. Ichanga Abrahanwan Sara rurashganman yarpapäcurgä, paycunaga auquinna caycarpis wasinta jaguirir Jehová mandashganman aywargan (Gén. 12:1-5).

Jehovapa marcan nishgannola cäsucur, 1995 wata febrero quilla Malauiman cutipäcurgä, 28 watacunana pasargan. Comité de Sucursal nishganta camacächishga cargan, y chaychomi noga ishcay hermanucunawan chay naciuncho Jehovapa testiguncuna imayca rurashgancunata ricar galaycurganchi.

JEHOVAMI WINACHIN

1993 watapita 1998 watacama cushicuypaj aypalami miraycushcanchi 30.000 publicadorcuna cashganchipita 42.000 cama.b Cada cadalami imaycata ruranapaj caycargan, chaymi Jehovapa testiguncunata Pushajcuna juc mushoj sucursalta sharcachinapaj nipäcurgan. Y Lilongüe marcacho chacracunata 12 hectariasta rantishcanchi, chaycho sucursalta sharcachinapaj comitecho arunapaj nipäcamargan.

2001 wata mayo quillacho, Jehovapa testiguncunata Pushajcunapita waugui Guy Pierce sucursal dedicashga cananpaj discursamurgan. Chay naciunpita hermanunchicuna 2.000 milpitapis masrämi shapäcamurgan. Casi lapancuna 40 watacunana Jehovata sirvircaycargan. Gaticachashga cashgan wichan imayca mana alicunatami nacapäcurgan. Chararashgancunaga walcalami cargan, Jehovalaman yäracushganga ichanga almiraypämi cargan. Cananga cay mushoj betelman shapäcamuptin cushishgala canticucunata cantaraycar entero sucursalpa puripäcun. Paycunata ricashgäga alapami cushichimashga. Aumi, clarumi caycargan Jehová paycunata aypala bendicishganta.

Sucursal sharcachishga cashganpitana Saloncuna dedicashga cananpäna mandapäcamargan. Malauicho hermanunchicunaga pobre capäcuptin Saloncunata rasla sharcachipäcunanpaj yanapacuycunatami chasquipäcurgan. Unayga hermanucuna shuntacärej eucalipto guerucunapita rurashga wasicunacho, ojshawan gatarashga y jamacunanpaj mituwan rurashga bancacunacho. Cananga hermanucuna quiquincuna ladrillucunata ruraycur y hornucunacho cuwaycur, cuyaylapaj localcunata sharcachipäcoj. Jamacunanpaj bancacunami gustaj, chaynopa juc maspis jamacunmanmi.

Jina cushicurgä Jehová runacuna paywan amigo cananpaj yanapashganta ricar, y masraj almiracurgä mozo hermanucuna yanapacunanpaj listo caycashganpita y yachachishganchicunata jucla yachacärej, chaynopa masraj yanapacärej betelcho y congregaciuncunachopis. Jina congregaciuncunata watucar chaylaraj galaycojcuna alimi shacyächipäcoj hermanucunata. Chay hermanucunapita casi lapancuna casaracushga caycarpis Jehovata más sirvinanpaj, wamrayoj mana cananpaj cuidacärej marca masincuna y familiancuna wamrayquicuna canman niptinpis.

CUSHICÖMI ALICUNATA ACRASHGÄPITA

52 watacuna Africacho caycaptëmi gueshyar galaycurgä, Jehovapa testiguncunata Pushajcuna aunicurgan Gran Bretaña sucursalman apapäcamänanpaj. Aywacuytaga manami munarganchichu, ichanga Gran Bretaña Betelcho alimi cuidapäcaman.

Jehová pushamänanpaj jaguishgäga alapa alimi cashga. Quiquë yarpashgälata rurarga maychoraj caycäman cargan. Jehovaga imaypis musyarganmi maypa aywanapäpis (Prov. 3:5, 6). Mozularaj caycaptë, juc jatun empresa imano arushganta musyayta munargä, ichanga Jehovapa marcan masraj yanapacunäpaj yachachimashganga alapami cushichiman. Aumi Jehovata sirvirmi más ali y cushishga cawarcaycä.