Plataformapa y letrerupapis fotun
1922 pasaj cien watacuna
“SEÑOR Jesucristuta kawaritsimurmi wanuypita Tayta Dios salvamantsi” (1 Cor. 15:57). Cayga 1922 watapaj acracämushga textumi cargan, chayga Bibliapita Estudiajcunata tantiachergan yäracushganraycur Jehovata sirvishganpita bendiciuncunata chasquinanpaj. Chaynomi cashga chay wata, cushi cushila yachachicojcunataga Jehová bendecirganmi. Aumi yanaparganmi quiquincunana librucunata impriminanpaj y radiupapis Diospa ali wilacuyninta yachachicunanpaj. Nircur chay watala Jehová marcanta bendiciycashganta clarumi ricacargan. Bibliata Estudiajcuna Cedar Point (Ohio, Estados Unidos) marcacho mana gonganapaj jatun asambleacho shuntacärergan. Chay jatun asambleami yanapashga Diospa marcanta, canancama Jehovapa voluntäninta ruraycänanpaj.
“NISHGANGA ALMIRAYPÄMI CARGAN”
Diospita yachachicunanpaj hermanucuna miraycuptinmi más publicaciuncunatami necesitargan. Brooklyn Betelchomi revistacunata rurapäcoj, ichanga hermanucuna librucunata rurananpäga jatun empresacunachorämi imprimichipäcoj. Achca quillacunapami walcala librucuna cashganraycurmi shumajraj manami yachachipäcojnachu, chaymi waugui Rutherford fabricacho aroj Robert Martin wauguita tapurgan librucunata impriminanpaj puedishganta o manapis.
Fábrica Concord callicho, Brooklyn (Nueva York) marcapita
Martin waugui cayno nergan: “Nishganga almiraypämi cargan, chaypäga fabricata más jatun camacächinapämi caycargan composición, galvanotipia, impresión y encuadernación ruranapaj”. Hermanucunaga juc edificiuta alquilapäcurgan calle Concord, número 18, Brooklyn marcacho, y necesitashgan maquinacunatapis rantergan.
Manami lapanchu cushicärergan chaypita. Unay librunchicunata imprimishgan empresapa gerentin mushoj fabricaman shamurgan ricananpaj, y nergan: “Ali maquinacunatami charanqui, ichanga pipis yachanchu imano utilizananpaj. Sojta quillacuna pasarcuptenga caycunaga jitarinapämi caycanga”.
Waugui Martin nergan: “Chay runa rasunpano nishgancuna captinpis, cuentaman churaycarganchu Señorninchi nogacunata yanapaycämashganchita”. Waugui Martin nishganga rasunpami cargan, ichic tiempulachomi 2.000 librucunano cada junaj rurapäcuycargan.
Fabricapa linotipias nishgancunapa laduncho caycaj arojcuna
RADIUWAN YACHACHICUNCHI CHAYCHICA RUNACUNAMAN CHAYANAPAJ
Waquin libruncunata mayna imprimiycarpis Jehovapa siervuncunaga radiupapis yachachicur galaycärirgan. 1922 wata, febrero quilla 26 junajcho, juc domingo tardipaypa waugui Rutherford yachachicur galaycurgan cay discursuwan “Chaychicaj canan cawajcuna imaypis wanunganachu”, KOG radiucho Los Ángeles (California, Estados Unidos) marcacho.
25.000 runacunanomi chay discursuta wiyapäcurgan. Chaypita waquincuna agradecicur cartacamurgan. Jucnin caj cargan Willard Ashford, Santa Ana (California) marcacho tiyargan. Paymi Rutherford wauguita felicitargan shumaj discursamushganpita. Jina caytapis nergan: “Radiupa mana captenga quimsa gueshyaycajcunawan discursuyquitaga manami wiyacushwanchu cargan, ni tiyashgä wasipa cercalancho rurapäcuptiquipis”.
Nircur gatej semanacunachopis más discursucunawan yachachicärergan. Chay wata ushananpäna The Watch Tower revistacho wilargan 300.000 runacunano radiupa chay discursuta wiyacärishganta.
Achca runacuna wiyacärishganta musyarmi, Bibliapita Estudiajcunaga decidipäcurgan Staten Island marcacho caycaj lotincho radiunpaj juc localta sharcachinanpaj, chayga caycargan Brooklyn Betelpita cercalancho. Gatejnin watacunacho Bibliapita Estudiajcunaga chay radiuta WBBR jutichiparcur utilizapäcurgan, Diospa ali wilacuyninta más runacunaman chayachinanpaj.
“ADV”
1922 wata, junio quilla 15 junajpita, The Watch Tower revistacho wilargan juc jatun asamblea cananpaj Cedar Point (Ohio) marcacho, 5 a 13 setiembre quilla 1922 watapita. Bibliapita Estudiajcunaga asambleaman chayar cushishgami caycargan.
Chay asambleapa punta caj discursucho Rutherford wauguiga cayno nergan: “Lapan shongüwanmi yäracö cay asambleata Señorninchi [...] bendecinanpaj, y imaypis mana yachachicushganchino ali wilacuycunata may chaymanpis chayachinapaj”. Waquin discursamojcunapis hermanucuna predicananpaj cutin cutinmi shacyächergan.
1922 wata, Cedar Point (Ohio) ruracashgan asambleacho chaychicaj aywajcuna
Viernes 8 setiembre quillapita, 8.000 runacunanomi chayargan Rutherford wauguipa discursunta wiyananpaj. Invitaciuncunacho “ADV” letracuna escribiraycajta tantiachimunanpaj shuyarpaycargan. Jamacärishgan horachomi achcaj jatuncaray piturashga caycajta ricapäcurgan. Arthur Claus waugui Tulsa (Oklahoma, Estados Unidos) marcapita shamur, shumaj wiyacunanpaj maycho jamacunanpaj ashiycargan; chay wichancunapäga sasami cargan wiyanapaj microfonucuna y parlanticunapis mana captin.
“Lapantami shumaj wiyarcaycargä”
Galanancho parlaj waugui wilacurgan discursuta mana chawachinanpaj junagäpacojcuna auditoriuman mana yaycunanpaj. Nueve y media tutami waugui Rutherford, Mateo 4:17 Jesús nishganpita parlar galaycurgan: “Tayta Diospa maquincho cawananchïpaj caycaj timpu chayamushanami”. Runacuna Diospa ali wilacuyninta imano wiyacunanpaj tantiachergan cayno nir: “Quiquin Jesusmi nergan cielucho gobernar galaycuptin cosecha wichan caycashganno payta cuyaj y cäsucoj siervuncunata lapancunata shuntananpaj”.
Waugui Claus wilacurgan: “Lapantami shumaj wiyarcaycargä”. Shumaj jamarashgami wiyacuycargan, ichanga ilajpita mana ali sienticuptin mana munaycarpis yargurgan. Musyarganmi yarguptenga mana yaycachinanpaj cajta.
Nircur alina sienticurgan. Jina wilacurgan cutiycaptinshi wiyaycajcuna maquincunata pajchiycajta wiyargan. Chayga alapa cushichergan. Chay shumaj discursuta wiyar siguinanpäshi, localpa jananpa achpananpaj yarpaycargan. 23 watayoj mozularaj caycaptinmi tejacunapa jananpa achpaycurgan. Achqui yaycunanpaj ventanacunaga quicharaycarganshi, y chaycunaman chayaycaptinshi cuentata gocurgan discursuga ali claro wiyacajta.
Arthur wauguiga manami japalanchu caycargan. Amiguncunapis tejacunapa janancho caycargan. Jucnin caj Frank Johnson corrirgan tapunanpaj: “¿Ali afilashga navajayqui cancu?”, nir.
“Canmi” nergan Arthur.
Franknami nergan: “Mañacuycarganchimi pilapis navayoj shamunanpaj. ¿Ricanquicu chay jatuncaray piturashga caycajta? Juc letrerumi, clavucunamanmi wataraycan. Jueztaa atentula wiyaycay. ‘Wilacäriy, wilacäriy...’ pay niptin, watucunata rogunqui”.
Arthurga navajanta aptashmi shuyaraycargan. Chaypitalanami waugui Rutherford discursunta ushananpäna caycargan. Pasaypa cushishga gaparayparaj nergan: “Señorpaj fiel y rasunpa testiguncuna capäcuy. Mana yamacaypa luchaycarla capäcuy Babilonia cajpita lapan gongacashga quedashgancama. Ali wilacuycunata may chaymanpis chayachipäcuy. Lapan runacuna musyachun Jehová Dios cashganta y Jesucristo mandajcunapa Mandajnin y señorcunapa Señornin cashganta. Cay junajmi imaypis mana gonganapaj caycan. ¡Reyninchi mandacaycämunna! Gamcunami wilacojnincuna caycanqui. Chauraga, wilacäriy, wilacäriy, wilacäriy Reyta y Gobiernuntapis”.
Arthur amiguncunawanga watucunata rogurgan, letreruga shumajmi shawacargan. Letreruga nergan: “Wilacäriy Reyta y Gobiernuntapis”. “ADV” letracuna cargan quimsa galanan letracuna inglés rimaycho advertise nishgan, chayga ninan “wilacäriy”.
MÁS ALI ARUY
Cedar Point marcacho ruracashgan asambleaga hermanucunata yanapargan masraj predicananpaj y listo caycajcunataga shacyächergan yanapacunanpaj. Juc colportor (cananga juc precursor ninchi) Oklahoma marcapita wilacurgan: “Yachachicurganchi carboncunata jorgushgan minacunacho, chaychoga runacuna wacchalami cargan”. Chaychoshi The Golden Age revistata runacuna chasquipäcuptin wagacärej. Jina walcalacho wilacurgan: “Cushicärëmi gamcunata shogapäcushgäpita”.
Chay Bibliapita estudiajcunaga cuentata gocärishga yachachicunanpaj urgente cashganta, Lucas 10:2 textucho Jesús nishganno: “Cosëcha poguraycajnömi chaychica runacuna caycan Diospaj shuntanapaj. Chaypis shuntajcunaga wallcajllami caycan”. Chay wata ushananpäga hermanucuna pasaypa shacyächishga caycargan may chaymanpis Diospa Gobiernunpita wilacärinanpaj.
a Öraga Misuri (Estados Unidos) marcacho juezno arushga captinmi Rutherford wauguita “juezno” reguipäcoj.