¿Listunacu caycanqui mushoj Pachata chasquinayquipaj?
LAPANCHIMI munanchi Jesús nishgan cumplicänanpaj, paymi nergan: “Kushishqami kawapäkunqa ali shonquyuqkuna. Paykunaqa herencian kananpaq mushuq patsatami chaskipäkunqa” (Mat. 5:5). Cielupaj aywajcunapis mushoj Pachata chasquipäcunga Jesuswan cielupita mandar galaycuptin (Apoc. 5:10; 20:6). Casi lapan Diospa sirvejnincunami ichanga mushoj Pachacho imaycamapis mayna tiyayta munapäcunchi. Juchaynajmi cashun, cushishgala y jaucala cawacushun. Ichanga shuyarashganchi cumplicänanpäga imaycatarämi rurananchi. Cay yachachicuycho caycunapitami yachacushun: cay Pacha juc Paraisuman ticrachishun, cawarimojcunata necesitashgancunacho yanapaycushun y paycunata yachachishun. Caycunata ruranapäga cananlapitanami calpachacushun, ¿imano? Chaytapis yachacushun.
PACHATA PARAISUMAN TICRACHINAPAJ ¿LISTUNACU CAYCANQUI?
Runacunata “kay patsa juntananyaq mirapäkuy” Jehová niptenga, niycargan cay Pacha imaylapis Paraisuman ticrananpaj (Gén. 1:28). Chaymi cay Pachacho imaycamapis cawacojcunaga chaytami ruranga. Armagedón usharcuptinlaga cay Pachaga manami paraisunochu caycanga, ¿imanir? Edén huertaga unaynami ushacashga cargan. May chaychopis pichanapämi caycanga. ¡Y ruranapäga aypalami caycanga!
Babiloniacho caycaj israelitacunaga marcanman cutipäcamuptin chaynomi rurargan, marcanga 70 watacunami purmayash y ragälami caycargan. Ichanga Jehová yanapaptinmi marcanta yapay sharcachinman cargan, profeta Isaías nishganno: “Chunyaj chaqui jircatami wertamanna ticrarachishaj. Chaura cangapaj Edencho cashan wertanömi” (Is. 51:3). Israelitacunaga marcan cuyaylapaj cananpämi arupäcurgan. Chaynolami, shamoj tiempucho cay Pachacho cawajcunapis Jehová bendiciptinmi cay Pachata enterunpa cuyaylapaj Paraíso cananpaj arupäcunga. Chay mushoj Pachacho cawacuyta munaptiquega maynami cananpita imata ruranayquipäpis caycannami.
Caycunatami ruranquiman: wasiqui y laduncunapapis limpio y ordenado caycänanpaj puedishgayquimanno cada cadalami pichapacunquiman, vecinuyquicuna mana pichapacuptinpis. Jina calpachacunquimanmi Salón del Reino y Jatun Asambleacuna ruracänanpaj localcunata pichapacuycho y alchaychopis yanapacunayquipaj. Puediptiquega, desgracia pasashgancunacho nacaycajcunata yanapacunayquipaj aywanquimanmi. Chayno yanapacuptiquega ricachicuycanquipaj necesitaycajcunata yanapacuyta munashgayquita. Tapucuy: “¿Ima habilidälatapis yachacömanchuraj yanapacunäpaj mushoj Pachacho cawacunäpaj Jehová nimaptenga?”.
CAWARIMOJCUNATA YANAPANAPAJ ¿LISTUNACU CAYCANQUI?
Jairupa warmi wamranta cawarcachimur Jesús nergan ima micuylatapis garananpaj (Mar. 5:42, 43). Chay jipashta atiendinanpäga manachi sasachu cargan. Y maynami yarpayninchicho ricashwan, imaycacunacho yanapacunapaj canga Jesús cay aunicuyta cumpliptin: “Imay junajllaga chayamongami pamparaycajcunapis rimashäta wiyanan junaj” cawarimunanpaj (Juan 5:28, 29). Biblia lapanta mana wilacuptinpis, cawarimojcunaga necesitapäcungami micuycunata, ropacunata y maycho posadacunanpäpis. ¿Cananlapitana ricachicunquimanchuraj chaycho caycar yanapacunayquipaj munashgayquita? Gatejnin tapucuycunaman yarpachacuy.
¿Imataj cananlapita ruranquiman mushoj Pachacho tiyanayquipaj listuna caycashgayquita ricachicunayquipaj?
Congregaciunniquicho watucamoj waugui shamunanpaj cashganta mayarcuptiquega, ¿‘micuyninta garanäpaj anotarcamay’ ninquichu? Juc betelita congregaciunniquicho precursorno yanapacur galaycunman o congregaciuncunata watucamoj juc waugui jucnopana yanapacunanpaj captenga, ¿yanapanquichu maycho tiyananpaj wasita tarinanpaj? O tiyashgayquicho juc jatun asamblea ruracänanpaj captenga, ¿manaraj galaycuptin o usharcuptinna imalachopis yanapacunquichu, o gorpacunata chasquinayquipaj aywanquichu?
CAWARIMOJCUNATA YACHACHINAPAJ ¿LISTUNACU CAYCANQUI?
Hechos 24:15 nishganga tantiachimanchi yupaytapis mana atipaypaj chaychica runacuna cawarimunanpaj. Paycunapitaga achcajmi manaraj wanur Jehovata mana reguipäcurganchu, mushoj Pachachomi ichanga reguipäcungami.a Wanushgancama Jehovata sirvejcunami paycunata yachachipäcunga (Is. 11:9). Charlotte jutiyoj pani pasaypami munaycun chay junaj chayananpaj, payga yachachicurgan Europa, Sudamérica y África naciuncunacho. Asicur nin: “Imanomi munaycö cawarimojcunata yachachinäpaj. Unaycho cawashgan pï runalapitapis leiptëga, achca cutimi cayman yarpä: ‘Chay runa Jehovata sirviptenga, jucnopachi cawaynin canman cargan’. Maynami munaycö chay runacunata Jehovapita yachachinäpaj”.
Unaypita achca Diospa sirvejnincuna imaycacunapita yachachicunanpaj caycanga. Cushicuypämi canga Daniel escribishgan profeciacunata imano cumplicushganta tantiachinapaj (Dan. 12:8). Mayraj cushicuypächi canga Rutwan Noemita yachachiptinchi castancunapita Mesías yurimushganta. Cushicuypämi canga Paraisucho runacunata yachachicuptinchi, chay wichanga chayta ruranapaj michamänanchipaj ni ima problemacunapis canganachu.
¿Imata rurartaj ricachicunquiman cawarimojcunata yachachiyta munaycashgayquita? Chaypäga calpachacunayqui ali yachachicoj canayquipaj y may chaychopis predicanayquipaj (Mat. 24:14). Ama yarpachacuychu edäniquiraycur o imaraycurpis munashgayquino yachachicuyta mana puediptiquega. Lapan puedishgayquilata ruraptiquega, cawarimojcunata yachachicunayquipaj listuna caycashgayquitami ricächicunqui.
Cayno tapucunquiman: ¿rasunpachu mushoj Pachacho cawayta munanqui?, ¿cushichishunquichu mushoj Pachata paraisuman ticrachinayquipaj yarpar, cawarimojcunata atiendinayquipaj y rasun cajpita yachachicunayquipaj musyar? Shamoj tiempucho imata ruranayquipaj cananlapita calpachacuptiquega, mushoj Pachacho cawanayquipaj listuna caycashgayquitami ricächicunqui.
a Ricäriy “Aypalatami ali cawananpaj yachachipäcunga” nej yachachicuyta, Wilacamoj revistapita 2022 watapita setiembre quilla.