‘Sagrädu nänilapa’ puriycäshun

1, 2. ¿Imatataj Babiloniacho tiyaj judiucunaga shumaj acrapäcunan cargan? (Esdras 1:2-4).

JUDIUCUNAGA 70 watacunanona Babilonia marcacho tiyaycargan, chayno captinpis segurumi caycargan Israel marcanman cutipäcamunanpaj (leiriy Esdras 1:2-4). Jehovapa yanapacuynilanwanmi chayta rurargan. ¿Imanir?, babiloniucunaga preso japuy caycajcunata chaynolaga manami cachaycojchu (Is. 14:4, 17). Ichanga tiempuwan mushoj mandacojna yaycurgan y nergan Judiucunata marcanman cutinanpaj. Chauraga lapan Judiucuna shumaj acrapäcunanpaj cargan Babiloniapita aywacärinanpaj o chaycho quedacärinanpaj. Pero waquincunapäga chayta decidipäcunanpaj manami facilchu cargan. ¿Imanir?, ricärishun.

² Waquin judiucunaga edayashga cashganraycur sasami cargan carutaraj viajapäcunanpaj, jina achca judiucuna Babiloniacho yurishganraycurmi chaycho wasinpis caycargan. Paycuna Israeltaga awiluncunapa marcantanolami ricargan, waquincunana Babiloniacho ricuyashganraycur alapa sasachi cargan shumaj negociuncunata jaguirir mana reguishgan marcaman aywapäcunanpaj.

3. ¿Imapätaj achca judiucuna Israelman cutiyta munapäcorgan?

³ Yäracoj judiucunapäga Israelman cutipäcamunanga imayca charashgancunapitapis más alimi cargan. Paycunaga musyargan Israelcho Jehovata shumaj adorapäcunanpaj. Babiloniachoga luta dioscunata adorapäcunanpaj templucunalami cargan, ichanga Jehovata adorapäcunanpaj templo y sacerdoticuna mana cashganraycur israelitacunaga sacrificiucunata rurayta puedipäcojchu. Jinamanpis chay marcacho Jehovata adorajcunaga walcajlami cargan. Chaymi Jehovata cuyaj waranga Judiucunaga marcanman cutiyta munarcaycargan chaynopa Jehovalata adurapäcunanpaj.

4. ¿Imatataj Jehová judiucunata aunirgan?

⁴ Babiloniapita Israelman chayananpaj chuscu quillanomi viajapäcunan, viajapäcushgancho ima sasacuna captinpis Jehovami aunirgan yanapänanpaj. Profeta Isaiaswan cayno nergan: Jehová Diospa “chunyaq jirkacho nänita altsapäkuy. Wenqu nänikunata derechapäkuy. […] Wiksu nänikunatapis derechapäkuy. Uchku uchkukunatapis pampatsapäkuy” (Is. 40:3, 4). Jircacunapa wichänan uränan aywananpaj trucanga Judiucunapäga más facilmi cargan quinralan nänipa aywapäcunanpaj, chaynopa rasla chayananpaj cargan.

5. Babiloniapita Israelman aywaj näni, ¿imataj jutin cargan?

⁵ Achca nänicunaga jutiyojmi caycan, chaynolami Isaías wilacushgan nänipis jutiyoj cargan. Bibliaga caynomi nin: “Tsay nänipa jutinmi kanqa […] Sagrädu Näni. Jutsata ruraq runaqa manami tsay nänipa purinqatsu” (Is. 35:8). ¿Imataj cayga cargan israelitacunapaj? ¿Y imataj caycan noganchipaj?

“SAGRÄDU NÄNI” UNAYCHO Y CANAN WICHAN

6. ¿Imanirtaj cay nänita sagrado nir jutichipargan?

⁶ “Sagrädu Näni” shumaj juti ¿au? ¿Imanirtaj chayno jutichipargan? Israel marcachoga manami permitirganchu pipis jucwan jucwan cacunanpaj, idulucunata adurapäcunanpaj, ni jatun juchata rurananpäpis. Cutipäcamoj judiucunaga Diospa “santu runakunami” capäcunan cargan (Deut. 7:6). Chayno captinpis Babiloniapita yargamoj judiucunaga calpachacunanrämi cargan Jehová munashganno cawapäcunanpaj.

7. ¿Ima cambiucunata judiucuna rurapäcunman cargan? Mä tantiachicamuy.

⁷ Yachacushganchino maychicaj judiucunaga Babiloniachomi yurergan, chaymi babiloniucunanona waquin judiucunaga yarpaytapis cawaytapis galaycärergan. Esdras mayargan naupa cajcho judiucuna Israelman cutipäcamojcuna juc naciunpita warmicunawan casaracärishganta (Éx. 34:15, 16; Esd. 9:1, 2). Chaypitana, Nehemiaspis pasaypa almiracorgan judiucunapa wamrancuna hebreo rimayta mana yachashganpita (Deut. 6:6, 7; Neh. 13:23, 24). Diospa Palabranga hebreo rimaychomi guelgaraycargan. Chauraga, ¿imanoparaj Diosta cuyanman y yachacunman hebreo rimayta mana yacharga? (Esd. 10:3, 44). Chaypäga, judiucuna cambiucunata rurananpaj calpachacärinanrämi cargan y más fácil canman Israel naciunchona cawaycar, chaychoga ichic ichiclapa Jehová Diosta yapay adurayta galaycärishga cargan (Neh. 8:8, 9).

8. ¿Imanotaj noganchita yanapämanchi sagrädo nänilapa purircaycänapaj? (Garancho caycaj dibujucunata ricay).

⁸ Öraga waquincuna caynochi tapucunman: “Judiucunata pasashganga almiraypämi. Pero ¿imanopataj noganchicunata yanapämanchi?”. Noganchipis judiucunano sagrado nänipa purircaycanchi. Cay nänicho caycarmi Jehovata hermanunchicunawan juc shongunola aduraycanchi y shamoj tiempucho achca bendiciuncunatapis chasquishun. Cielupa aywajcuna y cay Pachacho cawajcuna, chay sagrado nänilapa purircaycäshun (Juan 10:16).b 1919 watapita, chaychicaj olgu, warmi y wamracunapis Jatuncaray Babiloniapita yargupäcurgan y sagrado nänipa purircaycan. Capazchi gampis chaypita yargamushcanqui. Cay nänipa 100 watacunanona puriycarpis, Jehovaga más unaypitana cay nänita camacächergan.

SAGRADO NÄNITA MAYNA JEHOVÁ CAMACÄCHERGAN

9. Isaías 57:14 nishganno, ¿imata rurartaj Jehová chay sagrado nänita camacächergan?

⁹ Babiloniapita cutipäcamoj judiucuna Israelman alila chayananpaj Jehovami yanapargan (leiriy Isaías 57:14). ¿Canan wichanpis sagrado nänipa puriycänanchipaj Jehová yanapaycämanchicu? Aumi. 1919 watapita más unaypitanami, Jehovaga ali shongu runacunatami utilizargan chay sagrado nänita camacächinanpaj (Isaías 40:3 textuwan tincuchiy). Chay ali shongu runacunaga espiritual cajchomi imaycata rurapäcush, Jatuncaray Babiloniapita achca runacuna yargupäcunanpaj y Jehovalata adurayta galaycärinanpaj. Ma ricärishun imatataj rurapäcurgan chay ali shongu runacuna.

10, 11. ¿Runacunata yanaparganchuraj Bibliata juc rimaycunaman ticrachir y imprimir galaycuptin? (Dibujutapis ricay).

¹⁰ Bibliata imprimirgan. 1450 watacama Bibliataga maquilapa copiapäcurgan. Chayraycurmi Bibliata tarinapäga sasa cargan, y captenga chaninmi cargan. Pero, imprenta mäquinacunawanga más facilnami cargan Bibliacuna imprimicämunanpaj y runacunatapis aypunapaj.

¹¹ Bibliata juc rimaycunaman ticrachergan. Maychicaj watacunapami, Bibliaga latín rimaylacho guelgaraycargan y chay rimaytaga yachargan shumaj estudiashga runacunalami. Pero imprenta maquinacuna yargamushganwanmi Diosta cuyaj runacuna, Bibliata traducergan humilde runacunapa rimaynincho. Chaynopa cay runacunaga Diospa Palabranta tincuchergan iglesiancunacho wiyapäcushganwan.

12, 13. Wilacamuy 1800 watacuna wichan, ¿imanotaj Bibliapa rasunpa caj yachachicuynincuna yargamurgan?

¹² Bibliata shumaj yachacunapaj yanapacuycuna. Waquin runacuna Bibliata leir shumaj tantiacuyta galaycärergan. Chay yachacushgancunapitaga runacunatana wilapargan, chayraycur religiosucuna pasaypa piñacärergan. 1800 watacuna wichan, ali shongu runacuna achca publicaciuncunata jorgamurgan. Chaycho ricächicurgan religiuncuna yachachicushgancunaga lutan cashganta.

¹³ 1835 watacho Henry Grew runa, juc folletucho wilacamurgan imataj pasan wanuptinchi. Waquin luta iglesiacuna yachachicushganpita, payga Bibliawanmi tantiachicurgan mana wanuypa cawayga Diospa bendiciunnin cashganta. 1837 watacho, George Storrs religioso runa trencho viajaycashganchomi chay folletupa copianta tarergan. Leiycashgancho Biblia yachachishganta shumaj tantiargan, y waquintapis wilapar galaycurgan. 1842 watacho, “¿Fiyu runacunaga imaypis manachuraj wanunga?” nej discursuwan runacunata yachachergan. Jina chay discursunta guelgashganga Charles Taze Russell jutiyoj mozuta yanapargan.

14. Ali shongu runacuna rurashgancunaga, ¿imanotaj yanapargan Russellta y yanagajnincunata? (Dibujutapis ricay).

¹⁴ Cay lapancuna, ¿imanotaj yanapargan hermano Russellta y yanagajnincunata? Chay wichanpäga, diccionariucuna, Bibliapis achca rimaycho y waquin librucunapis cargannami. Chaycunaga alapa yanapargan Bibliata shumaj tantiananpaj. Jina Henry Grew, George Storrs y waquincuna Bibliapita guelgashgancunapis yanaparganmi. Russell yanagajnincunawanpis, yanapargan sagrado nänipa waquincunapis aywapäcunanpaj, chaypäga Bibliapita achca publicaciuncunata jorgapäcamurgan.

15. ¿1919 watacho imacunataj pasargan?

¹⁵ 1919 watacho, Jatuncaray Babiloniaga Diospa marcanta manana pantachergannachu. Chay watacho tantiaj y yäracuypaj esclavo yurimurgan, chayga alimi cargan. Paycunaga yanapargan ali shongu runacuna sagrädo nänipa puripäcunanpaj (Mat. 24:45-47). Naupacho ali shongu runacuna rurashgancunami yanapargan achca runacuna Jehovapita yachacur sagrado nänilapa puripäcunanpaj (Prov. 4:18). Jinamanpis cawaynincho cambiucunata rurapäcush Jehovata cushichinanpaj. Pero payga manami jucla ruranantachu munargan, sinoga siervuncunata ichic ichiclapa yanapargan (Ricäriy “Jehová marcanta yanapan ichic ichiclapa santo cananpaj” recuadruta). Cayman yarpay, ¿imanoraj ricacushun Jehovata lapancho cushichiptinchi? (Col. 1:10).

SAGRADO NÄNIGA MANAMI WICHGACÄCUSHGARÄCHU

16. ¿1919 watapita imataj rurapäcurgan “Sagrädu Näni” alchashga cananpaj? (Isaías 48:17; 60:17).

¹⁶ Juc ali nänipa purinapäga shumaj alchashga caycanman. Jatuncaray Babiloniapita chaychica runacuna yargupäcunanpaj 1919 watapita “Sagrädu Näni” alchashga y pichashga cashga. Chayta rurashga tantiaj y yäracuypaj esclavumi. 1921 watacho El Arpa de Dios nishgan libro yargamushga 36 rimaycunacho, cay libruga 6 millonisno aypushga cargan chaychica runacuna Bibliapita rasun cajta yachacärinanpaj. Jina chaylaraj ¡Cushishgala imaypis cawanapaj! libro jorgacämushga más runacunata Bibliapita yachachinapaj. Cay ushanan junajcunacho Jehová marcanwan yanapaycämanchi espiritual cajcho ali caycänapaj, chaynopa sagrado nänipa purir siguinapaj (leiriy Isaías 48:17; 60:17).

17, 18. ¿Maymantaj chay “Sagrädu Näni” apamanchi?

¹⁷ Pipis Bibliapita yachacuyta galaycuptin, sagrado nänipa puriyta puedinmanmi. Waquincunaga sagrado nänipa puripäcunnachu Bibliapita yachacuyta manana munaptin. Y waquincunana chay sagrado nänipa ushanancama chayananpaj calpachacärin. Chaura, ¿maymantaj chay näni apan?

¹⁸ “Sagrädu Näni” cielupaj aywajcunata apan “Tayta Diospa ñaupancho” imaycamapis cawapäcunanpaj (Apoc. 2:7). Y, cay Pachacho cawajcunataga cay näni apan Waranga Wata usharcuptin Jesús Gobernaycashganman, lapan runacuna juchaynaj capäcuptin. Gam, ¿maymantaj chayayta munanqui? Maymanpis chayanayquipaj captenga, guepaman ama cutiychu. Chay nänipita ama yargucuychu ali cawayman chayanayquicama. Lapayquicunatami ninchi “¡Alimi chay nänipa puriycanqui!”.