Jehová aunimanchi cay Pacha cuyaylapaj paraíso cananpaj

1. ¿Imataj profeta Isaiasga israelitacuna yarpächergan?

PROFETA Isaiasga musyarganmi Jehová rasun cajlata parlashganta (Is. 45:19). Chaymi israelitacunata yarpächergan Jehová nishgancunata imaypis cumplishganta. Y chayga claro ricacämun lapan aunishgancunata cumplishganchomi.

2. ¿Imanirtaj yäracushwan shamoj tiempupaj Jehová aunicushganman? ¿Ima tapucuycunatataj canan contestashun?

² Y noganchega, ¿yäracushwanchuraj shamoj tiempupaj Jehová aunicushganman? Pabluga nergan: “Tayta Dios […] imaypis mana lulakushqanta” (Heb. 6:18). Imanomi juc puquiupita mishqui yacula yargamun, chaynolami Jehovapis rasun cajlata parlan. Chaymi lapan Jehová nishgancunalaman yäracunanchi. Cananga cay tapucuycunapita yachacushun: ¿imataj Jehová aunicun shamoj tiempupaj?, y ¿imanirtaj seguro caycashwan lapan aunishgancunata cumplinanpaj?

¿IMATATAJ JEHOVÁ AUNICUSHGA?

3. 1) ¿Diospa maygan aunicuynintataj cumplicunanpaj shuyaraycanchi? (Apocalipsis 21:3, 4). 2) ¿Imataj waquincuna nipäcun Diospa aunicuyninpita?

³ Canan yachacunapaj caj aunicuyga, Jehovapa lapan sirvejnincunami shuyaraycanchi cumplicunanpaj (leiriy Apocalipsis 21:3, 4). Payga aunicun “wanuypis, waqaypis, lakikuypis y nakaykunapis” manana cananpaj. Y predicaciuncho Dios aunicushganwan runacunata shoganchi o consolanchi, jina yachachinchi paraisucho caway imano cananpaj. Pero chayta wiyarga waquincunaga nipäcun ‘¿chayga rasunpachuraj canman?’ nir.

4. 1) ¿Imatataj musyarganna Jehová? 2) Jehová aunimashganchina captinpis, ¿ima mastataj nimanchi?

⁴ Jehovami apóstol Juanta wilargan escribinanpaj paraisucho caway imano cananpaj, payga musyarganmi chaywan runacunata canan yachachicunapaj. Jina musyarganpis achca runacuna pay aunicushganman mana yäracunanpaj (Is. 42:9; 60:2; 2 Cor. 4:3, 4). Chauraga, ¿imanopataj runacunata yanapashwan Apocalipsis 21:3, 4 nishganman yäracunanpaj? ¿Noganchipis imataj rurashwan Jehovaman y aunicuynincunamanpis masraj yäracunapaj? Jehovaga manami aunimanchilachu imata rurananpaj, sinoga nimanchipis imano chaycunata cumplinanpaj cajta.

JEHOVÁ NIMANCHI AUNICUYNINTA IMANO CUMPLINANPAJ

5. ¿Imatataj nergan Jehová apóstol Juanta, y maychotaj chayta tarinchi?

⁵ Ricärishun imataj Jehová nergan apóstol Juanta paraisucho aunicuyninta cumplinanpaj. Juanga nin: “Trönucho jamaraykaqnami kayno nimurqan: ‘Lapantapis mushuqtami ruraykä’. Tsaypitanami kayno nimarqan: ‘Kay nishqäkunaqa rasun kaqmi kaykan. Tsawraqa kay nishqäkunata lapanta qelqay’. Nirkurnami kayno nimarqan: ‘Lapanpis cumplishqanami kaykan. Alfa y Omegami noqa kaykä. Qalaykunan y ushananmi kaykä’” (Apoc. 21:5, 6a).

6. ¿Imanotaj Apocalipsis 21:5, 6 nishganga yäracuyninchita sinchiyächin Diospa aunicuyninman?

⁶ ¿Imanirtaj Jehová nishgancunaman yäracushwan? Apocalipsis librumi cayno shumaj tantiachimanchi, nin: “Shamoj tiempupaj Jehová aunicushgancunaga quiquin firmanta churaycashganno caycan rasunpa cumplinanpaj”.b Apocalipsis 21:3, 4 cajchoga Jehová aunimanchi imataj rurananpaj, 5 y 6 versiculucunacho nishgancuna ichanga quiquin Jehová firmanta churaycashganno cumplinanpaj caycan. Ricärishun imanotaj Jehová aunishgancunata cumplingapaj.

7. ¿Pitaj parlaycan 5 caj versiculupa galaycunancho, y chayga imanotaj yäracuyninchita sinchiyächin?

⁷ Apocalipsis 21:5 textupa galaycunancho apóstol Juan cayno nir galaycun: “Trönucho jamaraykaqnami kayno nimurqan”. Chay visiunchoga Juan manami ricarganchu juc poderyoj ángel ni Jesús parlaycashganta, sinoga Jehová parlaycashgantami. Chaymi pay aunicushganman masraj yäracunchi, “Tayta Diosqa manami lulakuntsu” (Tito 1:2). Chaura Apocalipsis 21:5, 6 textucuna nishganmanga lapan shongunchiwan yäracunanchi.

“LAPANTAPIS MUSHUQTAMI RURAYKÄ”

8. ¿Imataj Jehová nimanchi aunicuyninman yäracunapaj? (Isaías 46:10).

⁸ Nircur quiquin Jehová cayno nin: “Lapantapis mushuqtami ruraykä” (Apoc. 21:5). Jehovapa aunicuynincuna shamoj tiempuchoraj cumplicunanpaj captinpis, payga mayna niycämanchi chaycuna rasunpa cumplicunanpaj. Chaymi shamoj tiempucho imacunata rurananpaj cajpita parlar, Jehovaga nin: “Ruranäpaq yarpashqätaqa lapantami rurä” (leiriy Isaías 46:10).

9. 1) ¿Imamantaj yarpächimanchi “lapantapis mushuqtami ruraykä” Jehová niptin? 2) ¿Imataj pasanga ‘nawpa kaq ciëluta y nawpa kaq patsatapis’?

⁹ Cananga masraj tantiarcushun Apocalipsis 21:5 caj versículo nishganta, chaychoga Jehová nin: “Lapantapis mushuqtami ruraykä”. Chay versiculuga yarpächimanchi imacunata Jehová trucachenga y imacunatataj alchachenga. Puntataga parlarcushun imacunataj trucachenga. Apocalipsis 21:1 cajchoga nin: “Nawpa kaq ciëlupis y nawpa kaq patsapis manami karqannatsu”. ‘Nawpa kaq ciëlo’ niptenga parlaycan Diablupa y demoniucunapa maquincho caycaj gobiernucunapämi (Mat. 4:8, 9; 1 Juan 5:19). Y Bibliacho Pachapita parlarga öraga parlaycämun cay Pachacho tiyaj runacunapämi (Gén. 11:1; Sal. 96:1). Chauraga, ‘nawpa kaq patsa’ niptenga parlaycämun Diosta mana cäsucoj runacunapämi. Jehovaga mana ali gobiernucunata y fiyu runacunatapis ushacächenga y trucachenga paypa Gobiernunwan y mushoj Pachacho cäsucoj runacunalami cawapäcunga.

10. ¿Ima mastataj Jehová ruranga?

¹⁰ ¿Ima mastataj Jehová ruranga? (Apoc. 21:5). Jehová cay Pachata alchachenga y runacunatapis yanapanga juchaynaj cananpaj. Profeta Isaías nishganno, cay Pachaga cuyaylapaj paraisuman ticranga. Noganchitapis tucuy gueshyacunapita aliyächimäshun. Mana purejcuna, mana ricajcuna y mana wiyajcunapis aliyächishga canga, jina wanushgacunapis cawarimunga (Is. 25:8; 35:1-7).

“NISHQÄKUNAQA RASUN KAQMI KAYKAN” Y “LAPANPIS CUMPLISHQANAMI KAYKAN”

11. ¿Imataj Jehová nergan Juanta guelgananpaj y imanir?

¹¹ Caytapis Jehová nergan apóstol Juanta: “Kay nishqäkunaqa rasun kaqmi kaykan. Tsawraqa kay nishqäkunata lapanta qelqay” (Apoc. 21:5). ¿Imanirtaj Jehovaga chayta nergan Juanta guelgananpaj? Nishgancuna rasunpa captin. Aumi, Paypa aunicuyninga yäracuypämi, imaypis cumplicunmi. ¡Juanga Jehovata jucla cäsucur chayta guelgashganga alipämi cargan! Chaymi canan musyanchi paraisucho caway imano cananpaj y yanapämanchi shamoj tiempupaj bendiciuncunaman yarpachacunapaj.

12. ¿Imanirtaj Jehovaga nin “lapanpis cumplishqanami kaykan”?

¹² Nircur Jehová cayno nin: “Lapanpis cumplishqanami kaykan” (Apoc. 21:6). Chaywanga Jehová niycämanchi lapan aunicuynincuna mayna cumplicushga cashgantanomi. Chauraga, imapis canchu michäcunanpaj Jehová munayninta rurananpaj. ¿Ima mastataj Jehová nimanchi aunicuyninman masraj yäracunapaj?

“ALFA Y OMEGAMI NOQA KAYKÄ”

13. ¿Imanirtaj Jehovaga nin ‘Alfa y Omega’ cashganta?

¹³ Juan ricashgan visiuncho Jehová quimsa cutipa cayno nergan: “Alfa y Omegami noqa kaykä” (Apoc. 1:8; 21:5, 6; 22:13). Chaywanga Jehová niycargan pay imatapis rurayta galaycuptenga, manami jamanchu ushananyaj.

14. 1) ¿Imaytaj Jehová ricächicurgan “Alfa” cashganta y imaytaj ricächicunga ‘Omega’ cashganta? 2) Génesis 2:1-3 nishganno, ¿imataj pasanga ganchis caj sagrado junaj usharcuptin?

¹⁴ Adantawan Evata camaycurna Jehovaga wilargan cay Pachapaj y paycunapäpis imata munashganta. Chaymi bendiciunninta gorgan cayno nir: “Kay patsa juntananyaq mirapäkuy. Munaynikicho katsun pescädukuna, päriqkuna y kay patsacho lapan kawaqkunapis” (Gén. 1:28). Chaywanga Jehová musyachicuycargan paycunapaj imata munashganta, chayno ricächicuycargan “Alfa” cashganta. Pero “Omega” cashganga ricacämunga shamoj tiempucho lapan aunicuynincuna cumplishgana captin y runacunapis juchaynajna captin. Tayta Dios “kay patsata y kay patsacho kaqkunata, jana patsata y jana patsacho kaqkunatapis. Lapanta kamarkurnami qanchis kaq” junajta sagrado junaj cananpaj churargan (leiriy Génesis 2:1-3). Jehová chay ganchis caj junajta camacächergan cay Pachapaj y runacunapäpis voluntäninta cumplinanpaj, chayga claro ricacämunga ganchis caj junaj usharcuptinrämi.

15. ¿Imanir-raj Diabluga yarpargan Jehovapa munaynin manana cumplicunanpaj?

¹⁵ Adanwan Eva juchalicushganpita, lapan miraynincuna juchasapa yurinchi y wanunchi (Rom. 5:12). Chauraga, ¿nishwanchuraj chayraycur Jehovapa munaynin manana cumplicunanpaj? Diabluga yarparganchi Adanwan Evata juchalachiptenga, Jehová munayninta manana cumplinanpaj y omega cashgantapis manana ricächicunanpaj. Chaura Jehovaga Adantawan Evata ushacächir juc mushoj runata y warmita camaycunman cargan munayninta cumplinanpaj. Pero chayta Jehová ruraptenga, Diablo tumpanman cargan lulacoj cashganta. ¿Imanir? Génesis 1:28 textuchoga Jehová Adantawan Evata aunirgan miraynincuna cay Pachacho junta cananpaj.

16. ¿Imapitataj Diabluga Jehovata tumpanman cargan?

¹⁶ Jina Satanasga yarparganchi Adanwan Evapa wamrancuna captinpis, paycunaga imaycamapis juchasapala cananpaj (Ecl. 7:20; Rom. 3:23). Chayno captenga, Diabluga Jehovata tumpanman cargan munayninta cumpliyta mana puedishganta. ¿Imanir? Jehovaga munargan Pachacho juchaynaj runacuna junta cananpaj.

17. ¿Imataj Jehová rurashga Satanás, Adán y Evapis contranman churacushganpita? ¿Waranga Watacuna usharcuptin imataj pasanga? (Dibujutapis ricay).

¹⁷ ¿Imataj Jehová rurargan alchachinanpaj Satanás, Adán Evapis contranman churacashganpita? (Sal. 92:5). Jehovaga jaguirgan Adanwan Evapa wamrancuna cananpaj, chaynopa ricächicurgan mana lulacoj cashganta. Nircur wilacurgan imanotaj Adanwan Evapa miraynincunata salvananpaj, chayta rurar ricächicurgan munaycashganta cumplinanpaj (Gén. 3:15; 22:18). Satanasga manachi yarpaylapis yarparganchu Jehová cuyashga Wamranta cachamunanpaj runacunaraycur wanunanpaj. Jehovaga chayta rurash runacunata amatar cuyashpan (Mat. 20:28; Juan 3:16). Satanás ichanga pasaypa fiyu car pitapis cuyapanchu, quiquilanman yarpachacun. Chaura, ¿imataj logracanga Jesuspa wanuyninwanga? Waranga Watacuna usharcuptin, Jehová munashganno Adanpa cäsucoj miraynincunaga juchaynajna caycar cuyaylapaj paraisucho cawapäcunga. Chaura Jehová munashganta cumplicuptin ricacämunga “Omega” cashganta.

YÄRACUYNINCHITA SINCHIYÄCHISHUN PARAÍSO RASUNPA CANANPAJ

18. ¿Imacunataj Jehová nimanchi aunicuyninman yäracunapaj? (“Caycunaraycurmi Jehovapa aunicuyninman yäracushwan” recuadruta ricay).

¹⁸ Canan yachacushcanchi imanirtaj yäracushwan cay Pacha juc paraíso cananpaj. ¿Imataraj waquincunata nishwan paycunapis chayman yäracunanpaj? Nishwanmi quiquin Jehová chayta aunimashganchita. Apocalipsis nin: “Trönucho jamaraykaqnami kayno nimurqan: ‘Lapantapis mushuqtami ruraykä’”. Diosninchega munaycanmi cumplinanpaj munayninta, y yachayninpis poderninpis caycanmi chayta rurananpaj. Jina seguro caycan munaynin ruracänanpaj, chaymi parlapämanchi mayna cumplicushgantanomi. Chaymi payga nin: “Kay nishqäkunaqa rasun kaqmi kaykan”. Caytapis nin: “Lapanpis cumplishqanami kaykan”. Jehová imatapis rurayta galaycuptenga, manami jamanchu ushanancama. Chaymi payga nin: “Alfa y Omegami noqa kaykä”. Jehová munashganta cumplicuptin, claro ricacämunga Satanás lulacoj cashganta.

19. ¿Imataraj ruranquiman waquincunapaj sasa captin yäracunanpaj cay Pacha juc paraíso cananpaj?

¹⁹ Predicaciuncho pilawanpis canan yachacushganchipita parlarga, quiquinchipa yäracuyninchipis masraj winanga. Apocalipsis 21:4 textucho caycaj ali wilaycuyta pilatapis leipaptinchi, ‘chayga rasunpachuraj canga’ niptenga, ¿imataraj ruranquiman? Ali canman 5 y 6 versiculucunata leipar shumaj tantiarcachiptiqui. Chayta ruraptiqui, paycunapis tantiacäringa imanirtaj yäracunman Diospa aunicuynincuna rasunpa cumplicunanpaj. Jehová aunishganga quiquin firmanta churashganno legal caycan cumplicunanpaj (Is. 65:16).