Munashgantami Hulda tarirgan
CHAYLARAJ guepa watacunacho Sangir Besar jutiyoj islaman (Indonesia) aywashga carga, lamarpa cuchuncho tincupäcunquiman cargan quimsa cristiana masinchicunawan. Chaycho runacunaga paycunata reguipäcun waquincunata yanapashganta Bibliata tantiananpaj, canan ichanga chayta manami rurapäcuycarganchu. Chauraga, ¿imataj rurapäcuycargan?
Isla de Sangir Besar (Indonesia norte cajcho)
Paycunaga lamarman yaycoj pelota niraj jatun rumicunata ashinanpaj, nircur lamarpa cuchunman jorgapäcoj. Sillacho jamacurna juc martilluwan rumita tacaj runtu niraj tamañun cashganyaj. Nircur rumicunata baldiman winarcur wasinpa apacärej. Chaura jatun costalcho rumi junta captinna, camiuncunawan apachicurgan, chay rumicunaga cargan carreteracunata rurananpaj.
Hulda, rumicunata shuntaycan
Jucnin caj cristianaga cargan Hulda. Payga waquincunapita más horacuna aroj familianta yanapänanpaj. Canan ichanga guellayta shuntayta munargan juc tablet-ta rantinanpaj, chaynopa JW Library® aplicaciunman yaycunanpaj. Payga musyarganmi chaycho caycaj videucunawan y folletucunawanpis más ali yachachicoj cananpaj y Bibliatapis masraj tantiananpaj.
Chauraga juc quilla masraj lapan junajcuna tutapa ishcay horacuna Hulda arurgan. Lapan rumicuna shuntashganga juc ichic camión casi junta cargan. Rurashganwanga guellaynin ayparganna tabletninta rantinanpaj.
Hulda tabletanta chararaycan
Hulda nin: “Rumicunata tacashgäpita pasaypa utishga ushargä y cuerpüpis nanämashgami. Pero, maquëchona tabletä captin, ima nanaytapis mayargänachu, cushish caycargä reuniuncho y predicaciuncho tabletäwanna caycar”. Pandemia galaycuptinshi payga tabletanwan conectacurgan reuniunpaj y predicaciunpäpis. ¡Alapami cushicunchi Hulda munashganta tarishganpita!