Jehová imapitapis chapämash payman yäracushgäpita

JEHOVATA REGUIRCUR PAYMAN YÄRACUR GALAYCÖ

1948 watachomi yurishcä Nigeria naciunpa ichic marcancho. Chay wichan tiyö Moustapha y mayor caj wauguë Wahabi Jehovapa testigunno sirvir galaycurgan. Isgun watayoj caycaptëmi taytäga wanucurgan. Chayga alapami laquichimargan. Wauguë nimargan, ‘papá cawarimuptin paywan tincushunmi’ nir, chayman yarpararmi Bibliapita yachacur galaycurgä. 1963 watachomi bautizacurgä y quimsa wauguëcunapis nircur bautizacärirganmi.

1965 watacho Lagos marcaman aywacurgä, chaychoga Wilson wauguëpis caycarganna. Alapa cushishgami caycargä Igbobi congregaciunpita hermanucunawan caycar. Paycunata cushishgala Jehovata sirviycashganta ricarmi, nogapis precursorno yanapacuyta galaycurgä 1968 watacho.

Betelcho yanapacoj, Albert Olugbebi hermanuga, juc reuniunta rurargan jovincunapaj y chaycho wilacurgan Nigeriapa norte caj läducho precursor especialcuna necesitashganta. Yarpaycärämi cushishga cayno nishganta: “Gamcuna joven cashgayquiyaj lapan tiempuyquiwan y calpayquiwanpis Jehovata sirvipäcunquiman y Nigeriachoga imaycata ruranapaj caycan”. Nogaga profeta Isaiasno rurayta munargä, chaymi juc solicitud apachicurgä (Is. 6:8).

Chaura mayo quilla 1968 watacho precursor especialno mandamargan Kano marcaman, Nigeriapa norte caj laduncho. Chay wichanga juc guerra civil caycargan y durargan 1967 watapita 1970 watacama. Chay guerraga Kano marcata ushacächergan, y más sitiucunamanpis chayarganraj. Juc waugui cutin cutin nimargan mana aywanäpaj. Pero noga nergä: “Päquila nogapaj yarpachacushgayquipita. Pero Jehová aywanäta munaptenga, pay imapitapis cuidamangami”.

GUERRARAYCUR IMAYCAPA PASARPIS JEHOVALAMANMI YÄRACUYCARGÄ

Kano marcacho guerraraycur pasashganga pasaypa laquicuypami cargan. Predicaciunman yargusquir ricapäcurgä runacuna wanushga jitaraycashganta. Chaychoga achca congregaciuncuna caycargan. Pero guerraraycur achca runacuna gueshpicäriptin 15 publicadorcunala quedargan, paycunaga manchacashga y guelanashga carcaycargan. Chaura, ¡alapami cushicärirgan sojta precursor especialcuna chayapäcushgäpita! Paycunata shacyächir yanapacärirgä reuniuncunata rurapäcunanpaj, predicapäcunanpaj, informincunata sucursalman apachicunanpaj y publicaciuncunatapis mañacunanpaj.

Precursor especialcunaga hausa nishgan rimayta yachacur galaycärirgä, y achcajmi ali chasquipäcamargan quiquinpa rimaynincho yachachicäriptë. Pero waquin religiosocunaga manami munarganchu predicapäcunapaj. Chaymi paycunapita cuidacärinä cargan. Juc cuticho, juc runa cuchillunta aptash gaticachamargan, pero compañeröwan paypita más rasla gueshpir aywacäriptë taripäcamarganchu. Chaycunapa pasarpis, Salmo 4:8 nishganno Jehová imapitapis cuidapäcamargan, tiempuwanga chaycho más publicadorcuna mirargan. Canan Kano marcacho 11 congregaciuncuna y 500 publicadorcunano carcaycan.

NÍGER MARCACHOPIS CHIQUIPÄCAMAN

Kano marcaman chayapäcushgäpita ichic tiempo pasariptinla 1968 wata agosto quillacho, nogatawan ishcay precursor especialcunata mandapäcamargan Niamey marcaman, chayga caycan Niger naciunpa capitalnin, África Occidental nishgancho. Níger naciunchoga alapami shanan. Jina francés rimaytapis yachacärinä cargan. Sasa captinpis, Jehovaman yäracur chaycho caycaj walca publicadorcunawan predicayta galaycärirgä. Y walca tiempulacho Niamey marcacho leiyta yachaj runacunaga La verdad que lleva a vida eterna nishgan libruta charapäcurganna Bibliapita yachacunanpaj. Waquincunaga chay libruta charayta munar ashipäcamarganraj.

Pero autoridäcunaga Jehovapa testiguncunata mana ali ricapäcurgan. 1969 wata julio quillacho chay naciuncho naupa caj asamblea ruracargan, y chaychoga shuntacargan 20 runacunano. Alapa cushishga carcaycargä ishcay publicadorcuna bautizacunanpäna caycaptin. Pero ilajpita policiacuna yaycamur congregaciunta watucoj wauguita y precursor especialcunatapis apacärirgan. Achca tapucuycunata rurapäcamargan y waraynin cutinapaj nipäcamargan. Chaura policiacunawan problema mana cananpaj, juc arregluta rurapacurgä juc wasilacho bautizacuyta munajcunapaj discursun ruracänanpaj y juc mayucho pacaylapa bautizacärirgan.

Semanacuna pasariptinla, nogatawan pichga precursor especialcunata chay naciunpita gargupäcamargan. Ishcay junajcunacho Níger naciunpita yargupäcunäpaj y quiquiläcunami chayta rurapäcunäpaj nipäcamargan. Chaura Nigeriacho caycaj sucursalman aywapäcurgä. Chaypitaga juc ladupana mandapäcamargan.

Nogataga Nigeria naciunpa Orisunbare marcaman mandapäcamargan. Chaychoga cushishga caycargä runacunata predicacur y waquincunatapis Bibliapita yachachicur. Pero sojta quillacuna pasariptin sucursalpita nipäcamargan noga japalä yapay aywanapaj unay caycashgä Níger naciunman. Chayman yarpar alapa manchacuycarpis, shongüchoga munaycargä Nigerpita hermanucunawan yapay tincuyta.

Niamey marcaman chayaptë, warayninga Nigeriapita caycaj juc runa cuentata gocurgan Testigo cashgäta y achca tapucuycunata rurapämargan Bibliapita. Chaura Bibliapita yachachicur galaycurgä, payga cigarro mucaytapis y upyaytapis jaguirgan, nircur bautizacurgan. Chay naciunpa achca marcacunacho predicar cuentata gocurgä ichic ichiclapa runacuna Diospita yachacuyta munashganta. Níger marcaman chayaptëga 31 Testigucuna cashga; y aywacuptëna 69 Testigucunana cargan.

“MUSYACANCHU HERMANUNCHICUNA IMANO CAYCASHGANTA GUINEA MARCACHO”

1977 wata diciembre quillapäga, Nigeria marcaman cutirgä juc capacitaciunta chasquinäpaj. Nircur Sucursalpita, Malcolm Vigo waugui juc cartata gomargan Sierra Leona naciunpita chasquishganta. Paycunaga ashiycargan juc japalan precursorta, ali saludyoj y ingleswan francesta parlajta Guinea-Conakri nishgancho caycaj congregaciuncunata watucunanpaj. Wauguinchi Vigo nimargan chaypäshi chay escuelaman invitamargan. Pero chayta ruranapaj sasa cashganta musyar pay nimargan: “Yarpachacuyraj cay asignaciunta manaraj chasquicur”. Ichanga noga nergä: “Jehová mandaycämaptenga, aywashämi”.

Sierra Leona naciunman chayaycur sucursalpita hermanucunawan shuntacärirgä. Juc waugui nimargan: “Musyacanchu hermanunchicuna imano caycashganta Guinea marcacho”. Guinea marcacho autoridäcuna problemacho cashganraycur sucursalpita hermanunchicuna musyapäcurganchu hermanunchicuna imano caycashganta. Achca cuticunachoshi sucursalpita juc wauguita mandayta munargan, pero manami puedirganchu. Chaymi nimargan Conakri marcaman aywanäpaj y papelnëcunata ruranäpaj chay marcapita cashgäta.

Chaura Conakri marcaman chayaycur, chay papelcunata imano jorgunapaj musyaj runawan parlargä. Guinea marcacho predicayta munashgäta nergä, pero payga nimargan chayta ruraptë carcelcho ushanäpaj o imapis pasamänanpaj. Nimargan: “Nigeriaman cuticuy y chaycho predicay”. Nogana nergä: “Manami cutishächu, quedacushämi”. Chaura chay runaga autoridäcunaman juc cartata apachicurgan y papelnëcunata jorgunäpaj yanapämargan.

Tiempuwanna Sierra Leona caycajcho sucursalman cutiycur hermanucunata wilapargä autoridäcuna imano yanapämashganta. Paycunaga alapami cushicärirgan Jehovapa bendiciunninwan chay marcacho permisuta taripäcushgäpita quedacunäpaj.

1978 y 1989 watacuna wichan Guinea y Sierra Leona naciuncunacho congregaciuncunata watucamojno yanapacurgä, y öraga Liberia naciunchopis chayno yanapacurgä. Caru marcacunata visitaptë galananlachoga cada cadala gueshyaj cä. Pero hermanuncunaga imanopapis hospitalcunaman apapäcamaj.

Juc cuticho malaria gueshya charimargan y pachächo curucuna caycargan. Aliyarcuycaptëna mayargä hermanucuna parlapacuycashganta maycho pampamänanpaj. Wanunäpäna caycaptëpis yarpaylapis yarpashgächu serviciüta jaguinäpaj. Musyämi Jehovalami imapitapis chapamänanchipaj cajta y wanuptinchipis paymi cawarichimäshun.

WARMËWANNA CAYCARPIS JEHOVALAMAN YÄRACÄRIRGÄ

1988 watacho Dorcas jutiyoj jipashta reguirgä, payga ñanpu shongu y Jehovata cuyaj warmi cargan. Casacärirna congregaciuncunata watucamojno yanapacur siguipäcurgä. Warmiläga cuyamajmi, chaymi imaypis camaricushga caycargan ima sacrificiucunatapis rurananpaj. Öraga juc congregaciunta watucärinäpaj juc junajtaraj chaquilapa aywapäcunä cargan guepïcunata apricurcur. Carucho caycaj congregaciuncunaman chayapäcunapäga, mitu o gocha caycashga nänicunapa viajapäcoj cä.

Dorcasga valientimi cargan. Öraga cocodrilucuna caycashgan mayupapis chimpapäcurgä. Juc cuticho, puentipa gueruncuna ismush captin juc botilapa mayuta chimpapäcunämi cargan. Dorcas ichircuptin botipita yargunanpaj, ilajpita ishquiycur undicur galaycurgan. Manchacash caycargä, paypis y nogapis musyargächu nadayta y mayuchoga cocodrilucuna caycargan. Pero waquin jovincuna yacuman yaycuycur warmïta jorgurgan. Chay pasamashganraycur öraga punuyta mana puedirpis, Jehovata sirviytaga manami jaguipäcurgächu.

1992 wata galaycunancho, Dorcas cuentata gocurgan gueshyaj caycashganta. Chayga cushicuypämi cargan. ¿Chayraycurchuraj Jehovata lapan tiempüwan sirvipäcuyta jaguirëman cargan? Ishcäcuna nipäcurgä juc wamraga Jehovapa bendiciunnin cashganta. Chaymi, Jahgift nir wamräta jutichipargä (chayga ninan “Jehovapa garaynin”). Chuscu watacuna pasariptinna Eric yurirgan. Ishcancuna Jehovapa bediciunninmi cargan. Jahgiftga Traducción Oficinacho yanapacurgan Conakri marcacho, y Eric siervo ministerialno yanapacun.

Tiempuwanga wamräcuna tacshalaraj caycaptin warmilä Dorcasga precursora regularno yanapacurgan. Noga ichanga Jehovapa yanapacuyninwan lapan tiempüwan precursor especialno sirviyta siguirgä. Wamräcuna winarcuptinna, Dorcas yapay precursora especialman ticrargan, cananga ishcäcuna misionerocunano Conakri marcacho yanapacurcaycä.

JEHOVALAMI IMAPITAPIS CHAPÄMANCHI

Imaypis Jehová mandamashganmanmi aywargä. Y warmïwan ricargä imano bendecimashganchita y chapämashganchitapis. Jehovaman yäracushgämi libramargan imayca problemacunapita y yarpachacuycunapitapis. Dorcaswan ricapäcurgä Jehovalami salvacoj Diosninchi cashganta (1 Crón. 16:35). Musyämi pipis lapan shongunwan Jehovaman yäracuptenga, pay imapitapis chapänanpaj cajta (1 Sam. 25:29).