¿Lapan mañacushgäcunatachuraj Dios contestan?

1, 2. ¿Imanirtaj öraga yarpashwan Jehová mañacuyninchita mana contestashganta?

“TAYTA DIOSTA kushishqa sirviy. Tsayno kawaptikimi shonquyki munashqanta kamaripäshunkipaq” (Sal. 37:4). ¡Cay texto nishganga cuyaylapämi! ¿Chauraga lapan mañacushganchitachuraj gomäshun? Chayno tapucuptinchega alimi. Caycunaman yarpäshun: juc japalan cristiana Diospita yachachicojcunapa escuelaman aywayta munan, pero watacuna pasarcuptinpis jinala shuyaraycan aywananpaj. Juc mozo cristianupis gueshyawan caycar Jehovata mañacun aliyächinanpaj congregaciuncho más yanapacunanpaj, ichanga saludninga manami aliyanchu. Juc taytawan mamapis mañacun wamran Jehovata mana jaguinanpaj, ichanga payga congregaciunpita aywacun.

² Gampis Jehovata mañacushgayquita mana chasquishga carga caynochi yarpanqui: ‘Jehovaga waquincunapa mañacuynincunata contestan, nogapa ichanga mana, ¿imachoraj fallashcä?’ nir. Janice jutiyojb cristiana chayno ricacurgan. Payga runanwan Betelcho yanapacuyta munapäcurgan. Janice cayno nin: “Segura caycargä ichiclacho invitamänanpaj”. Ichanga quillacuna y watacuna pasarcuptinpis invitaciunga manashi chayarganchu. Payga nin: “Pasaypa laquicur yarpachacuyman chayargä. ‘Imachotaj Jehovata fallashcä’ nergä. Mañacuynëcho ima munashgäta wilapaptëpis, tantiargächu imanir mana contestamashganta”.

3. ¿Imatataj canan yachacushun?

³ Capaz öraga cayno tapucushcanchi: ‘¿Diosga wiyanchuraj mañacushgäcunata?’ nir. Unaycho waquin Diospa sirvejnincunapis chayno tapucärergan (Job 30:20; Sal. 22:2; Hab. 1:2). ¿Imanirtaj yäracunquiman Jehová mañacuyniquicunata contestashganta? (Sal. 65:2). Chayta musyanapaj caycunapitaraj parlarcushun: 1) ¿munashganchinochuraj Jehová contestamanchi?, 2) ¿imatataj ruranapaj payga munan? 3) ¿imanirtaj öraga ima mañacushganchita trucachishwanraj?

¿MUNASHGANCHINOCHURAJ JEHOVÁ CONTESTAMANCHI?

4. ¿Imataj Jehová aunimanchi Jeremías 29:12 textucho?

⁴ Jehová aunimanchi mañacushganchicunata wiyamänanchipaj (leiriy Jeremías 29:12). Jehová sirvejnincunatami cuyan, chaymi mañacushgancunta imaypis wiyan (Sal. 10:17; 37:28). Öraga canan wichan lapan mañacushganchicunataga Jehová manami gomanchichu. Mushoj Pachachoraj shongunchi lapan munashganta Jehová camaripämäshun.

5. Mañacushganchicunata contestananpäga, ¿imataj más puntaman Jehová churan?

⁵ Jehová nunaynintaraj más puntaman churan mañacuyninchita manaraj contestar (Is. 55:8, 9). Payga munan shamoj tiempucho olgupis warmipis Gobiernunta yanapänanpaj, y lapancuna cushishga juc shongunola cawapäcunanpaj. Pero Satanasga nergan runacunapura gobernacuptin más ali cawapäcunanpaj (Gén. 3:1-5). Chaura Satanás lulacoj cashganta musyacänanpaj Jehová jaguirgan quiquin runacunapura gobernanacunanpaj, y chayraycurmi canan imayca mana alicunata ricanchi (Ecl. 8:9). Pero Jehovaga canan wichan chaycunata mana alchachingachu. Chayta ruraptenga runacuna yarpanmanchi quiquincunapura gobernacushgan ali cashganta, y munducho caycaj problemacunatapis alchachiyta puedishganta.

6. ¿Imanirtaj seguro caycanchi Jehová cuyamashganchita y alilata rurashgantapis?

⁶ Lapan mañacuyninchita manami igualpachu contestamanchi. Rey Ezequías pasaypa gueshyaycaptin Jehovata ruwacurgan aliyächinanpaj, y payga aliyarcurganmi (2 Rey. 20:1-6). Apóstol Pabluna mañacurgan cuerpuncho casha japuy gueshyanpita librananpaj, ichanga Jehovaga manami aliyächirganchu (2 Cor. 12:7-9). Santiago y Pedro apostulcuna pasashganta yarpäshun. Paycunataga rey Herodes wanuchiyta munargan. Congregaciuncho hermanucuna ishcancunapaj mañacuycaptinpis, Santiagutaga wanurachergan. Ichanga Pedrutaga Jehová salvargan juc milagruwan (Hech. 12:1-11). Chaura tapucunquichi: ¿Imanirtaj pedrutaga Jehová salvargan y Santiagutaga mana? Biblia chaypita mana wilacuptinpis musyanchimi ishcancunata Jehová alapa cuyashganta, payga “imaykatapis alilatami ruran” (Deut. 32:4; Apoc. 21:14).c Capaz öraga munashganchino Jehová contestamäshunchu, chayno captinpis manami ajayashwanchu. Payga amatar cuyamanchi y imaypis alilata ruran (Job 33:13).

7. ¿Imatataj ama rurashwanchu?

⁷ Imacunapa pasaycashganchicunata tincuchishwanchu. Capazchi öraga ima munaycashganchitapis Jehovata wilapaptinchega manami contestamanchichu. Pero ¿imaraj canman waquincuna noganchi mañacushganchino mañacuptinpis Jehova contestaptinga? Chayta pasargan Anna cristianata. Matthew runanga cancerwan gueshyaycargan, chaura Annaga Jehovata ruwacurgan aliyächinanpaj. Y chay wichanlacho ishcay edayashga cristianacunapis cancerwan nacaycargan, Annaga runanpaj y chay ishcay cristianacunapäpis mañacuycargan. Tiempuwan chay ishcay cristianacunaga aliyarcurgan, pero Matthew runanga wanucurgan. Annaga caynoshi tapucurgan: ‘¿Jehovachuraj chay ishcay cristianacunata yanapashga aliyarcunanpaj?’, chayno captenga ‘¿imanirtaj runätaga mana yanaparganchu?’ nir. Manami musyanchichu imanir chay ishcay cristianacuna aliyarcushganta, pero caytaga ama gongashunchu: ichiclacho Jehovaga lapan nacachimashganchicunata ushacächenga, y alapa munaycan wanushgan sirvejnincunatapis cawarachimunanpaj (Job 14:15).

8. 1) Isaías 43:2 nishganno, ¿imataj Jehová ruran yanapämänanchipaj? 2) Sasacunapa pasaptinchi, ¿imanotaj mañacushganchega yanapämanchi? (Cay videuta ricay: Diosta mañacushpanchiga calpantami gomanchi).

⁸ Jehová imaypis yanapämäshunmi. Taytalanchi Jehovaga cuyamanchimi y nacaptinchega paypis laquicunmi (Is. 63:9). Pero manami libramanchichu problemacunapitaga (leiriy Isaías 43:2). Chaypa trucan, payga aunimanchi yanapämänanchipaj ima pruebatapis aguantanapaj, y japalanchitaga manami jaguimäshunchu. Jina imaycatapis aguantanapaj espíritu santunta gomanchimi (Luc. 11:13; Filip. 4:13). Chaymi seguro caycashwan imatapis aguantanapaj y Jehovata cushishga sirvinapaj.d

¿IMATAJ JEHOVÁ MUNAN RURANAPAJ?

9. ¿Imanotaj Santiago 1:6, 7 nishganga yanapämanchi yäracunapaj Jehová yanapämänanchipaj?

⁹ Jehová munan payman yäracunanchipaj (Heb. 11:6). Öraga jatun pruebacunapa pasaptinchega capaz manchacunchimi, ‘Jehová quevä yanapämanga’ ninchirämi. Pero manami chaynochu, Bibliaga nimanchi Diospa poderninwanga “marka murällan altu kaptinpis achpaypami” yaycuyta puedinchi (Sal. 18:29). Chauraga dudashwanchu Jehová yanapämänanchipaj, chaypa trucanga lapan shongunchiwan mañacushun y yäracushun mañacuyninchita contestananpaj (leiriy Santiago 1:6, 7).

10. ¿Imanotaj mañacushganchino calpachacushwan ruranapaj?

¹⁰ Jehová munan mañacushganchino calpachacushwan ruranapaj. Juc cristiano masinchish jatun asambleaman aywayta munan, chaypäga Jehovata mañacun yanapänanpaj patronninwan parlananpaj. ¿Imanotaj Jehová mañacuyninta contestan? Capazchi calpata o valurta goycunman. Chayno captinpis quiquinraj aywanman patronninta permisuta mañacunanpaj, y galaycunancho mana munaptinpis cutin cutinraj parlapänan. Jina aroj masinpis paypa trucan arunanpaj parlapanman. Y hasta ninmanpis chay junaj mana arushganpita mana pagananpaj.

11. ¿Imanirtaj cutin cutin mañacushwan?

¹¹ Jehová munan cutin cutin mañacunapaj laquichimashganchicunapita (1 Tes. 5:17). Jesusga nergan lapan mañacushganchicunata Jehová juclaga mana contestananpaj (Luc. 11:9). Chayno captinpis, jinala mana yamacaypa lapan shongunchiwan mañacuycäshun (Luc. 18:1-7). Ima laquichimashganchicunapita cutin cutin mañacuptinchega, Jehovata niycanchi mañacushganchicuna manami juc ratulapächu cashganta, sinoga yäracuycanchi yanapämänanchipaj cajta.

¿IMANIR-RAJ ÖRAGA MAÑACUSHGANCHICUNATA TRUCACHISHWAN?

12. 1) ¿Imatataj tapucunanchi y imanir? 2) ¿Imatataj cuentaman churashwan mañacushganchicuna respetuwan cananpaj? (“¿Mañacushgäcunacho Jehovata respetaycächuraj?” recuadruta ricay).

¹² Lapan mañacushganchicunata Jehová mana contestaptinga, cay quimsa tapucuycunaman yarpäshun. Juc caj tapucuy, ¿mañacuyninchicuna Jehová munashgannochuraj caycan? Öraga Diosta mañacur yarpanchimi imataj más ali cashganta noganchipaj, pero tiempuwanga capaz chaytaga mana necesitashunnachu. Tantiarinapaj. Capaz cutin cutin mañacuycanchi imano juc problemata alchanapaj, pero cuentata gocunchichu jucnopapis chay problema alchacänanpaj. Jina öraga mañacushganchicuna Dios mana munashgannopis canmanmi (1 Juan 5:14). ¿Yarpanquichu juc caj parrafucho taytacuna imata mañacushganta? Paycunaga Jehovata ruwacurgan wamranta purichinanapaj ali caj nänicho. Mañacushgan alino captinpis, Jehovaga pitapis obliganchu Payta sirvinanpaj. Payga munan quiquinchicuna acranapaj adurananchipaj o manapis (Deut. 10:12, 13; 30:19, 20) Chauraga, ¿imataj chay taytacuna Jehovata mañacunman cargan? Jehovata ruwacunman yachachishgancuna wamranpa shongunman chayananpaj, chaynopa quiquin Jehovata cuyar amigunmanpis ticrananpaj (Prov. 22:6; Efes. 6:4).

13. Hebreos 4:16 nishganno, ¿imaytaj Jehová yanapämanchi?

¹³ Ishcay caj tapucuy, ¿mañacuyninchicunata jucla Jehová contestamänanchitachu munanchi? Lapanchimi munanchi Jehová rasla mañacuyninchita contestananpaj. Pero payga musyanmi imay tiempucho más ali cashganta contestamänanchipaj (leiriy Hebreos 4:16). Munashganchi hora Jehová mana contestamaptinchega, manami ninanchu mana munashganta contestamänanchipaj, sinoga nircur-raj contestamäshun. Yapay parlashun juc mozo gueshyanpita aliyanänpaj mañacushganta. Jehová payta aliyächiptenga, Satanasga ninmanchi chay mozo Jehovata sirviycan aliyächishganlapita (Job 1:9-11; 2:4). Pero Jehovaga mayna camacächishgana lapan gueshyacunata ilgächinanpaj (Isa. 33:24; Apoc. 21:3, 4). Chaymi canan wichan ama shuyarashwanchu Jehová juc milagruwan aliyächimänanchipaj. Chaura, ¿imataj chay mozo Jehovata mañacunman? Ruwacunmanmi calpata gonanpaj y gueshyawan caycarpis cushishgala Jehovata mana cachaypa sirvinanpaj (Sal. 29:11).

14. ¿Imataj yachacunqui Janice cristianata pasashganpita?

¹⁴ ¿Yarpanquichu Janice cristiana mañacushganta? Pichga watacunaraj pasashga tantiananpaj imano Jehová mañacuyninta contestashganta. Payga nin: “Chay wichancho Jehová yachachimashga y yanapämashga más ali cristianaman ticranäpaj. Payman más yäracunä cargan, Bibliätapis más leinä y mañacunä cargan. Jina yachacushgä ruraycashgäwan cushish caycänäpaj”. Tiempuwanga Janice runanwan congregaciuncunata watucamojno yanapacur galaycärirgan. Pay nin: “Jehovaga mañacushgäcunata contestamashgami, pero noga shuyarashgänochu cargan. Tiempuwanraj shumaj tantiargä Jehová imano contestamashganta. Alapami agradecicö Jehová cuyacoj cashganta y yanapämashgantapis”.

15. ¿Imanirtaj öraga ali canman ima mañacushganchita trucachinapaj?

¹⁵ Quimsa caj tapucuy, ¿munashgalanchitachuraj Jehovata mañacuycanchi? Juc asuntupaj mañacuptinchi alino captinpis, öraga más alimi canman mañacunapaj Jehovapa voluntänin ima cashganta musyanapaj. ¿Yarpanquichu Diospita yachachicojcunapa escuelaman aywananpaj juc cristiana mañacushganta? Payga escuelaman aywayta munargan Diospa marcancho más yanapacunanpaj. Chay ali captinpis, ¿ima mastataj Jehovata mañacunman? Capaz mañacunmanmi Diosta sirvishgancho imacunachotaj más yanapacunanpaj (Hech. 16:9, 10). Nircur mañacushganmanno congregaciunta watucoj wauguitapis tapupanman maygan congregaciuncho yanapacojcuna necesitashganta. Jina sucursalmanpis escribinman musyananpaj maygan congregaciuncho necesidad cashganta yanapacunanpaj.e

16. ¿Imapitataj seguro caycanchi?

¹⁶ Canan ricashganchino imaypis seguro caycashwan Jehová mañacuyninchicunata cuyacuywan contestamänanchipaj, payga imaypis alilata ruran (Sal. 4:3; Isa. 30:18). Capaz öraga manami munashganchinochu contestamäshun, chayno captinpis Jehovaga altanto caycan mañacushganchicunapita, Payga amatar cuyamanchi y manami imaypis jaguimäshunchu (Sal. 9:10). Chauraga “ima kaptinpis” Jehovaman yäracuycäshunla y shongunchitapis mashtapar mañacushun (Sal. 62:8).